Kati Jesus Kala Kawin? Kati Jesus Bisi Diri Menyadi?
Saut ari Bup Kudus
Taja pan Bup Kudus nadai kala madah sekalika Jesus kala kawin tauka enda, tang kitai pechaya Jesus enda kala kawin. a Aram kitai meda beberapa iti penerang ari Bup Kudus pasal pekara tu.
Dalam Bup Kudus suah nyebut pasal diri sebilik Jesus enggau bala indu ke sama gawa enggau iya ba pengawa nginjil, sereta maya iya diukum mati. Tang Bup Kudus nadai kala nyebut pasal bini Jesus. (Matthew 12:46, 47; Mark 3:31, 32; 15:40; Luke 8:2, 3, 19, 20; John 19:25) Nama kebuah? Laban Jesus nadai kala kawin.
Pasal orang ke milih enda kawin ngambika gawa mayuh agi ke Petara, Jesus madah, “Bisi mega orang ke sengaja muai perengka tubuh diri ketegal Perintah serega. Awakka orang ke ulih nerima ajar tu, nerima iya.” (Matthew 19:10-12) Jesus empu enda kawin. Nya kebuah iya ulih nyadi teladan ti pemadu manah ngagai orang ke sanggup enda kawin ketegal deka ngereja mayuh agi pengawa ke Petara.—John 13:15; 1 Korint 7:32-38.
Enda lama sebedau Jesus mati, iya ngaga atur ngambi indai iya bisi orang nyaga. (John 19:25-27) Enti Jesus kala kawin tauka bisi anak, iya tentu ngaga atur ngambi sida mega dijaga.
Bup Kudus ngelalau laki neladan Jesus, tang Bup Kudus nadai ngasuh bala laki neladan chara Jesus ngintu bini iya. Bup Kudus madah, “Kita ke laki, rinduka bini kita, baka Kristus ke rinduka eklisia, lalu nyerahka Diri Empu ke eklisia.” (Epesus 5:25) Enti Jesus kala kawin, tentu ayat nya bisi kaul enggau chara Jesus ngintu bini iya, ukai eklisia.
Kati Jesus bisi diri menyadi?
Au. Jesus bisi enam iku diri menyadi. Sida nya, James, Josep, Simon, enggau Judas, sereta dua iku menyadi indu. (Matthew 13:54-56; Mark 6:3) Sida nya anak kandung Maria enggau Josep. (Matthew 1:25) Bup Kudus ngumbai Jesus “anak tuai” Maria. Ari leka jaku tu, kitai nemu Maria bisi anak ke bukai.—Luke 2:7.
Salah runding pasal bala menyadi Jesus
Kena nyukung ajar pasal Maria ke dikumbai indu dara bungas sepemanjai idup iya, sekeda orang madahka reti “menyadi” ke disebut ba Bup Kudus ukai menyadi ti bendar. Ngambika chunto, bisi orang madahka bala menyadi Jesus nya anak dulu Josep. Tang Bup Kudus madahka Jesus bulih hak nyadi Raja ari peturun David. (2 Samuel 7:12, 13; Luke 1:32) Enti Josep bisi anak ke tuai agi ari Jesus, tentu anak ke tuai nya nyadi raja, ukai Jesus.
Kati “menyadi” ke disebut ditu mai reti bala menyadi Kristian? Enda, laban Bup Kudus mega bisi madahka, ‘Indah sida menyadi iya deh enda arapka iya.’ (John 7:5) Bup Kudus bisi madahka bida entara bala menyadi Jesus enggau bala murid iya.—John 2:12.
Bisi mega penemu ti madahka, bala menyadi Jesus ke disebut nya mai reti bala petunggal iya. Tang, nitihka Bup Kudus jaku Gerika, leka jaku ke dikena madahka menyadi lelaki ke biak tauka tuai, kaban belayan, sereta petunggal ngena leka jaku ti enda sama. (Luke 21:16; Kolosi 4:10) Mayuh pakar Bup Kudus setuju bala menyadi indu enggau menyadi lelaki Jesus ke disebut dalam Bup Kudus endang amat bala menyadi iya empu. Ambika chunto, The Expositor’s Bible Commentary madahka, ‘Chara ti pemadu manah kena nemu reti “menyadi” iya nya, leka jaku tu ditujuka ngagai bala anak Josep enggau Maria. Enggau tu, sida endang amat menyadi tiri Jesus, ke sama indai enggau iya.’ b
a Bup Kudus kala ngambarka Jesus nya pengantin lelaki. Tang ari konteks ayat nya, kitai nemu tu semina sempama aja.—John 3:28, 29; 2 Korint 11:2.
b Peda mega bup The Gospel According to St. Mark, Edisyen Kedua, ke ditulis Vincent Taylor, lambar 249, enggau bup A Marginal Jew—Rethinking the Historical Jesus, ke ditulis John P. Meier, Volum 1, lambar 331-332.
Nuan Engka Rindu Meda Tu
SAUT NGAGAI TANYA PASAL BUP KUDUS
Baka Ni Gamal Jesus?
Bup Kudus bisi madah ke kitai penemu kena ngambarka baka ni gamal Jesus.
SAUT NGAGAI TANYA PASAL BUP KUDUS
Nama Kebuah Jesus Dikumbai Anak Petara?
Enti Petara enda sebaka enggau apai mensia ke ulih meri peturun, nama kebuah orang ngumbai Jesus nya anak Petara?
