Jaku benabi nya pesan ke datai ari Petara. Bup Kudus madahka, bala nabi suba “nyebut utai ke datai ari Petara lebuh sida diiring kuasa kudus.” (2 Peter 1:20, 21) Nabi nya siku orang ke nerima pesan ari Petara sereta madahka nya ngagai orang bukai.—Surat Kereja Rasul 3:18.

Baka ni chara bala nabi nerima pesan ari Petara?

 Petara ngena beberapa iti chara kena madahka pesan Iya ngagai bala nabi Iya:

•   Petara nuliska pesan nya. Abis nadai bisi sekali Petara ngena chara tu, iya nya lebuh Iya nuliska Sepuluh Pesan ba batu lalu meri nya ngagai Moses.—Pemansut 31:18.

•   Petara bejaku nengah bala melikat. Ambika chunto, Petara ngasuh siku melikat madahka ngagai Moses pesan ke patut ditusui iya ngagai Firaun. (Pemansut 3:2-4, 10) Lebuh Petara deka meri sesiti pesan ti penting, Iya ngasuh melikat nyebut jaku Iya enggau nyemetak ngagai bala nabi. Tu meh utai ke digaga Iya lebuh iya madahka Moses: “Tuliska jaku tu, laban sejalai enggau jaku tu, Aku ngaga sempekat enggau nuan sereta enggau orang Israel.”—Pemansut 34:27. a

•   Petara ngasuh orang begenera. Kekadang, Petara ngasuh sesiku nabi begenera lebuh iya dani sereta sedar. (Esekiel 1:1; Amos 7:1) Sekeda genera nya amat nyata ba nabi nya, nyentukka iya empu ngereja utai ba dalam genera nya. (Luke 9:28-36; Pemandang 1:10-17) Ba maya bukai, Petara ngasuh sekeda orang begenera lebuh sida enda sedarka diri. (Surat Kereja Rasul 10:10, 11; 22:17-21) Petara mega bisi meri pesan Iya ngagai sekeda nabi nengah mimpi lebuh orang nya benung tinduk.—Daniel 7:1; Surat Kereja Rasul 16:9, 10.

•   Petara nepuka pesan nya dalam runding mensia. Petara nguasa runding sekeda ari bala nabi Iya ngambika sida ulih madahka pesan ari Iya. Tu meh reti iya lebuh Bup Kudus madah: “Semua ayat ba Bup Kudus datai ari Petara magang.” Rambai jaku “datai ari Petara” mega ulih disalin “seput ke dikesuhka Petara.” (2 Timoti 3:16; The Emphasised Bible) Petara ngena kuasa kudus Iya kena “ngesuhka,” tauka nepuka idea Iya dalam runding bala nabi Iya. Taja pan pesan nya endang datai ari Petara, tang nabi nya ulih milih ngena leka jaku diri empu kena ngenataika pesan nya.—2 Samuel 23:1, 2.

Kati jaku benabi nya mesti madahka pasal utai ti deka nyadi dudi hari?

 Enda. Jaku benabi Bup Kudus ukai semina nyebut utai ke deka nyadi jemah ila. Taja pia, kesuah iya, pesan ke diberi Petara nya madahka pasal utai ti deka nyadi ba pengidup orang. Ambika chunto, bala nabi suah nangkan orang Israel kelia menya pasal ulah sida ti jai. Dalam jaku tangkan nya, sida madahka pasal berekat ke deka diulih orang enti sida ngasika jaku tangkan nya, sereta pasal penusah ke deka ninggang orang enti sida enda ngasi. (Jeremiah 25:4-6) Nya alai, sekalika orang Israel deka bulih berekat tauka penusah, tu bepanggai ba sekalika sida deka ngasi tauka enda.—Ulang Adat 30:19, 20.

Chunto jaku benabi Bup Kudus ke ukai pasal jemah ila

•   Bisi sekali, orang Israel minta tulung ari Petara. Iya nganjung siku nabi ngagai sida kena nerangka, ketegal sida enggai ngasika pesan Petara, nya meh kebuah Iya enda nulung sida maya nya.—Pengulu 6:6-10.

•   Lebuh Jesus bejaku enggau siku indu Samaria, iya madahka pasal utai ke kala nyadi ba pengidup indu nya. Jesus semina ulih nemu pasal utai tu ketegal Petara udah meri iya penemu nya. Ari tu, indu nya ulih nyimpulka Jesus nya siku nabi, taja pan iya nadai madahka pasal utai ti deka nyadi jemah ila.—John 4:17-19.

•   Lebuh Jesus dipechara, bala munsuh iya mampul mua iya, malu iya, lalu nyebut: “Enti nuan amat nabi, padahka ngagai kami sapa ke malu nuan!” Sida enda minta Jesus madahka pasal jemah ila, tang sida ka Jesus ngena kuasa ari Petara ngambika ulih nemu sapa ke malu iya.—Luke 22:63, 64.