Bup Kudus ngajar, Petara dekaka mensia “dikuduska.” (1 Tesalonika 4:3) Dikuduska, reti iya nyeliahka diri ari pengawa seks ti kamah. Tu nyengkaum pengawa butang, seks ba entara lelaki sama lelaki tauka indu sama indu, sereta indu enggau lelaki ke bedau kawin.

•  Nama kebuah nya beguna amat ba Petara, lelaki enggau indu patut kawin enti deka diau segulai?

•  Kati ulih kitai diau segulai taja pan bedau kawin, kena nentuka kitai tu ulih tauka enda jadi enggau pangan diri?

•  Baka ni nirika ruang bilik ti tegap?

•   Petara ke ngatur tikah. Petara ngepunka tikah ba entara mensia keterubah. (Pemungkal 2:22-24) Petara enda rindu meda lelaki enggau indu diau segulai, tang nadai ati deka kawin.

•   Petara nemu utai ti pemadu manah ke mensia. Petara dekaka lelaki enggau indu kawin, ngambi ruang bilik ke didirika nya mai penguntung, sereta tiap iku orang ba ruang bilik dijaga. Peratika siti sempama. Enti nuan deka masang almari, nuan patut macha penerang ke udah disediaka kilang ke ngaga almari nya. Sama mega, enti kitai deka mujur ba ruang bilik, kitai patut ningaka iring Petara. Ari nitihka prinsip Petara, kitai deka bulih penguntung.—Isaiah 48:17, 18.

•   Seks sebedau kawin mai penusah. Pengawa ti enda bemoral tu, ulih ngujungka kandung ti enda dikinginka. Pia mega, ulih ngenataika penyakit sereta ngachau emosi.

•   Petara ngemendarka seks ba entara laki bini kena bulih anak. Ba mata Petara, nyawa nya amat berega. Pia mega, anak pan pemeri ti berega, asil ari tikah ke sah. Nya kebuah, Petara deka kitai bebasaka pemeri tu, lalu nitihka atur Iya pasal tikah.—Hebrew 13:4.

 Diau segulai sebedau kawin ukai kunchi pengelantang ba ruang bilik. Tang, ketegal nadai jamin tauka sempekat ba entara lelaki enggau indu nya, seduai iya ulih sebarang maya ngelengkaka pangan diri. Iya ke amat, kaul lelaki enggau indu nya ulih tegap agi enti seduai iya bisi nanchang tali semaya. Seduai iya deka agi bekerejasama maya mutarka penanggul. a Tikah ulih negapka agi pengerindu seduai iya.—Matthew 19:6.

 Nadai tikah dalam dunya tu sempurna. Taja pia, sepasang laki bini agi ulih lantang, enti sida nitihka lalau ba baruh:

•   Anang berundingka diri empu.—1 Korint 7:3-5; Pilipi 2:3, 4.

•   Kemansangka pengerindu sereta basa ngagai pangan diri.—Epesus 5:25, 33.

•   Tagang chara nuan mansutka jaku tauka asai ati.—Jaku Dalam 12:18.

•   Sabar sereta seruran ngampun.—Kolosi 3:13, 14.