Sapa ke patut ngajar bala anak pasal seks? Nitihka Bup Kudus, tanggung pengawa tu diberi ngagai apai indai. Mayuh ari apai indai ngasaika chara ba baruh tu amat beguna:

•   Anang malu. Bup Kudus enggau terang ngajar pasal seks sereta perengka seks. Petara mega ngasuh bansa Israel ngajar anak sida pasal pekara nya. (Ulang Adat 31:12; Adat Lewi 15:2, 16-19) Maya nyebut pasal seks tauka perengka seks, kena meh leka jaku ke ngena nitihka ba endur nuan empu, ngambika enda berasai malu nyebut nya.

•   Ngajar enggau belubah-lubah. Taja pan anak nuan bedau chukup umur, tang nuan ulih nerangka pekara tu enggau belubah-lubah.—1 Korint 13:11.

•   Ngajar standard moral. Ba sekula engka bisi ngajar pasal seks. Tang, Bup Kudus meransang apai indai ngajar anak sida empu. Ukai semina bekaul enggau tubuh fisikal, tang pasal runding sereta ulah ti betul pasal seks.—Jaku Dalam 5:1-23.

•   Dingaka anak nuan. Enti anak nuan bisi tanya pasal seks, anang jampat tekenyit, tauka salah penemu pasal utai ke ditanya iya. Tang, nuan patut “jampat mending, lubah mansutka jaku.”—James 1:19.

Chara nyaga anak nuan ari nyadi mansa seksual

•   Ngiga penerang. Giga penerang pasal chara ke suah dikena orang ke ngachau ngena chara seksual.—Jaku Dalam 18:15; peda bup “Pertanyaan Kaum Muda,” pelajar 32, jilid 1 dalam bansa jaku Indonesia.

•   Nemu pengawa anak nuan ninting hari. Sebedau nuan ngasuh orang bukai nyaga anak nuan, tentuka nuan amat ulih pechayaka orang nya. Nambahka nya, anang nejuka anak nuan kelalu bibas, lalu enda ulih dirara.—Jaku Dalam 29:15.

•   Ngajar anak ngembuan runding ti betul pasal ngasi. Anak patut belajar ngasika apai indai. (Kolosi 3:20) Tang, enti nuan ngajar anak nuan patut ngasika semua orang ke besai tuai, iya ke bendar, chara nuan ngajar nya ulih ngemediska iya. Apai indai Kristian ulih madahka anak sida, “Enti sapa-sapa ngasuh nuan ngereja utai ti salah ba mata Petara, anang ngereja nya.”—Kereja Rasul 5:29.

•   Belatihka chara nyaga diri. Ajar anak nuan pasal nama patut digaga sida enti bisi orang deka ngachau sida ngena chara seksual. Kita ulih belakunka chara nya. Kita ulih madah enggau terang, “Umbas nya! Anang ngachau aku!” lalu rari. Nuan patut suah ngajar anak nuan pasal chara tu, ngambi sida seruran ingat.—Ulang Adat 6:7.