Riput nunjukka, orang ke nemu beterima kasih lebih lantang agi, bepengerai, ulih mutarka penanggul, sereta bulih kaul ti manah enggau orang bukai. Seiku pemansik ke benama Robert A. Emmons madahka, “Orang ke nemu beterima kasih ulih nyeliahka diri ari ulah ti chemburu, bedendam, amu, ringat, sereta asa ati.” a

 Nama penguntung enti anak mit nemu beterima kasih? Siti uji kaji udah dipejalaika ngagai tujuh ratus iku orang nembiak pengelama empat taun. Nitihka uji kaji tu, nembiak ke nemu beterima kasih, kurang ngereja pengawa nipu maya ujian, salah guna dadah enggau ai bisa, tauka ngembuan ulah ti enda menuku.

•   Enti kitai ngasaika diri patut nerima utai ti manah, kurang agi kitai beterima kasih. Mayuh anak mit ngasaika diri patut nerima utai ti manah. Nya alai, sida kurang beterima kasih lebuh utai ti manah nyadi ba sida.

   Ulah tu majak biasa kemayaharitu. Ku seiku indai ke benama Katherine madahka, “Dunya diatu ngajar, kitai patut bulih sebarang utai ke dikedekaka kitai. Dunya tu sempama ngayanka gambar utai ke patut ‘diempu’ kitai enggau jampat.”

•   Ulah beterima kasih ulih dipupuk kenyau ari mit. Ku seiku indai ke benama Kaye nerang, “Anak mit senang diajar. Ngajar sida tebiat ti manah kenyau ari mit, baka ngena kayu nungkat utai tumbuh ngambika ulih terus bediri tegak.”

•   Ajar sida utai ke patut disebut. Indah kenyau ari mit, anak mit ulih diajar nyebut terima kasih lebuh sida nerima hadiah tauka bisi orang ngelayan sida enggau manah. Seraya sida mansang besai sereta nemu berunding, sida deka belubah-lubah nemu beterima kasih ke pemanah orang bukai enggau dalam agi.

   Prinsip Bup Kudus: “Seruran beterima kasih.”—Kolosi 3:15.

   “Uchu kami ke beumur tiga taun, suah nyebut ‘terima kasih’ enggau ‘tulung.’ Iya belajarka teladan tu ari apai indai iya. Ketegal apai indai nemu beterima kasih, anak sida mega nemu ngayanka ulah ti beterima kasih.”—Jeffrey.

•   Ajar sida utai ke patut digaga. Ulih nuan nulung anak nuan nulis kad terima kasih lebuh orang bukai meri sida hadiah? Kelimpah ari nya, nuan mega ulih meri pengawa ba rumah ngagai anak nuan, ngambika sida faham nama patut digaga kena nyaga rumah.

   Prinsip Bup Kudus: “Beberekat agi orang ke meri, ari orang ke nerima.”—Surat Kereja Rasul 20:35.

   “Kedua-dua anak kami ke nembiak nulung kami berunding, nyedia sereta manduk pemakai. Lalu seduai iya mega nulung kami ngaga pengawa ke bukai ba rumah. Tu meri sida penemu, pasal tanggungjawap kami ke nyadi apai indai, sereta meransang sida nemu beterima kasih.”—Beverly.

•   Ajar sida ulah ti betul. Baka utai tumbuh ti ulih tumbuh enggau manah ketegal tanah ti subur, baka nya mega asai ati ti nemu beterima kasih ulih dikembuan ketegal bisi pemaruh ati. Orang ke baruh ati nemu sida begunaka bantu ngambika ulih mujur. Pia mega, tu meransang sida beterima kasih ke sukung ti diterima sida.

   Prinsip Bup Kudus: “Tang enggau ati ti baruh, seruran ngumbai orang bukai pama agi ari kita. Anang semina berundingka diri empu aja, tang berunding mega ke orang bukai.”—Pilipi 2:3, 4.

   “Kekadang, kami ngaga siti aktiviti maya makai malam begulai. Tiap iku orang begilir-gilir madahka, utai ke ngasuh sida beterima kasih. Tu meransang sida ngembuan runding ti positif lalu deka ngayanka ulah ti beterima kasih. Tang ukai runding ti negatif sereta berundingka diri empu.”—Tamara.

 Tip: Tetapka teladan. Anak mit nemu beterima kasih lebuh sida meda nuan ke apai indai nunjukka terima kasih ngagai orang bukai, sereta ngagai sida.