Pengudah lama jadi melaki bini, majak tusah deka ngayanka pengerindu. Enti nuan bisi ngasaika utai baka tu, nama patut digaga nuan?

•  Utai ke patut ditemu nuan

•  Utai ke ulih digaga nuan

 Pengerindu nya utai ti beguna bendar dalam tikah. Baka pemakai ti ulih meri pengering ke tubuh. Pia mega, laki bini tau negapka tikah seduai iya ari pengerindu ke diayanka. Nya alai, taja pan udah lama jadi enggau pangan diri, seduai iya agi ulih ngasaika diri dikerinduka kaling pengidup sida.

 Pengerindu ti enda berundingka diri. Ketegal rinduka kaling pengidup kitai, kitai tentu deka iya gaga ati. Nya kebuah, laki bini tau mansutka pengerindu sida barang maya. Sida ukai semina ngayanka nya ba maya ti patut aja.

 Bini begunaka mayuh agi pengerindu ari laki. Taja pan laki sayauka bini iya, tang enti iya semina madahka pengerindu diri ba sesiti maya, tauka lebuh deka besetubuh enggau pangan diri, nya ulih ngasuh bini berasai enda entu dikesayauka. Laki patut suah agi madahka pengerindu diri ngagai bini.

 Ayanka pengerindu nuan nengah leka jaku. Kaling pengidup nuan tentu ngasaika diri dikesayauka lebuh iya ninga nuan nyebut, “Aku sayauka nuan” tauka “Untung aku ngempu nuan”.

 Lalau ari Bup Kudus: “Mulut kita nyebut utai ti ngemenuhka ati kita.”—Matthew 12:34.

 Chara: Kelimpah ari leka jaku, laki bini pan ulih mansutka asai ati sida nengah email, sms, tauka kad.

 Ayanka pengerindu enggau pengawa. Kelimpah ari nyebut “Aku sayauka nuan”, nuan mega ulih merap, nyium tauka bepegai jari enggau kaling nuan. Tu ulih ngasuh sida berasai dikesayauka agi. Pia mega, nuan ulih murus, merening mata kaling nuan enggau pengerindu, tauka meri pemeri ke enda disadang iya. Laki mega ulih nulung bini megai bik sida, muka pintu, tauka ngereja pengawa ba rumah. Ba bini, tu amat ngagaka ati. Tu nunjukka laki sida amat sayauka sida!

 Lalau ari Bup Kudus: “Rinduka pangan diri, ukai ngena leka jaku tauka ngena utai ti disebut kitai, tang ngena pemendar enggau pengawa ti dikereja kitai.”—1 Jhn. 3:18

 Chara: Seruran ngayanka pengerindu sereta pengibuh ti sama maya seduai agi besulu.

 Nyediaka awak begulai enggau pangan diri. Enti seduai suah nyediaka awak begulai enggau pangan diri, tu ulih ngerapatka agi kaul seduai. Kaling nuan ulih ngasaika nuan rindu begulai enggau iya. Kekadang tu enda senang kelebih agi enti udah bisi mayuh anak tauka kelalu kisuk. Tang, nuan ulih berundingka chara ti senang ba seduai, ngambika chunto, ulih ngirup kupi begulai lebuh bala anak udah tinduk.

 Lalau ari Bup Kudus: “Nemu milih utai ti pemadu badas.”—Plp. 1:10.

 Chara: Taja pan kisuk, tang laki bini patut ngiga awak makai begulai tauka kekadang ulih raun ngagai endur bukai.

 Ngelala sapa kaling nuan ti bendar. Tiap iku kitai enda sama. Uji kerandauka chara ngayanka pengerindu ti dikedekaka nuan enggau kaling nuan. Pia mega, tanya meh kaling nuan sekalika iya bisi ngasaika diri dikesayauka. Lalu enggau naka ulih kereja meh utai ke dipinta iya. Kingatka, pengerindu nya utai ti berat bendar dalam tikah nuan ngambika ulih betan belama iya.

 Lalau ari Bup Kudus: “Pengerindu nya liat ati...enda berundingka diri empu.”—1 Kor. 13:4, 5.

 Chara: Anang minta diri dikesayauka. Tang, uji perundingka, ‘Nama patut digaga aku ngambika iya ulih sayau agi ngagai aku?’