Ngambi anak ulih kreatif, sida patut ngereja pengawa ti ulih ngemansangka chara sida berunding sereta asai ati sida ti deka nemu. Tu nulung sida nemu agi berunding, lalu ngemansangka ulah ti manah.

 Entara pengawa ke ulih diperundingka:

•   Ngelukis

•   Ngaga kueh tauka manduk pemakai a

•   Main belakun

•   Belagu

•   Ayam kena main tusun

•   Main enggau utai ke ngelingi tauka utai ke dikemisi, chunto iya, kutak.

 Kemayaharitu, mayuh anak mit nadai main baka tu agi. Mayuh ari sida udah bisi talipun, meda TV, tauka ngereja sesiti pengawa ke udah ditentuka apai indai.

 Ba runding nuan, kati tu ukai utai ke patut dikeirauka?

•   Utai ke patut ditemu nuan

•   Utai ke ulih dikereja nuan

•   Pengawa ti kreatif nulung anak nuan seraya iya mansang besai. Tu nulung anak nuan gerai agi ba tubuh, kreatif, sereta senang begulai enggau orang. Iya mega belajar sabar agi, ulih ngaga pemutus ti manah, enda jampat ringat, lalu ulih gawa setim enggau anak mit ke bukai, lebuh sida main begulai. Pandakka jaku, sida ulih nyadi orang ke menyana agi lebuh sida besai ila.

•   Kelalu balat main perengka elektronik ulih ngemedis. Perengka elektronik ulih ngasuh anak nuan gian. Nitihka siti pansik, kelalu balat main perengka elektronik ngujungka berat tubuh anak senang niki, lalu ulah sida mega kasar. Nya alai, apai indai patut bejimat, kelebih agi enti tuju sida meri anak perengka elektronik nyadika ayam sida, tauka ngambika sida enda nyida sereta ngachau.

•   Kelalu mayuh pengawa diberi. Apai indai patut bejimat lebuh ngatur pengawa ke bala anak, endaika nya kelalu mayuh ke anak sida. Enti anak diberi kelalu mayuh pengawa, sida nadai awak ngereja pengawa ke dikerinduka sida empu, laban ba umur anak mit meh sida deka ngemansangka pengingin sida belajarka sesiti utai, lalu ngajar sida lebih kreatif.

•   Giga pengawa ke ulih ngemansangka kreativiti anak nuan. Enti nya ngena, bai meh anak nuan pansut ke keluar, ngambi iya ulih bemain lalu belajarka utai ke ngelingi. Tejuka sida ngereja hobi diri, tauka bemain enggau ayam ke ngasuh sida kreatif agi. b

   Pikirka: Ulah ke baka ni sereta ni bagi pengelandik ke deka dipansutka anak aku, lebuh iya ngereja pengawa ti kreatif? Nama guna utai tu seraya iya mansang besai ila?

   Prinsip Bup Kudus: “Matihka tubuh beguna.”—1 Timoti 4:8.

•   Meri anak tatak ngena perengka elektronik. Sebedau meri anak nuan sebarang perengka elektronik, perundingka enggau dalam dulu. Nitihka lutur anak mit, anak mit ke baruh umur dua taun, enda patut ngena sebarang perengka elektronik, lalu anak mit ke entara dua ngagai lima taun, enda ulih main enggau perengka nya lebih ari sejam dalam sehari. c

   Pikirka: Ni pengelama aku ngemendarka anak aku ngena perengka elektronik tauka meda TV? Kati aku bisi enggau iya lebuh iya main perengka nya? Nama agi pengawa bukai ke ulih dikereja anak aku, ngambika iya limpang ari kelalu balat ngena perengka elektronik?

   Prinsip Bup Kudus: “Bejimat, ukai baka orang ke beli, tang baka orang ke bepenemu-dalam. . . . Kena semua peluang kita enggau badas, laban hari tu jai.”—Epesus 5:15, 16.

•   Perundingka, nama empas atur ke digaga nuan ngagai bala anak. Amat, sekeda pengawa nya engka ulih ngemansangka pengelandik sida ba sekeda utai. Tang, enti kelalu mayuh pengawa tu ulih ngujungka stres ngagai bala anak sereta apai indai. Ba pekara tu, lalau pasal ngena awak enggau manah bisi diterangka ba Epesus 5:15, 16.

   Pikirka: Kati aku ngatur kelalu mayuh pengawa ngagai anak aku? Enti au, kati ulih aku ngubah nya?

   Prinsip Bup Kudus: “Nemu milih utai ti pemadu badas.”—Pilipi 1:10.