Kena 2 Disember 2021, Kot Pelilih Pervomayskiy ba Bishkek, Kyrgyzstan, mutuska nulak peminta penawa ke deka ngumbai 13 iti litaricha Saksi-Saksi Jehovah ekstremis. Penawa nya nguji deka ngerumbanka pechara nya lalu nadai meri mayuh awak ngagai menyadi kitai kena nyediaka kes tu. Taja pia, bala luyar ke ngarika Saksi-Saksi Jehovah sempat nyediaka dokumen ke nunjukka kebuah sida enda setuju enggau tuduh tu. Bepelasarka dokumen ke disediaka nya, akim mutuska penawa udah ngelanggar atur kot lalu ngaga pemutus deka muai kes tu. Agi bisi sepuluh hari alai penawa nya ulih ngapil pemutus tu.

Kena Hari Empat, 2 Disember 2021, Kot Pelilih Pervomayskiy ba Bishkek, Kyrgyzstan, deka mutuska sekalika 13 iti litaricha Saksi-Saksi Jehovah patut dikumbai ekstremis. Dokumen ke udah disediaka penawa nunjukka sida deka nguji nitihka chunto Rusia, iya nya ukai semina nagang litaricha kitai. Ambika chunto, Komiti Pengelikun Menua Kyrgyzstan nuliska siti surat ngagai Ketuai Penawa Menua. Surat nya ngasuh piak bedawa “nagang litaricha gerempung pengarap tu, lalu mansik sekalika pengawa gerempung tu pan ulih ditagang di Republik Kyrgyzstan.”