Menyadi Cecilia Alvarez, ari Argentina, balat napi penanggul ba pengerai. Keterubah iya beputung maya iya beumur 16 hari aja. Kena bulan Mei 2018, bala lutur ba Argentina mutung iya ketegal iya bisi penanggul ba tulang belakang. Berengkah ari 25 taun ti udah, Cecilia udah 42 kali beputung, lalu mayuh agi diputung maya iya agi mit. Empai lama ti udah, punggung mua ke kiba iya patut diputung. Baka selama, semua pengawa tu mujur enggau chara enda nerima darah.

Cecilia empu madah, “Aku berasai tusah ati ngenang tubuh diri patut diputung mayuh kali, sereta makai mayuh macham ubat.” Taja pia, iya tetap andalka Jehovah lalu bebendar deka ngembuan runding ti manah. Nambahka nya, ari sukung apai indai, iya mega bebendar deka nitihka lalau ari lutur. “Siti utai ke patut dikemeratka, aku patut nyendiaka tubuh diri diputung,” ku Cecilia. “Aku patut makai sekeda bengkah ubat sereta sekeda pemakai ke ulih nulung tubuh aku ngasilka mayuh agi sel darah mirah.”

Cecilia madahka pasal raban lutur ke nulung iya ngelama tu. “Aku amat beterima kasihka pemendar sida nulung aku, ukai aja ketegal sida nyelamatka nyawa aku, tang ketegal sida bebasaka pemutus aku ke enggai nerima darah.”

Bala lutur ke ngaduka penanggul Cecilia mega madahka, sida amat bebasaka Cecilia sereta bala menyadi ke nulung iya. Seiku ari sida nya Dr. Ernesto Bersusky, ke kala nyadi tuai tauka pakar tulang ba Sepital Juan P. Garrahan Children’s di Buenos Aires. Iya kala mutung Cecilia ketegal penanggul tulang belakang iya. Iya ngenang baru, “Maya aku ngaduka kes Cecilia, aku ulih meda pengeliat ati iya deka madahka pengarap diri. Aku selalu berandau enggau iya. Aku nerangka utai ke deka dikereja aku ngagai iya, lalu aku madahka iya, iya enda nerima darah.”

Dr. Susana Ciruzzi, seiku luyar sereta orang ke gawa ba begian prinsip ke ulih dikena bekaul enggau pengerai, ba Sepital Juan P. Garrahan Children’s. Iya madahka, Bisi kerejasama ti manah entara bala lutur enggau Saksi-Saksi Jehovah. Kami deka bekerejasama enggau bala Saksi-Saksi Jehovah lalu berubah. Ukai aja kami patut ngubah chara kami berunding, pia mega kami patut ngemansangka agi chara sereta penemu kami pasal chara berubat. Tu nulung kami nemu mayuh agi chara berubat bukai ke enda begunaka darah.”

Cecilia ukai semina beterima kasih ngagai bala lutur iya aja. Nitih ku iya, iya ulih ngelaban penanggul iya nya ketegal bisi sukung ari bala menyadi. Iya madah, “Aku amat beterima kasih ngagai Komiti Besilih Penemu Sepital enggau Raban Ngabas Orang Sakit. Sida sanggup meri awak sereta pengering, lalu sedia nulung taja pan sida bisi ruang bilik enggau tanggungjawap sida ke bukai. Tu amat berega ba aku.”

Diatu, Cecilia beumur 25 taun. Taja pan iya selalu berasai pedis sereta ngena kerusi roda, tang iya dikelala ketegal iya selalu ngembuan runding ti manah. Indah iya madahka, “Aku ngasaika, ketegal aku udah napi mayuh macham pemedis, nya nulung aku ngemansangka ulah ti manah sereta kualiti Kristian.”

Cecilia nambah baru, “Bisi sekali, pengudah aku beputung, seiku ari Komiti Besilih Penemu Sepital ke datai ngabas, bekunsi enggau aku ayat ba Jaku Dalam 10:11, dia madah, ‘Berekat ti diberi Jehovah, ngasuh kaya, lalu Jehovah nadai nambahka ati ti tusah enggau pengaya nya.’ Ayat nya terus tama runding sereta ati aku.

Kena 1 Mei 2019, Cecilia nerima siti berekat ti amat spesial. Iya dipilih nyadi pengerintis biasa. Terang amat, Jehovah deka terus merindang sereta ngeringka menyadi ke dikesayauka kitai tu. Asil iya, Cecilia pan gaga ati bekunsika berita manah ari Bup Kudus ngagai orang bukai.

Kitai amat andal, Jehovah deka terus merindang kitai, enda ngira nama penguji ke patut ditapi kitai, baka ke dikereja Iya ngagai Cecilia.—2 Korint 1:4.