Mayuh Saksi-Saksi Jehovah bulih pengaga ati ari nginjil ngena surat. Peratika sekeda pengalaman menyadi kitai ba Amerika Serikat ti nunjukka, nulis surat nya chara ti manah ngerembaika Berita Manah ari Bup Kudus.

Menyadi Carlee Ruggles ke beumur 13 taun, diau ba Blue Ash di Ohio. Lebuh siti ari surat ke ditulis iya dibalas, baru iya nemu pemanah iya nginjil ngena surat.

Bisi sekali, lebuh Carlee bisi ba depan rumah, iya tepedaka seiku orang ke nepan motosikal ti inggar mansang ngagai rumah sida. Orang lelaki nya nurun ari motosikal nya, mandangka surat ke diterima iya lalu nyerauh: “Sapa nganjung surat tu ngagai aku?” Carlee nemu nya siti ari surat ke ditulis iya lebuh nginjil.

Seraya apai indai Carlee jejampat datai ngambika meda nama utai nyadi, Carlee nyaut enggau berani: “Tuan, aku meh ke nulis surat tu ngagai nuan.”

Carlee enggau apai indai iya sama tekenyit lebuh ninga lelaki nya nyaut: “Surat nuan tu chun-chun utai ke diguna aku!” Ketegal pandemik COVID-19, lelaki tu jarang begulai enggau orang, lalu baru-baru tu iya berasai amat seilu-ilu. Iya lalu nerangka, surat nya udah meransang iya. Nambahka nya, empai lama ti udah menyadi iya nadai, tang surat Carlee nya ngelantangka ati iya.

Lelaki nya nyimpulka: “Anang ngetu nuliska surat ngagai orang. Enda ngira orang malas surat nuan tauka enda, nuan ulih meransang mayuh orang.”

Diatu Carlee keran agi deka terus nulis surat ngagai orang ke diau semak iya. Ku iya: “Aku gagit ati laban Jehovah meransang seiku orang nengah aku. Utai ke ditulis kitai sigi ulih negu ati orang bukai.”

Menyadi Myrna Lopez ari Center, Texas, kakang ati sekalika surat ke ditulis iya amat ulih nulung orang bukai. Tang, utai ke nyadi lebuh iya nulis surat ngagai seiku kaban belayan amat meransang iya. Myrna ninga berita pasal anak menyadi iya ke dijil, lalu iya deka nulis surat ngagai iya. Nembiak ke lelaki tu kala datai gempuru Saksi-Saksi Jehovah lebuh iya agi mit. Ba dalam surat iya, Myrna ngingatka anak lelaki iya pasal Jehovah ti seruran ingatka iya.

Anak menyadi iya malas surat nya. Iya madah, pengudah ditangkap iya berasai balat irau sereta ngasaika pengidup iya nadai tuju. Lebuh iya tama rumah jil, iya ngenang baru pasal pengidup iya lebuh agi mit. Iya berengkah macha Bup Kudus sereta besampi ngagai Jehovah. Iya ngumbai surat Myrna nya saut ngagai sampi iya, sereta bukti ti nunjukka Jehovah agi ibuhka iya.

Lebuh seiku indu benung jogging ba taman di Norcross, Georgia, iya tepedaka siti surat ke dilipatka ba jalai. Keterubah iya, indu nya mansa aja surat ke dipeda iya. Tang udah nya, taja pan iya empu enda nemu nama kebuah, iya nikal baru lalu nyengkau surat nya. Surat nya ditulis Menyadi Natalie Bibbs. Pengudah macha surat, indu nya malas surat Natalie.

Ku indu nya nulis: “Minggu nya aku mayuh penusah. Aku amat arapka siti utai manah nyadi ba aku minggu nya. Surat nuan meh ‘utai manah’ ke dianti aku!”

Natalie nerangka: “Lebuh aku nerima surat iya, tu ngasuh aku andal, enda ngira nama chara ke dikena kitai nginjil, Jehovah endang nyukung kitai.”

Ba Texas, lebuh bala pekereja supermarket nulung Menyadi Laura Martinez ngangkutka barang ngagai kerita iya, iya meri genap iku sida siti surat. Seiku ari sida madahka Laura, surat tu amat negu ati iya. Udah nya, Laura nulis dua iti da agi surat ngagai indu nya, lalu diatu sida bejarit belajarka Bup Kudus.

Pengalaman baka tu ngingatka kitai, taja pan kitai enda nemu dini alai benih ke ditaburka kitai “deka tumbuh,” Jehovah deka ngena kitai meri peransang ngagai orang ke lurus ati, enda ngira nama chara dikena kitai nginjil.—Pengajar 11:6.