Ovahongonone va Jehova ve raisa ondengero kozohoromende na koviraisiro mbi kuramena po ehi. Eṱe katu pindike indu varwe tji mave yozike erapi rehi poo tji mave imbura eimburiro rehi.

 Posi yokutja, otjOvahongonone va Jehova twa toorora okuhinokukara norupa momikandi vyouye, orondu tu kambura kutja vi vetasana otjiuru nomahongero wOmbeibela. Eṱe tu raisa ondengero koviṋa ovandu mbi ve kambura mo, ku nao tu tjaterwa tjinene varwe tji mave tu raisire ondengero otjingeyo ndjo.

Morupa ndwi matu katara komapuriro nga

•  Omirari viṋe vyOmbeibela mbi mavi tjama nepu ndi?

•  Hapo matu tjiti vi indu tji pe noveta ndji mai tja matu sokukara norupa movitjitwa otja imbyo?

•  Hapo Ovahongonone va Jehova ve nomunda mbu ve toorora moviṋa vyozopolotika?

 Omirari vyOmbeibela vivari mbi vi tu vatera okutoora omukambo omusemba:

•   Mukuru erike ongu nousemba wokurikotamenwa. Ombeibela mai tja: “Rikotamena ku Muhona, Ndjambi woye, nu u karere Ye erike!” (Lukas 4:8) Momaimburiro wehi popengi ye kara omambo nge kwizika kutja omundu ma sokusuvera ehi re tjinene okukapita oviṋa varwe. Ku nao, Ovahongonone va Jehova ve muna kutja kanawa okukara norupa movitjitwa otja imbyo.

   Ovahongonone va Jehova ve muna kutja okuyozika erapi rehi ku ri tjimuna okurikotamena kovisenginina, nu imbi oviṋa Ombeibela mbi i tjaera. (1 Ovakorinte 10:14) Ovakonḓonone tjiva ve tja omarapi wehi oviraisiro vyozongamburiro. Omutjange womakuruhungi Carlton J. H. Hayes wa tja: “Erapi rehi otjiraisiro ku kwa zikamena ongamburiro yotjiwaṋa nu okuverikotamenena.” a Tjaa hungire ohunga nOvakriste veserewondo etenga, omutjange womambo Daniel P. Mannix wa tja, Ovakriste mbo aave panḓa okurikotamena kombara yOvaroma. Momuano tjingewo mbo Ovakriste ndino kave yandja ondjozikiro kerapi rehi. b

  Nandarire kutja Ovahongonone va Jehova kave rikotamene kerapi rehi, owo kave ri taura nokurinyosa poo okutjita otjiṋa tji tji hi nokuraisa ondengero ku ro.

•   Ovandu avehe ve ṱeki pamwe komurungu wa Mukuru. (Oviungura 10:34, 35) Ombeibela i tja Mukuru “pomundu umwe Eye wa utire po omihoko avihe vyovandu.” (Oviungura 17:26) Mena repu ndi Ovahongonone va Jehova ve kambura kutja onavi okuyozika omuhoko umwe poo otjiwaṋa tjimwe okukapita vyarwe. Eṱe tu raisa ondengero kovandu avehe kainatja kutja va za pi poo va tura pi.—1 Petrus 2:17.

 Ovahongonone va Jehova kave pirukire ohoromende kaaṋi, orondu tu kambura kutja ozohoromende za tuwa po i Mukuru poo ze nana mena ‘romaraerero waNdjambi.’ (Ovaroma 13:1-7) Eṱe wina tu kambura kutja Ovakriste mave sokupuratena komaraerero ayehe wozohoromende.—Lukas 20:25.

 Hapo matu tjiti vi indu ouhonapare tji mau tu ningire okutjita otjiṋa tji matji vetasana otjiuru nomirari vya Mukuru? Povikando tjiva, eṱe tu ningira ohoromende tji mape sorwa okurundurura ozoveta nḓo. c Posi ya, indu ohoromende tji hi nokusora okutjita nao, Ovahongonone va Jehova ve toorora okukara “nonḓuviro ku Ndjambi komeho yokukara nonḓuviro kovandu.”—Oviungura 5:29.

 Kako. Ovahongonone va Jehova kave kara nomunda moviṋa vyozopolotika. Indu tji tu hi nokuimbura eimburiro rehi poo okuyozika erapi rehi, ihi katjiraisiro tjokutja matu pirura ohoromende. Nungwari eṱe matu kongorere omirari vyOmbeibela.