1. Jesus ma katjita tjike moruyaveze rwopopezu?

 TU HUPIRA moruveze oviṋa ovingi mu vi runduruka. Moruyaveze rwopopezu, Jesus ma pangura ovandu avehe kombanda yehi. Jesus we tu raera kutja maku tjitwa tjike mouye ngunda e hi ya pangura ovandu. Eye wa yandja “otjiraisiro tjomeero [we] notjomaandero wouye,” kovahongewa ve. (Mat. 24:3) Omaprofetero nga ye ri mu Mateus ekondwa 24 nekondwa 25, na mu Markus ekondwa 13 na Lukas ekondwa 21.

2. Hapo matu kahungirira ku ye morupa ndwi, nu mavi tu vatere vi?

² Jesus wa ungurisa ovisasanekero vitatu okutuvatera kutja tu rirongerise. Ovyo omarakiza kweṱe. Ovisasanekero mbi ohunga nozonḓu nozongombo, ovasuko ovanazondunge na imba omayova, novimariva ovisilveri. Otjisasanekero atjihe tji tu vatera okutjiwa kutja Jesus ma pangura omundu auhe otja kovitjitwa vye. Morupa ndwi, matu kahungirira kovisasanekero mbyo nokutara kutja ovikwaye mbi matu rihongo okuza ku vyo. Otjisasanekero tji matu katara ko rutenga, otjo hi tjozonḓu nozongombo.

OZONḒU NOZONGOMBO

3. Oruṋe Jesus tji ma kapangura ovandu?

³ Motjisasanekero tjozonḓu nozongombo, Jesus wa tja ma pangura ovandu otja komuano mu ve yakura ombuze ombwa, nomuano mu ve yandja oruvara kovangu ve ovatwirisiwa. (Mat. 25:​31-46) Moruveze ‘rwozombamisiro ozonene tjinene,’ eye ma haṋa ovandu otjozonḓu poo ozongombo ngunda oArmagedon ai hi ye ya. (Mat. 24:21) Tjimuna omurise tje haṋa ozonḓu kozongombo, Jesus ma haṋa imba mbe yandja oruvara kOvakriste ovatwirisiwa okuza ku imba mbe ha tjiti nao.

4. Otja ku Jesaja 11:​3, 4, ongwaye tji matu yenene okukara nongamburiro kutja Jesus ma pangura ovandu momuano omusemba? (Wina tara kotjiperendero.)

⁴ Ombeibela i tja Jesus ngwa toororwa i Jehova okupangura,  eye ma tjiti nao momuano omusemba aruhe. (Lesa Jesaja 11:​3, 4.) Eye u tara nawa oviṋa ovandu mbi ve tjita, mbi ve ripura, na mbi ve hungira, nomuano mu ve tjinda ovangu ve ovatwirisiwa. (Mat. 12:​36, 37; 25:40) Jesus ma katjiwa kutja oouṋe mba yandja oruvara kovangu ve ovatwirisiwa noviungura vyawo. a Omuano umwe omunanḓengu omundu mu ma yenene okuyandja oruvara kovangu va Kristus, omokuvevatera notjiungura tjokuzuvarisa. Imba mbe yandja oruvara momuano mbwi, Jesus me ve pangura ‘otjovasemba’ nu mave kara nomaundjiro ‘womuinyo waaruhe’ kombanda yehi. (Mat. 25:46; Omavan. 7:​16, 17) Tjiri inga omaundjiro omawa. Indu tji mave kayenda komurungu okurira ovaṱakame moruveze rwondatumisire ondirise na kombunda yanao, owo mave tjiti kutja omana wawo ye kare “membo romuinyo.”—Omavan. 20:15.

5. Matu rihongo tjike okuza kotjisasanekero tjozonḓu nozongombo, nu oouṋe mbu mave yenene okumuna mo ouwa?

⁵ Kareye ovaṱakame. Otjisasanekero tjozonḓu nozongombo Jesus tja ungurisa, tjinene tji yandja ombango ku imba mbe nomaundjiro wokukahupa kombanda yehi. Owo ve raisa ouṱakame wawo mokuvatera ovangu va Kristus motjiungura tjokuzuvarisa, nokukongorera omuhunga auhe mbu mave munu okuza komukarere omuṱakame nomunazondunge, ngwa toororwa i Jesus. (Mat. 24:45) Posi ya, imba mbe nomaundjiro wokukahupa meyuru wina mave hepa okuyandja ombango kerakiza ndi ri motjisasanekero tjozonḓu nozongombo. Omena raye? Mena rokutja Jesus u yandja ombango koviṋa mbi ve tjita, omeripura wawo, noviṋa mbi ve hungira. Owo wina mave sokurira ovaṱakame. Jesus wina wa yandja ovisasanekero vyarwe vivari mbi nomarakiza kovatwirisiwa. Ovisasanekero mbi wina matu vi vaza mu Mateus ekondwa 25. Nambano ngatu katare kotjisasanekero tjovasuko ovanazondunge na imba omayova.

OVASUKO OVANAZONDUNGE NA IMBA OMAYOVA

6. Omomuano uṋe ovasuko vetano mu va raisa kutja ovanazondunge? (Mateus 25:​6-10)

⁶ Motjisasanekero tjovasuko, Jesus wa hungira ohunga novasuko omurongo mba ya okukahakaena ku nomuvareke. (Mat. 25:​1-4) Owo avehe aave zeri okuyenda pu nomuvareke komukandi worukupo rwe. Jesus wa tja vetano vawo va ri “ovanazondunge,” nu varwe vetano va ri “omayova.” Ovasuko imba ovanazondunge ve rirongerisa nu va ri katumba. Owo ve rirongerere okuundja omuvareke, nandarire kutja we ya olata ngurova. Ku nao, owo va twaerera omamunine kutja ve mune monḓorera. Owo nandarire va twaerera omaze warwe womamunine, tjinangara omuvareke wa wombo okuya. Ku nao, owo ve rirongerisa kutja omamunine wawo ye kayende komurungu okuyaka. (Lesa Mateus 25:​6-10.) Indu omuvareke tje ya, ovasuko imba ovanazondunge va ya ku na ye komukandi worukupo. Momuano tjingewo, Ovakriste ovatwirisiwa mba raisa ouṱakame wawo nokukara katumba nga oruveze Jesus ndu me ya, mave pewa otjiyandjewa tjawo tjokuyenda mOuhona womayuru, okukakara pu nOmuvareke Jesus. b (Omavan. 7:​1-3) Hapo tjike novasuko vetano omayova?

7. Hapo kwa tjitwa tjike kovasuko omayova vetano, nu omena raye?

⁷ Ovasuko vetano omayova kave rirongerisire nawa, tjimuna imba vetano ovanazondunge indu omuvareke tje ya. Omamunine  wawo ya ri pookuzema, nu owo kava ri nomaze warwe womamunine. Indu tji va zuva kutja omuvareke we ya, owo va yaruka okukaranda omaze. Indu omuvareke tje ya, owo kapu va ri. Omuvareke tje ya, “ovasuko imba vetano, mba vazewa ave rirongere va hita puna ye komukandi worukupo, nomuvero au patwa.” (Mat. 25:10) Kombunda indu ovasuko imba omayova tji va kotoka, owo va vanga okuhita, posi ya omuvareke we ve raera kutja: “Ami hi mu i.” (Mat. 25:​11, 12) Ovasuko mbo kave rirongerisire okuundja omuvareke otja tjaa pe hepwa. Hapo ovatwirisiwa mave rihongere ko tjike?

8-9. Ovatwirisiwa mave yenene okurihonga tjike okuza kotjisasanekero tjovasuko? (Wina tara kotjiperendero.)

⁸ Kareye katumba a mwe rirongerisa. Jesus ke na pa tja mape kara ovimbumba vivari vyovatwirisiwa, tjimwe tji matji rirongerisa ngandu komaandero wouye mbwi, na tjarwe tji tji hi nokurirongerisa. Nungwari, aa kahurura kutja mape tjitwa tjike indu ovatwirisiwa tji ve he rirongerisire okurira ovaṱakame nga komaandero. Owo tji ve he rirongerisire, kamaave munu ondjambi yawo. (Joh. 14:​3, 4) Indo erakiza enanḓengu tjinene. Kainatja kutja tu nomaundjiro wokukahupa meyuru poo kombanda yehi, eṱe atuhe matu sokuṱakamisa eronga romasasanekero wovasuko. Auhe wetu ma sokukara katumba nokurirongerisa, kutja tu panḓere po nga komaandero.—Mat. 24:13.

⁹ Kombunda yokuhungirira kotjisasanekero tjovasuko okuraisa ounanḓengu wokukara katumba nokurirongerisa, Jesus wa hungirira kotjisasanekero tjovimariva ovisilveri. Otjisasanekero ho tji hungirira kounanḓengu wokuungura oukukutu.

OVIMARIVA OVISILVERI

10. Omomuano uṋe ovakarere vevari mu va raisa ouṱakame? (Mateus 25:​19-23)

¹⁰ Motjisasanekero tjovimariva ovisilveri, Jesus wa hungirira kovakarere vevari mba ri ovaṱakame komuhona wawo, nomukarere umwe ngu ha ri omuṱakame. (Mat. 25:​14-18)  Ovakarere vevari va ri ovaṱakame mokuungurira omuhona wawo ovimariva ovingi. Ngunda omuhona ngo e hi ya toora ouyenda, eye we ve pa ovimariva ovingi ovisilveri. Ovakarere ovaṱakame vevari, va ungura oukukutu nu va ungurisa ovimariva mbyo momuano omuwa. Pa tjitwa tjike? Indu omuhona wawo tja kotoka, owo va tjita ovimariva ovingi pu imbi eye mbye ve pa. Omuhona wawo we ve tanga, nu owo va ‘nyanda puna ye.’ (Lesa Mateus 25:​19-23.) Hapo tjike nomukarere omutjatatu? Hapo eye wa tjita tjike novimariva mbya pewa i yomuhona we?

11. Ovikwaye mbya tjitwa komukarere ‘omunatjirweyo,’ nu omena raye?

¹¹ Omukarere omutjatatu wa pewa ovimariva ovisilveri eyovi rimwe, posi ya eye wa ri ‘notjirweyo.’ Omuhona we aa undjire ko kutja ma ungurisa ovimariva ovisilveri mbyo momuano omuwa. Nungwari, eye wa sotjitoto na horeke mo ovimariva. Indu omuhona tja kotoka, omukarere ngo wa ri novimariva imbi eye mbye mu pa uriri. Omukarere ngo ka raisire ongaro ombwa. Pendje nokuningira ondjesiro komuhona we, omukarere ngo wa tja omuhona we “omurumendu omukukutu.” Omuhona kaari nonyuṋe momukarere ngwi. Kombanda yanao, omuhona we mu yeka ovimariva vyosilveri ne mu ramba po ye.—Mat. 25:​24, 26-30.

12. Ovakarere ovaṱakame vevari ve kuramena po oouṋe ndino?

¹² Ovakarere vevari ovaṱakame, mave kuramene po Ovakriste ovatwirisiwa ovaṱakame. Omuhona wawo Jesus, u ve ṋanga kutja ve ‘hite nu ve nyande puna ye.’ Owo ve muna ondjambi yawo yomeyuru, ndji ri ombendukiro ondenga. (Mat. 25:​21, 23; Omavan. 20:5b) Posi ya otjihorera tjomukarere omunatjirweyo, erakiza kovatwirisiwa. Omomuano uṋe?

13-14. Ovatwirisiwa mave yenene okurihongera ko tjike kotjisasanekero tjovimariva ovisilveri? (Wina tara kotjiperendero.)

¹³ Ungureye oukukutu. Motjisasanekero tjovimariva ovisilveri, tjimuna motjisasanekero tjovasuko, Jesus kaa hunganeke kutja ovatwirisiwa mave karira ovanatjirweyo. Posi ya, eye aa kahurura kutja mape tjitwa tjike tji va pandjara onḓero yawo. Tji va tjiti nao,  owo kave ‘nokuisanewa nokutoororwa,’ nu kave nokuyandjerwa okukahonapara meyuru.—2 Petr. 1:10.

¹⁴ Otjisasanekero tja Jesus ohunga novasuko na ihi tjovimariva ovisilveri, mavi raisa oukahu kutja Ovakriste avehe ovatwirisiwa mave sokurirongerisa nokukara katumba. Nu wina mave sokuungura oukukutu. Hapo Jesus u notjiṋa tjarwe tja hungira okurakiza ovatwirisiwa? Ii, u na tjo. Matu yenene okumuna erakiza Jesus nda hungira kovatwirisiwa mu Mateus 24:​40, 41.

OOUṊE MBU MAVE “TOORWA”?

15-16. Omomuano uṋe Mateus 24:​40, 41 mu i vatera ovatwirisiwa okumuna kutja mave hepa okukara katumba?

¹⁵ Jesus ngunda e hi ya hungirira kovisasanekero vitatu, eye wa kahurura kutja ombanguriro osenina kovatwirisiwa mai raisa kutja oouṋe mba yakurwa. Eye wa hungira ohunga novarumendu vevari mbu mave ungura mehi romakunino, novakazendu vevari mbu mave kweye pamwe ovikokotwa kombako imwe. Motjisasanekero atjihe, owo mave munika tjimuna mave ungura oviṋa vimwe. Posi ya, Jesus wa tja: “Umwe ma toorwa, nomukwao a isiwa.” (Lesa Mateus 24:​40, 41.) Nu okuzambo, eye wa tunduuza ovemukongorere kutja: “Mamu sokukara katumba tjinga amu hi nakutjiwa kutja oMuhona weṋu me ya eyuva riṋe.” (Mat. 24:42) Jesus wina wa hungira otjiṋa tjingetjo kombunda yokuhungira ohunga notjisasanekero tjovasuko. (Mat. 25:13) Hapo eye wa hungira oviṋa mbi mavi i kumwe? Pe munika nao. Ovatwirisiwa ovaṱakame uriri ombu mave “toorwa,” nokuyakurwa i Jesus mOuhona womayuru.—Joh. 14:3.

¹⁶ Kareye katumba. Omutwirisiwa auhe ngu hi nokukara katumba ke nokurira orupa rwaimba ‘ovatoororwa.’ (Mat. 24:31) Nu imba avehe mbe nomaundjiro wokukahupa kombanda yehi nga aruhe, wina mave sokukara katumba nokurira ovaṱakame.

17. Ongwaye tji tu ha sokurikenda indu Jehova tja tye okutwirisa tjiva moruveze ndwi?

¹⁷ Eṱe matu sokutjiwa Jehova nawa, kutja tu kare nongamburiro mombanguriro ye. Eṱe katu rikende indu Jehova tja tye okutwirisa ovakarere ve tjiva ovaṱakame moruveze ndwi. c Eṱe tu zemburuka omambo wa Jesus nga hungira ohunga novaungure mba uta oviungura mondano yomapeta, motjisasanekero tje tjotjikunino tjomivite. (Mat. 20:​1-16) Imba mba uta oviungura eyuva ndo kombunda, va muna otjisuta tjimwe na imba mba uta oviungura komurungu wanao. Kainatja kutja oruṋe ovatwirisiwa tji va toororwa, owo mave munu ondjambi yawo yomeyuru indu tji va kayenda komurungu okurira ovaṱakame.

PURATENA KOMARAKIZA

18-19. Hapo twe rihongo tjike movisasanekero vya Jesus?

¹⁸ Hapo eṱe twe rihongo tjike? Ku imba mbe nomaundjiro wokukahupa nga aruhe kombanda yehi, otjisasanekero tjozonḓu nozongombo tja raisa ounanḓengu ku wo okukayenda komurungu okurira ovaṱakame ku Jehova nai, na moruveze rwondatumisire ondirise ndji mai ya. Moruveze ndwo, Jesus ma pangura imba ovaṱakame otja mba pu okumuna ‘omuinyo waaruhe.’—Mat. 25:46.

¹⁹ Eṱe wina twa hungirire kovisasanekero vivari mbya yandja omarakiza kovatwirisiwa. Motjisasanekero tja Jesus tjovasuko omayova na imba ovanazondunge, imba vetano omba raisa kutja ve nozondunge. Owo ve rirongerere nu va ri katumba okuundja omuvareke,  kainatja kutja wa toora orure ndu ṱa pi. Posi ya ovasuko imba omayova kave rirongerisire. Ku nao omuvareke ke ve yandjerere okuhita momukandi worukupo rwe. Eṱe wina matu sokurirongera okuundja, nandarire kutja pa kambura orure ku Jesus okueta omaandero kouye mbwi. Wina, motjisasanekero tja Jesus tjovimariva ovisilveri, eṱe twe rihongo ohunga novakarere vevari ovaṱakame mbaave ungura oukukutu. Owo va ungurira omuhona wawo oukukutu, nu eye wa ri nonyuṋe mu wo. Posi ya, omukarere omunatjirweyo wa nakaurwa. Matu rihongo tjike? Eṱe matu sokukayenda komurungu okuungura oukukutu motjiungura tja Jehova nga komaandero. Nu korusenina, eṱe twe rihongo kutja ovatwirisiwa mave sokukayenda komurungu okukara katumba kutja ve ‘toorwe’ i Jesus okukamuna ondjambi yawo yomeyuru. Owo nonḓero ve undja oruveze indu Jesus tji me ve ‘woronganisa’ pamwe meyuru. Kombunda yovita vya Armagedon, owo mave rire omuvarekwa wa Jesus morukupo rwOndjona.—2 Tes. 2:1; Omavan. 19:9.

20. Jehova ma katjita tjike ku imba mbe puratena komarakiza we?

²⁰ Oruveze Jesus ndu ma pangura ovandu ru ri popezu, posi ya eṱe katu nokuhepa okutira. Indu tji twa kayenda komurungu okurira ovaṱakame, Tate wetu worusuvero womeyuru me tu pe “omasa nge kapita avihe” kutja eṱe tu “hare omasa okutuurunga . . . nokukurama komurungu wOmuna wOmundu.” (2 Kor. 4:7; Luk. 21:36) Eṱe matu yorokisa Tate wetu, indu tji twa puratene komarakiza nge ri movisasanekero Jesus mbya ungurisa, nandarire kutja omaundjiro wetu owo ku kahupa meyuru poo kombanda yehi. Nu mena rokutja Jehova u notjari tjinene, omana wetu maye “tjangwa” membo romuinyo.—Dan. 12:1; Omavan. 3:5.