OMUKANDJIRA wena Sylviana, wotjiwondo tjozombura 20 notjihupe wa tja: “Indu tjee zuu ohunga nondjoroka omapanga wandje mbe karera kotuveze ku ku nouhepe wovakandjira ndji va ri na yo, ami wina ee zeri okukara nondjoroka ndjo.” Eye komurungu wa tja: “Ami ee munu kutja okukavatera ku ku nouhepe katjiṋa tji me yenene okutjita.”

Hapo ove wina u noumune tjimuna owa Sylviana? U nonḓero yokukazuvarisa kotuveze ku ku nouhepe wovazuvarise, nu u muna kutja komoo yenene? Indu tji pe ri nao, o rihahiza! Nombatero ya Jehova, ovakambure ovengi va yenena okutuurunga ovipwite mbyaa vi ve tjaere okuneneparisa otjiungura tjawo tjokuzuvarisa. Okutara kutja Jehova we ve vatera vi, matu kavarura okakoverwahi kena Madagascar.

Mozombura 10 nḓa kapita, ovazuvarise omapatje vokombanda 70 novakandjira okuza komahi 11 * va tjindira kehi ra Afrika ndi, mumu novandu ovengi mbe raisa ondengero kOmbeibela. Ovazuvarise ovengi wina va ri nonḓero yokutjindira kokakoverwahi nga, kutja ve kavatere okuhandjaura ombuze yOuhona. Indjo tu rihonge ohunga na tjiva vawo.

Louis na Perrine, ovakupasane votjiwondo tjozombura 30 notjihupe, nu mba tjindira koMadagascar okuza koFrance. Oure wozombura ozengi owo aave ripurire kokutjindira komahi warwe kutja ve kavatere notjiungura tjokuzuvarisa, posi yokutja Perrine aa keyakeya. Eye wa tja: “Ami ee tira okuyenda koṋa ku mbi hina okutjiwa. Ee rikende ohunga nokuisa omaṱunḓu wetu kongotwe, ombongo, nondjuwo yetu, notuveze tu twa iririra, noviṋa mbi twa iririra okutjita. Okuhungira ouatjiri, ozongendo zandje onḓaa ri otjipwite otjinenenene tjee sokutuurunga.” Mombura ndji 2012, Perrine wa vanḓipara nu eye na Louis va tjinda. Nu hapo eye u noumune uṋe ohunga nondando yawo ndji? Eye wa tja: “Tji me ripurire ko nai, me yenene okutja tjiri otjiṋa otjiyanḓiparise okumuna omuano Jehova mbwe tu vatera.” Louis wa tja: “Ovandu 10 mbaatu rihongo pamwe Ombeibela, va ri pOmariro Omayapuke omatenga ngu twa kara po moMadagascar!”

Otjikeṋa tji tja yanḓiparisa Louis na Perrine kutja ve kayende komurungu notjiungura tjawo, indu tji va muna  ouzeu? Owo ve riyarikaṋa ku Jehova mongumbiro kutja me ve pe omasa wokupanḓera po. (Fil. 4:13) Louis wa tja: “Twa muna omuano Jehova ma zira ozongumbiro zetu, ne tu pe ‘ohange ye.’ Eṱe twa yenena okuyandja ombango kondjoroka ndjaa tu munu motjiungura tjetu. Omapanga wetu okuza koFrance wina aave tu hindire ozoimeila notutuu okutupa omasa wokupanḓera po.”—Fil. 4:6, 7; 2 Kor. 4:7.

Jehova tjiri wa sera Louis na Perrine ondaya mena rokutja va panḓera po. Louis wa tja: “Mu Oktoba 2014, eṱe twa ya kOskole yOmbeibela yOvakriste Ovakupasane * moFrance. Okuyenda koskole ndjo, tjiri tja ri otjiyandjewa okuza ku Jehova tji u hina moo zembi ko.” Indu ovakupasane mba tji va mana omahongero wawo, owo va ri nondjoroka kutja va hindwa koMadagascar rukwao.

Indu ovakupasane vomana Didier na Nadine, mba za koFrance, tji va tjindira koMadagascar mombura ndji 2010, owo va ri ovandu votjiwondo tjozombura 50 notjihupe. Didier wa tja: “Eṱe twa ri ovakandjira tji twa ri omitanda, nu okuzambo aa tu sokukurisa ovanatje vetu 3. Owo tji va rira ovanene, eṱe twe ripurira kokukazuvarisa komahi warwe.” Nadine wa tja: “Omeripura wokutja matu kakara kokure novanatje vetu, aaye tjiti kutja mbi keyakeye. Posi yokutja owo ve tu raera kutja, ‘Tji mwa tjindire kehi rarwe okukavatera ku ku nouhepe, eṱe matu kara nonyuṋe!’ Omambo wawo nga ye tu pa omasa wokutjinda. Nandarire kutja nai tu kara kokure novanatje vetu, tu tjaterwa kutja tu yenena okuhungira kuna wo aruhe.”

Ya ri ouzeu ku Didier na Nadine, okurihonga eraka rOtjimalagasy. Nadine wa tja nai ama meṱameṱa: “Kaweṱe ovandu vozombura 20 rukwao.” Nu hapo owo va muna vi ondoṋeno? Owo rutenga aave i kombongo yeraka rOtjifransose. Kombunda tji va ri noruveze rokurihonga Otjimalagasy, owo va tjindira kombongo yeraka ndo. Nadine wa tja: “Ovandu ovengi mbu tu hakaena motjiungura tjokuzuvarisa ve tjaterwa okurihonga Ombeibela. Nu potuingi ve tja okuhepa kweṱe tji twe yekuvevarura. Pomautiro ee nangarasi ngahino me roto. Tjiri mbi tjaterwa okuzuvarisa momaturiro nga. Tji mba penduka omuhuka omunene, mbi rihungirira omuini kutja, ‘Tjiri me tjaterwa kutja ndino me kazuvarisa!’”

Didier u meṱameṱa indu tji me ripurire koruveze tja uta okurihonga Otjimalagasy. Eye wa tja: “Ami ee kayendisa ombongarero yombongo, posi yokutja hee zuu nawa omaziriro ngamwa aehe nga yandjwa i ovakambure ovakwetu mombongo. Otjiṋa tjee yenene okuhungira ya ri okutja, ‘Okuhepa’ uriri. Otjikando tjimwe tji mba za nokutja okuhepa komukazendu omukambure ngwa yandja eziriro re, imba mba haamene kongotwe ye va uta okutaka oviuru vyawo otjomuano wokundjiraisira kutja eziriro nda yandjwa kandi ri ro. Nu tjimanga mba ningira omurumendu omukambure ma yandje eziriro re, ndi me zeri kutja ra ri eziriro esemba.”

Thierry nomukazendu we Nadia, va tarera enyando nda ri nepu ndi “Pursue Goals That Honor God,” pomaworonganeno omanene wombura ndji 2005. Enyando  rOmbeibela ndo ohunga na Timoteus, tjiri re ve ṱuna tjinene momiinyo, nu re kurisa onḓero yawo yokukavatera kotuveze ku ku nouhepe wovazuvarise vOuhona. Thierry wa tja: “Komaandero wenyando ndo ngunda amatu tono omake, ami mbe ri petera komukazendu wandje nemu pura kutja, ‘Matu i pi?’ Omukazendu wandje wa tja eye wina ee ripurire kotjiṋa otjingetjo.” Tjimanga okuzambo, owo va uta okurirongerisa kutja ve yenenise ondando yawo ndji. Nadia wa tja: “Kouṱiṱiṱiṱi, eṱe twa uta okuhendurura oviṋa vyetu mbi twa ri na vyo, nga avihe mbi twa serwe na vyo tjaa vi yenene mozokofa 4 uriri!”

Owo va vaza moMadagascar mombura ndji 2006, nu okuza komautiro va ri nondjoroka motjiungura tjawo tjokuzuvarisa. Nadia wa tja: “Ovandu mbu tu hakaena, tjiri ve tu pa enyando enene.”

Nungwari ozombura 6 kombunda yanao, ovakupasane mba va munine ouzeu. Ina ya Nadia wena Marie-Madeleine, ngwaa kara moFrance, wa wa, a teka okuwoko na hihamwa otjiuru. Ovakupasane mba tji va za nokuhungira ku nonganga ya Marie-Madeleine, owo ve mu ningira kutja me yekukara puna wo moMadagascar. Nandarire kutja eye wa ri notjiwondo tjozombura 80 oruveze ndo, eye wa yakura omaningiriro ngo nenyando. Nu hapo eye u muna ko vi okukara mehi rarwe? Marie-Madeleine wa tja: “Povikando tjiva kurira ouzeu okuiririra, nungwari nangarire kutja pe noviṋa tjiva mbi mbi ha yenene okuungura nawa, mbi muna kutja mbi nombatero ndji mbi yandja kombongo. Nu otjiṋa tji tji ndji pa ondjoroka yatjiri, okutjiwa kutja ondyero ndji i vatera ovanatje vandje okukayenda komurungu motjiungura tjawo tjokuzuvarisa.”

Omurumendu omukambure wena Riana, wotjiwondo tjozombura 20 notjihupe, we kurira moAlaotra Mangoro, momaturiro omawa nge ri koutjiro wa Madagascar. Eye wa ungura nawa moskole nu aa vanga okukerihonga komurungu. Posi yokutja tja za nokurihonga Ombeibela, eye wa rundurura oumune we. Eye wa tja: “Ami mba kondjisa okumana oskole yandje rukuru nu mba kwizikira Jehova kutja, ‘Tji mba tuurunga omarorero wandje inga omasenina, me utu okukukarera otjomukandjira.’” Indu Riana tja mana omahongero we, eye wa tjita otja pa heya. Eye wa tjindira poyomurumendu omukandjira, a munu oviungura mbyaa ungura omayuva tjiva, na utu okukarera otjomukandjira. Eye wa tja: “Indji tjiri ya ri ondando osemba ndji mba tjita.”

Nungwari, ovazamumwe va Riana va himinwe kutja ongwaye tje ha pahere oviungura ovisemba. Eye wa tja: “Tate, nomuangu wa tate, nomuangu wa ina ya tate, avehe ve ndji tunduuza kutja mbi pahe omahongero wokombanda. Posi yokutja ami hee vanga okuisa okukarera otjomukandjira.” Kombunda yokaruveze okaṱiṱi, Riana aa vanga okukavatera koṋa ku ku nouhepe tjinene. Otjikwaye tji tja tjita kutja ma kare nonḓero ndjo? Eye wa tja: “Omarunga ya teya ondjuwo yetu paa tu kara naye vaka oviṋa vyandje ovingi. Omavakero woviṋa vyetu nga, ya tjita kutja mbi ripurire komambo wa Jesus ohunga ‘nokurinyanyangiza outumbe meyuru.’ Ami mba tya kutja me ungura oukukutu kutja mbi ripahere outumbe mbu za ku Mukuru.” (Mat. 6:19, 20) Eye wa tjindira kuṱa komamuho wehi, komaturiro nga ṱourumbu nge ri ozokilometa 1 300 okuza kaa kara. Momaturiro ngo mu kara ovandu mbe tjiukwa otjOvaantandroy. Nu hapo ongwaye tja ya ngo?

Omueze umwe komurungu womavakero woviṋa vyawo, Riana wa uta okurihonga Ombeibela ku novarumendu vevari Ovaantandroy. Eye we rihonga omambo tjiva meraka ndo, nu ee ripurire kovandu ovengi ovahungire veraka ndo mbe ha zuva ombuze yOuhona ngunda. Eye wa tja: “Mba kumba ku Jehova kutja me ndji vatere okutjindira komaturiro wovandu mbe hungira Otjitandroy.”

Riana wa tjinda, nu tjimanga tja za nokutjinda wa muna ouzeu. Eye kaa yenene okumuna oviungura. Omurumendu umwe we mu pura kutja, “Ongwaye tji we ya ngwi? Ovandu ovengi muno tji mave paha oviungura ve yenda ku wa zu!” Kombunda yovivike vivari, Riana wa ya komaworonganeno omanene, e hina ovimariva ovingi mbya sewa na vyo, nu ame rikende kutja ma tjiti vi. Meyuva esenina romaworonganeno omanene, omurumendu umwe omukambure wa hezisira otjiṋa mondjaṱu ya Riana yombaikiha. Vya ri ovimariva mbya yenene okuyaruka komaturiro wOvaantandroy nokuuta okangetjefa okaṱiṱi kokurandisa oyokata. Riana wa tja: “Ami mba muna ombatero okuza ku Jehova, moruveze ndwee hepa ombatero ye tjiri. Ami mba yenena okuvatera imba mbe ha rora okumuna oruveze rwokurihonga ohunga na Jehova!” Nu mombongo wina mwa ri noviungura ovingi. Riana komurungu wa tja: “Ami mba ningirwa  okuyandja ehungi otjivike atjihe otjitjavari. Jehova ee ndji hongo okupitira motjira tje.” Kundino, Riana ngamba u zuvarisa ombuze yOuhona kovandu ovengi mbe hungira Otjitandroy, mbe vanga okurihonga ohunga na Jehova.

Jehova we tu kwizikira kutja, “auhe mehi ngu ma ningire ondaya, ma ningire okuserwa ondaya i Ndjambi Omuṱakame.” (Jes. 65:16) Indu tji matu tjiti ozongondjero zomasa okuryamisa otjiungura tjetu tjokuzuvarisa komurungu, Jehova u tu sera ondaya. Ripura ohunga na Sylviana, ngwa tamunwa pomautiro worupa ndwi. Zemburuka kutja eye aa munu kutja kamaa yenene okukavatera koṋa ku ku nouhepe. Nu hapo ongwaye tjaa munu nao? Eye omuini wa kahurura na tja: “Okurama kwandje kwomamuho okusupi pu ingwi kwomanene nozosentimeta 9. Okutja mbi ṱenḓuna tji me kayenda nu otji mbi urwa tjimanga.”

Posi yokutja, mombura ndji 2014, Sylviana nomukazendu omukandjira omutanda ngwa ri mombongo maa ri, wena Sylvie Ann, va tya okutjindira kokarongo ku ka ri ozokilometa 85 okuza kotjihuro mu va ri. Nakombanda yomauzeu omengi, onḓero ya Sylviana ya yenenisiwa, neye wa muna ondaya ohimise! Eye wa tja: “Kombunda yombura imwe uriri motjiungura tjandje otjipe, omukazendu omutanda wena Doratine ngwee hongo Ombeibela, wa papitisiwa pomaworonganeno wetu worukondwa.”

Otja tji matu munu komuano ovavatere mba mu va raisa ongamburiro yawo, tji twa kondjo okutuurunga ovipwite ngamwa avihe kutja tu neneparise otjiungura tjetu tjokuzuvarisa, tu rimunina oveni ouatjiri womakwizikiro wa Jehova nge tja: “Me ku zeuparisa, nu me ku vatere.” (Jes. 41:10) Nu ihi tji tjita kutja oupanga wetu kuna Jehova u kure. Nu wina tji matu riyandjere oveni okuvatera mehi mu tu kara poo mehi rarwe, ku tu rongerisa nawa kutja tu yenene okukaungura oviungura Jehova mbi me ketupa mouye oupe. Otja Didier ngwa tamunwa rukuru tja heya, “okukarera koṋa ku ku nouhepe, omahongero omawa koruyaveze!” Matu zeri kutja ovaungure ovengi overiyandjere wina mave utu nomahongero nga tjimanga!