MORUVEZE rwOmbeibela, omurumendu poo omuhoko we aa sutu ovitunya komuhoko womukazendu indu omihoko aviyevari tji vya zuvasana. Ovitunya aavi kamburire mo oviṋa mbi nonḓengu tjimuna ovimariva poo ovinamuinyo. Movikando tjiva, ovitunya aavi sutwa mokuungurira omuhoko womukazendu, tjimuna Jakob ngwa zuvasana ku na ihe ya Rahel okumuungurira oure wozombura hambombari kutja ma yenene okukupa Rahel. (Gen. 29:17, 18, 20) Hapo ondando yokusuta ovitunya ya ri oyatjike?

Omukonḓonone umwe wOmbeibela wena Carol Meyers wa tja: “Ovitunya aavi sutwa komuhoko womukazendu ngu ma kupwa koviungura omuatje omukazona mbya tja ungura okuvatera omuhoko we, mbya ri ovinanḓengu komaṱunḓu ngaaye hupu motutumbo novikunwa.” Okusuta ovitunya wina wa ri omuano wokupamisa oupanga pokati komihoko vivari mbi mbya wanekwa i yorukupo rwovanatje vawo. Oupanga pokati komaṱunḓu ngo aau hee kutja owo mave yenene okuvaterasana moruveze rwouzeu. Nu kombanda ya nao, okusuta ovitunya aaku raisa kutja omukazendu wa varekwa, nu ke ri kehi yondjeverero ya ihe rukwao posi ya ma utu okutumbwa i yomurumendu we.

Okusuta ovitunya kaku hee kutja omukazendu ngu ma kupwa otjiṋa tji mo yenene okuranda poo okurandisa. Embo ndi Ancient Israel—Its Life and Institutions ri tja: “Otjimariva poo otjiṋa tjonḓengu otja indjo, mbi yandjwa keṱunḓu romukazendu ngu ma kupwa aatji tjiti kutja orukupo rwOvaisrael ru munike tjimuna mo randa omukazendu. Nungwari aape munika kutja ovitunya aavi varwa otjondjambi ndjaai yandjwa keṱunḓu romukupwa nu katjisuta komukazendu ngu ma kupwa.”

Ndino momahi tjiva, ovandu ve kayenda komurungu okukongorera ombazu yokusuta ovitunya. Indu ovanene Ovakriste tji mave ningire ovitunya owo ve sokutjita kutja ‘oupore wawo u munike kovandu avehe’ mokuhina okuningira otjisuta tjokombanda tjinene. (Fil. 4:5; 1 Kor. 10:32, 33) Momuano mbo mave raisa kutja ‘kamakorokope’ poo kave nomunenetima. (2 Tim. 3:2) Wina, ovanene Ovakriste tji ve hi nakuningira ondjambi yokombanda, omukupe kamaa kara kehi yoṋiṋikizire okuyarura orukupo ombunda ngandu tja munu ovimariva mbya yenene okusuta ovitunya. Poo omukupe kamaa kara kehi yoṋiṋikizire okuisa oukandjira kokutja ma ungure oruveze aruhe okumuna ovimariva mbya yenene okusuta ovitunya.

Motupa tjiva mouye, ovitunya vi sutwa otja koveta yehi. Ndoovazu pe ri nao, ovanene Ovakriste mave sokukara nonḓuviro kozoveta nḓo. Omena raye? Embo ra Mukuru ri undjira ko Ovakriste kutja ve “riwise kehi youhonapare” nokukara nonḓuviro kozoveta nḓe hi nakupirukira omatwako wa Mukuru.—Rom. 13:1; Oviung. 5:29.