1. Ongwaye ombapitisimo tje ri omukambo omunanḓengu okutoora? (Tara kotjiperendero pomautiro worupa ndwi.)

OMBURA aihe ovandu ovengi mbe rihonga Ombeibela, ve papitisiwa. Otjingi tjawo, omitanda poo owomba ovaṱiṱi. Tjiva vawo mape ya ve kurira mouatjiri. Hapo oove umwe wawo? Tji u ri umwe wawo, tjiri wa tjita otjiṋa otjiwa. Omukriste auhe ma sokupapitisiwa kutja ma mune ondjamo nu ma kahupe nga aruhe.—Mat. 28:19, 20; 1 Petr. 3:21.

2. Ongwaye tji u ha sokutira okupapitisiwa?

² Indu tji wa papitisiwa, u muna ozondaya ozengi okuza ku Jehova momiano omingi pekepeke, nu wina u kara nomerizirira omape. Omomuano uṋe? Eyuva ndi wa papitisiwa, ove wa tja ii kepuriro ndi: “Okuzikamena kombunguhiro ya Jesus Kristus, ove we ritanaura komauvi woye nu we riyandja omuini ku Jehova okutjita ombango ye?” Ombapitisimo yoye i raisa kutja ove we riyandja ku Jehova. Oyo omakwizikiro ngu wa tjita ku Jehova kutja mo mu suvere nu mo tjiti ombango ye kombanda yoviṋa vyarwe. Nu hapo mo  sokuhihamwa omutima tji wa tjita omakwizikiro nga? Kako! Ove komoororo okuhihamwa omutima indu tji wa yandjere Jehova okukuhongorera po mehupo roye. Ovandu mbe ha hupu otja komirari vya Jehova, ve ri kehi yomananeno wa Satan. Satan tjiri ke nonḓero kutja u yamwe. Nu tjiri eye ma kara nohange indu ove tji wa pandjara omaundjiro woye wokuhupa nga aruhe, mena rokutja ove wa toorora munda we, nu wa pirukire ousemba wa Jehova womananeno.

3. Ozondaya zeṋe nḓe za mokuriyandja omuini ku Jehova?

³ Ripura ohunga nokutja Jehova we ku sera vi ondaya, mena rokutja we riyandja omuini ku ye nopapitisiwa. Tji we riyandja ku Jehova, ove mo yenene okuhungira nouvanḓe kutja, “Muhona u ri puna ami, nu hi nokutira; omundu me ndji tjiti tjike?” (Eps. 118:6) Kape notjiṋa otjinanḓengu pendje nokukara munda wa Mukuru nokutjiwa kutja eye u tjaterwa i ove.

4, 5. (a) Omomuano uṋe omeriyandjerero woye tji ye ri omerizirira woye omuini? (b) Omarorero yeṋe Ovakriste avehe ngu ve muna?

⁴ Oupanga woye na Jehova katjiṋa ovanene voye tji mave yenene okukuzirira po. Nandarire kutja, ngunda u kara pu novanene voye, oupanga woye kuna Jehova omerizirira woye omuini. Ongwaye tje ri otjiṋa otjinanḓengu okuzemburuka otjiṋa ho? Kapena umwe wetu ngu ma tjiwa kutja ongamburiro ye ma i rorwa vi moruyaveze. Otjotjihorera, indu tji wa papitisiwa ngunda au ri omuṱiṱi, mape ya ohara oumune nomauzeu warwe tji wa rire omutanda. Omuatje omukazona omutanda wa tja: “Omuatje omuṱiṱi kamaa pindike kutja eye Omuhongonone wa Jehova, mena rokuhina okurya otjikuki tjongwatero poskole. Posi yokutja kombunda ozonḓuma zokutjita orukatuko tji maze harere ko omasa, omutanda auhe u hepa okukara nongamburiro kutja okukara nonḓuviro komatwako wa Jehova otjiṋa otjisemba aruhe.”

⁵ Kamitanda aviyerike mbi kara nomarorero omape. Nangarire imba mbe papitisiwa ave ri ovanene, ve muna omarorero mongamburiro yawo ngu ve ha undjire ko. Omarorero nga ye kamburira mo orukupo, ouveruke, poo oviungura. Nangarire kutja oweṱe ovanene poo ovaṱiṱi, atuhe matu sokurira ovaṱakame ku Jehova moviṋa ovingi pekepeke.—Jak. 1:12-14.

6. (a) Omomuano uṋe omeriyandjerero woye ku Jehova mu ye ha rekareka koviṋa poo kovandu varwe? (b) Mo rihongere ko tjike ketjangwa rOvafilipi 4:11-13?

⁶ Otjiṋa tji matji ku vatere kutja u rire omuṱakame mozongaro pekepeke, okuzemburuka kutja omakwizikiro woye ku Jehova kaye rekareka koviṋa poo kovandu varwe. Ihi matji hee kutja ove wa kwizikira ingwi wOkombandambanda, kutja mo mu karere nandarire kutja omapanga woye poo ovanene voye va isa okumukarera. (Eps. 27:10) Mozongaro azehe nḓa, kumba ku Jehova kutja me ku vatere okuṱiza omakwizikiro ngu wa tjita ku ye.—Lesa Ovafilipi 4:11-13.

7. Ku heya tjike okuungurira ondjamo yoye omuini “nondira ku Mukuru”?

⁷ Jehova u vanga kutja u rire epanga re. Posi yokutja okuṱiza oupanga mbwi nokukayenda komurungu okuungurira ondjamo yoye, ku hepa ozongondjero. Ovafilipi 2:12 ri tja: “Kareye pokuungurira ondjamo yeṋu amu nondjozikiro nondira ku Ndjambi.” Omambo nga maye hee kutja mo sokukurisa oupanga woye kuna Jehova, nokuṱakama mu ye, nandarire kehi yomatokero ngamwa aehe. Posi yokutja o munu kutja mo yenenisa oviṋa mbi avihe erike. Zemburuka kutja nandarire ovakarere va Jehova tjiva mbe mu karera ozombura ozengi, kombunda va isa okuṱakama ku ye. Nu hapo ovikwaye mbi mavi yenene okukuvatera kutja u ungurire ondjamo yoye omuini?

8. Omakonḓononeno woye omuini wOmbeibela ye kamburira mo ye, nu ongwaye tji ye ri omananḓengu?

⁸ Oupanga woye kuna Jehova u kamburira mo oviṋa vivari mbi, okupuratena nokuhungira. Omakonḓononeno woye omuini wOmbeibela oomuano umwe omusemba mu mo yenene okupuratena ku Jehova. Imbi vi kamburira mo okulesa Embo ra Mukuru nomambo nga zikamena kOmbeibela nokuripurira ko oukoto. Otja tji mo tjiti nao, tjiwa kutja okukonḓonona Ombeibela kaku hee okuṱiza oviṋa mbi we rihongo motjiuru uriri. Nu kaku hee okurihonga tjimuna uri moskole nu mo vanga okupasa omarorero. Posi yokutja okukara nomakonḓononeno omawa wOmbeibela ku ri tjimuna uri mouyenda ouwa nu mo yende a momunu oviṋa ovipe ohunga na Jehova. Okutjita nai maku ku vatere okuya popezu na Jehova neye wina ma yenene okuya popezu na ove.—Jak. 4:8.

9. Oviungurisiwa viṋe mbye ku vatera momerihongero woye omuini wOmbeibela?

⁹ Otjira tja Jehova tja pitisa oviungurisiwa ovingi okukuvatera kutja u kare nomakonḓononeno omawa wOmbeibela. Okutara kotjihorera, orupa ndwi “Bible Study Activities,” ndu ri kehi yorupa ndwi “Teenagers” morungovi ndwi o-jw.org, maru yenene okukuvatera kutja u ṱakamise oviṋa mbi mo rihongo momahungi wOmbeibela. Wina mo-jw.org muna okambo nga “Ombeibela tjiri i honga tjike?,” ku make ku vatere okukurisa ongamburiro yoye, nokukahururira varwe ongamburiro yoye. Mokambo nga o-Awake! ka April 2009 kehi yorupa ndwi “Young People Ask . . . How Can I Make Bible Reading Enjoyable?” mo yenene okumuna omapu warwe ngu maye ku vatere momakonḓononeno woye omuini wOmbeibela. Okurihonga nokuripurira ko oukoto, maku ku vatere okuungurira ondjamo yoye.—Lesa Epsalme 119:105.

10. Ongwaye Omukriste auhe tje hepa okukumba?

¹⁰ Tji matu tjiti omakonḓononeno wetu oveni wOmbeibela tu puratena ku Jehova, nu tji matu kumbu tu hungira kuna ye. Omukriste ka sokumuna kutja ongumbiro otjiṋa tji ma sokutjita uriri, poo okumuna kutja tja tjiti nao maku mu etere ouṋingandu. Posi yokutja ongumbiro omahakaeneno wetu ku nOmuute wetu. Jehova u vanga kutja u hungire kuna ye. (Lesa Ovafilipi 4:6.) Indu tji u ri momauzeu Ombeibela i ku ṋanga kutja “omerikendero woye ye  esa na Muhona.” (Eps. 55:22) Pe novakambure ovakweṋu ovengi mbu mave yenene okukuraera kutja okukara noumune mbwi kwa yenena okuvevatera. Nu wina maku ku vatere!

11. Ongwaye aruhe tji mo sokutja okuhepa ku Jehova?

¹¹ Posi yokutja katu sokukumba uriri indu tji matu vanga ombatero okuza ku Jehova. Ombeibela i tja: “Nopu mamu sokutjera okuhepa!” (Kol. 3:15) Povikando tjiva tu rikenda tjinene nomauzeu wetu, natu zembi oviṋa oviwa mbi tu na vyo. Ongwaye tji u hina okutwapo kutja eyuva arihe mo ripurire koviṋa vitatu mbi u nondangi na vyo, nu okuzambo otja okuhepa ku Jehova ohunga na vyo? Omutanda umwe wena Abigail, ngwa papitisiwa nozombura 12 wa tja: “Ami mbi muna kutja Jehova u hepa okutangwa kombanda yovandu varwe mouye auhe. Matu sokutja okuhepa ku ye oruveze aruhe koviyandjewa mbye tupa. Eyuva rimwe mba zuva omazemburukisiro omawa wokutja: Indu Jehova tje tu pe oviṋa mbi twa tjere ndangi porwavyo, hapo matu sewa natjike?” *

12, 13. Ongwaye tje ri otjiṋa otjinanḓengu okuripura ohunga nomuano Jehova mbwe ku vatera?

¹² Jehova wa vatera Ombara David okutjinda omauzeu omengi. Nu tja za momauzeu nga, eye wa tja: “Roreye nu mu rimunine ouwa wa Muhona; omuṋingandu omundu ngu paha ondjamo ku Ye.” (Eps. 34:8) Ezeva ndi ma ri tu raisire ounanḓengu wokurirorera oveni ouwa wa Jehova. Indu tji mo lese Ombeibela nomambo nga zikamena ku yo, natji mo kara pozombongarero zombongo, u muna omayanḓiparisiro wokutja Mukuru wa vatera vi ovakarere ve okurira ovaṱakame. Posi yokutja otja tji mo kurisa ongamburiro yoye, u hepa okumuna kutja Jehova u ku vatera vi mehupo roye omuini. Hapo ove wa rora vi ouwa wa Jehova?

¹³ Pe nomuano umwe Ovakriste avehe mu va rora ouwa wa Jehova. Omokuṋangwa kutja tu ye popezu na Mukuru nOmuna we. Jesus wa tja: “Kape nomundu ngu ma sora okuya ku Ami tje ha nanenwe i Tate ngwe Ndji hinda.” (Joh. 6:44) Hapo u muna kutja omambo nga wina ye notjiṋa na ove? Omutanda mape ya a munu kutja, ‘Jehova ongwa nanena ovanene vandje ku ye nu ami mba kongorera uriri.’ Posi yokutja ove tji we riyandja omuini ku Jehova nopapitisiwa, wa raisa kutja wa rire epanga re. Jehova nai tjiri me ku tjiwa nawa. Ombeibela i tu raera kutja: “Omundu ngwa suvera Ndjambi eye u tjiukwa i Ndjambi.” (1 Kor. 8:3) Aruhe kondja okuvara oviungura vyoye motjira tja Jehova otjotjiṋa otjinanḓengu.

14, 15. Otjiungura tjokuzuvarisa matji ku vatere vi okukurisa ongamburiro yoye?

¹⁴ Omuano warwe mu mo yenene okurora ouwa wa Jehova, omokuyandjera kutja me ku vatere otja tji mo haṋasana ongamburiro yoye kuna varwe. Mo yenene okutjita nai motjiungura tjokuzuvarisa, noposkole wina. Tjiva ve muna ouzeu okuzuvarisa kovanatje ovakwao poskole. Mape ya mo tjiwa kutja omena raye. Mena rokutja ko nokutjiwa kutja mave ritjindi momuano uṋe. Mape ya a rire ouzeu tji mo hungire novandu ovengi pendje na indu tji mo hungire nomuatje auhe kourike we poskole. Otjikwaye tji matji ku vatere?

¹⁵ Rutenga, ripura kutja ongwaye tji u muna kutja mbi u kambura mo ouatjiri. Morungovi ndwi o-jw.org, mu noviṋa mbi vatera momakonḓononeno meraka roye? Tji u hina okutjiwa, twapo oruveze okutara kutja omu vi ri poo indee. Ovyo vya ungurwa kutja vi ku vatere okumuna kutja u kambura mu ye, nu ongwaye tji u nongamburiro ndjo, nokutja mo kahururire vi varwe ongamburiro yoye. Indu ongamburiro  yoye tji i nomasa, natji we rirongerisa nawa, ove mo kara nonḓero yokuzuvarisa ohunga na Jehova.—Jer. 20:8, 9.

16. Ovikwaye mbi mape ya avi ku vatere okuhina okukara nemuma rokuhingira kuna varwe ohunga nongamburiro yoye?

¹⁶ Nangarire kutja we rirongerisa nawa, mape ya okara nemuma okuhungira ohunga nongamburiro yoye. Omuatje omukazona wozombura 18, ngwa papitisiwa tja ri nozombura 13, wa tja: “Me tjiwa kutja mbi kambura mu ye, posi yokutja oruveze rumwe mbi kara nouzeu okukahururira varwe ohunga nongamburiro yandje.” Hapo eye wa tjita vi? Eye wa tja: “Ami mbi kondja okuhungira ohunga nouatjiri momuano omukahu poo omupupu. Ovanatje poskole ve hungira noupaturuke ohunga noviṋa mbi ve tjita. Ami wina me sokukara noupaturuke wokuhungira tjimuna wo. Okutja ngunda amatu hungire ohunga notjiṋa tjorive rumwe mbi tja, ‘Eyuva rimwe mba ri ame hongo Ombeibela, nu . . . ’ Okuzambo e kayenda komurungu nehungi randje. Nandarire kutja katu nokuhungirira kOmbeibela, popengi varwe ve vanga okutjiwa kutja mbi tjita vi tji me hongo ovandu Ombeibela. Povikando tjiva ve pura omapuriro ohunga nOmbeibela. Otja pu me utu ehungi randje momuano mbwi, opu mbi harera ko ongamburiro mu ami omuini. Okuzambo mbi kara nondjoroka!”

17. Oumune woye ohunga nongamburiro yoye mau ku vatere vi okuhungira kuna varwe?

¹⁷ Indu varwe tji mave munu kutja u raisa ondengero nokuripurira ku wo, ku rira oupupu ku wo okukutenga nokutenga ongamburiro yoye. Omuatje omukazona wena Olivia ngu nozombura 17, nu ngwa papitisiwa ngunda eri omuṱiṱi wa tja: “Ami aruhe ee tira kutja tji mba hungire ohunga nOmbeibela ngunda amatu serekarere, ovandu mave ndji vara kutja owami omuhonge.” Okuzambo wa hara oumune warwe. Moruveze rwokuyandja ombango tjinene kemuma ndaa ri na ro, Olivia wa tja: “Omitanda omingi kavi tjiwa otjiṋa ohunga nOvahongonone va Jehova. Owo ve tjiwa eṱe uriri. Kunao, omuano mbu matu ritjindi mape ya au ṱunu komuano mbu mave yakura ouatjiri. Indu tji tu nohoṋi poo tji tu muna ko ouzeu okuhungira ohunga nongamburiro yetu kuna varwe, maku raisa tjike? Owo mape ya ave munu kutja katu tjaterwa kutja oweṱe Ovahongonone va Jehova. Nu ihi mape ya atji tjiti kutja owo ave ha yakura ouatjiri. Posi yokutja tji twa hungire nouvanḓe nongamburiro moviṋa mbi tu kambura mo, nokuhungirira ko aruhe, owo mape ya ave tu pe ondengero.”

18. Ovikwaye mbi mo sokutjita kutja u mune ondjamo?

¹⁸ Otja tji twa munu, tjiri okuungurira ondjamo yoye omerizirira omanene. Oviṋa tjiva mbi mo sokutjita, okulesa Embo ra Mukuru nokuripurira ko oukoto, okukumba ku Jehova, nokuripurira komiano pekepeke Jehova mbye ku sera ondaya. Indu tji wa tjiti nai, mavi ku vatere kutja u kare nongamburiro onyingi kutja Jehova Epanga roye. Nu otjiṋa tjo matji ku vatere kutja u hungire nouvanḓe ohunga nongamburiro yoye.—Lesa Epsalme 73:28.

19. Ongwaye ozongondjero azehe nḓu mo tjiti okuungurira ondjamo yoye, tji ze heri omungandjo?

¹⁹ Jesus wa tja: “Auhe ngu ma vanga okuyenda puna Ami nge rizembe omuini, a toore [‘omuti we wondatumisire,’ NW] nu e Ndji kongorere.” (Mat. 16:24) Oukahu kutja, okurira omuhongewa wa Jesus, Omukriste auhe ma sokuriyandja omuini ku Jehova na papitisiwa. Posi yokutja, indji ombutiro uriri yokukara nehupo ewa nai, nu mo kahupa nga aruhe mouye oupe Mukuru mbwe tu kwizikira. Kunao, tjita atjihe tji mo yenene kutja u kayende komurungu okuungurira ondjamo yoye omuini!