LUZIA U ṰENḒUNA. Eye tja ri omuṱiṱi wa vera omutjise mbu isanewa o-poliomyelitis. Owo omutjise omuhwange mbu u ṱuna kouruvi womundu noruruvi rwetambo. Eye tja ri nozombura 16, omukazendu Luzia paa ungura we mu raera kutja, “Mukuru we ku vera nomaremaneno mena rokutja ove koo zuu ku nyoko nu oo mu tjindi navi.” Kombunda yozombura, Luzia u zemburuka omuano omambo ngo mu ye mu hihamisa.

DAMARIS TJA ZUVA KUTJA WA VERA OKANGERA, ihe we mu pura kutja, “Hapo wa ungura tjike tji tja eta omutjise mbwi kove? Tjiri, mape ya wa tjita otjiṋa otjivi tjinene. Mukuru opa zokukuvera nomutjise mbwi.” Damaris wa hihamisiwa tjinene i omambo we.

Okumuna kutja omitjise omberero okuza ku Mukuru, otjiṋa tji tja uta ozombura ozonguru nḓa kapita. Embo ndi Manners and Customs of Bible Lands ri tja ovandu ovengi moruveze rwa Kristus, aave kambura kutja “omitjise aavi etwa i omauvi womuvere, poo ovandu mbaave kara pamwe, nokutja omutjise womundu wa ri omberero okuza ku Mukuru.” Ozombura ozengi kombunda yomarondero wa Jesus keyuru, embo ndi Medieval Medicine and the Plague ri tja: “Ovandu tjiva aave kambura kutja Mukuru aa eta omitjise okuvevera motjimbe tjomauvi wawo.” Ovandu ovengi moEuropa tji va ṱa i omutjise meserewondo oritja-14, hapo ya ri omberero okuza ku Mukuru? Poo ya ri mena romutjise, otja ovakonḓonone morupa rwomapangero tji va raisa? Ovandu tjiva ve ripura kutja, hapo Mukuru tjiri u ungurisa omitjise okuvera ovandu mena romauvi wawo? *

RIPURIRA KU IMBI: Ongwaye Jesus tjaa verukisa ovandu ndovazu omitjise nomauzeu omberero okuza ku Mukuru? Hapo okutjita nao kaku nokuzunḓa ousemba wa Mukuru? (Mateus 4:23, 24) Jesus kamaa roro okupirukira ondyero ya Mukuru. Eye wa tja: ‘Eye aruhe u tjita imbi mbi tjata ku Ye.’ Nu wina wa tja: “Opu mbi zokutjita avihe otja Eye punga ame Ndji rakiza.”​—Johanes 8:29; 14:31.

Ombeibela i honga oukahu kutja Jehova Mukuru ‘omunausemba.’ (Deuteronomium 32:4) Otjotjihorera, Mukuru kamaa roro okutjita kutja onḓera i zepe ovandu ovengi ovehinandjo mena rokuvanga okuvera omundu umwe ngu ri monḓera! Ohunga nousemba wa Mukuru, Abraham ngwa ri omukarere wa Mukuru omuṱakame wa tja Mukuru kamaa “yandeke omusemba pamwe nomurunde.” Eye wa tja “kape nakuyenena.” (Genesis 18:23, 25) Ombeibela wina i tja: “Ndjambi Omunamasaaehe ka tjiti ouvi nouhasemba.”​—Job 34:10-12.

Omauzeu ngu tu muna katjiraisiro tjokutja Mukuru u tu vera mena romauvi wetu. Jesus wa hungira oukahu ohunga notjiṋa hi indu eye novahongewa ve tji va muna omurumendu ngwa kwatwa omupoṱu. “Ovahongewa ve arire tji ve Mu pura ave tja: ‘Muhonge, ondjo yauṋe eye tja kwatwa omupoṱu nao? Ondjo ye omuini poo oyovanene ve?’ Jesus wa zirire a tja: ‘Kandjo ye nu wina kandjo yovanene ve eye tje ri omupoṱu nao, nungwari eye omupoṱu kokutja oviungura vyomasa wa Ndjambi vi riraise mu ye.’”​—Johanes 9:1-3.

Mena roumune ouvi ovandu oruveze ndo mbu va ri na wo, ovahongewa va Jesus mape ya va himinwe indu Jesus tje ve raera kutja omurumendu ngo poo ovanene ve, kave nouvi mbu va tjita mbwa eta omauzeu ngo ku wo. Jesus wa verura omurumendu ngwa poṱuparere ngwi, nu wina mokutjita nao eye wa raisira ovandu mba ri noumune woposyo kutja okumuna  ouzeu kaku hee kutja mo verwa i Mukuru. (Johanes 9:6, 7) Imba mbe kondja nomitjise ndino, mave yenene okumuna omahuhumiṋino mokutjiwa kutja Mukuru kangu ve vera nomitjise vyawo.

Omatjangwa maye tu pe ongamburiro ndji

• “Ndjambi ka rorerwa kouvi, nEye omuini ka roro omundu.” (JAKOBUS 1:13) Okutja tjiri oviṋa ‘ovivi’ mbya eta omauzeu omengi kovandu oure womaserewondo omengi tjimuna omitjise, omihihamo nonḓiro, mavi yekuisapewa moruyaveze ropopezu.

• Jesus Kristus wa “verukisa avehe mba ri nomitjise.” (MATEUS 8:16) Indu Omuna wa Mukuru tja verukisa ovandu avehe mbaave ya ku ye, eye wa raisa imbi Ouhona wa Mukuru mbi mau kayenenisa mouye auhe.

• Mukuru “ma pyoṋa omahoze aehe momeho wawo. Nonḓiro kai tji nakukara po rukwao; noruhoze nomaririro, nomuhihamo kavi tji nakukara po rukwao. Oviṋa ovikuru vya kapita.”​—OMAVANDURURIRO 21:3-5.

Ongwaye ovandu tji ve nomihihamo nomauzeu omengi nao? Oure wozombura ozengi, ovandu ve pura epuriro ndo. Tjinangara ka Mukuru, ouṋe ngu eta omauzeu nga kovandu? Omaziriro komapuriro ngo maye kahungirirwa morupa ndu maru kongorere ko.