Ovandu ovengi mouye ve kondja nouveruke mouripura
“Ami aruhe mbi kara nomerikendero, nandarire indu tji mbi ri erike metuwo.”
“Indu tji me fula nawa, ami mbi rikenda tjinene. Ami mbi tjiwa nawa kutja indu tji me fula nawa tjinene, korusenina me fula navi.”
“Ami mbi kondja okuyandja ombango koviṋa mbi mavi tjitwa eyuva arihe. Posi ya povikando tjiva mbi uta okurikenda ohunga noviṋa vyarwe ovingi.”
Omambo ngo ya za kovandu mbe nouzeu wouveruke mouripura. Hapo ove poo omundu warwe ngu rikendera ko, u kondja nouzeu otja imbwo?
Tjiwa kutja ove kaove erike. Ovandu ovengi ndino ve kondja nouveruke mouripura, nandarire owo oveni poo ovasuverwa vawo.
Nokuhinomakeyakeyero, eṱe tu hupa ‘motuveze otuzeu’ tu tu tjita kutja pe kare nomauzeu omengi pekepeke. (2 Timoteus 3:1) Omakonḓononeno yemwe ya rekena kutja mouye auhe pe novandu ovengi mba vera omitjise vyouripura. Mena ro-COVID-19, ovandu ape 78 000 000 va ṱunwa i yomutjise womerikendero nomutjise wombameno mombura ndji 2020 kombanda yombura ndji 2019.
Ounanḓengu okutjiwa kutja ovandu vengapi ndino mbe kondja nouzeu womerikendero nombameno. Posi yokutja otjiṋa otjinanḓengu tjinene okutjiwa omuano ove novasuverwa voye kutja mu fula vi nokutja mu hupa vi.
Ouveruke mouripura otjikeṋa?
Indu tji u nouveruke ouwa mouripura, u yenena okufula nawa nokuungura nawa. Ove u yenena okutuurunga ozombameno, okuungura momuano omuwa, nokukara nondjoroka na imbi mbi u na vyo mehupo.
Okukara nomutjise wouripura . . .
-
KAMENA roungundipare womundu.
-
OMENA rozombameno ozonḓeu, nu omutjise mbwi u ṱuna komeripura womundu nomuano me ritjinda.
-
Ku tjita kutja potuingi i rire ouzeu okutjita oupanga ku na varwe nokutjinda omauzeu eyuva arihe.
-
Ku yenena okuṱuna komundu auhe nandarire kutja u nozombura ngapi, owombazu iṋe, owomuhoko uṋe, owongamburiro iṋe, kutja wa hongwa pu pe ṱa pi, nokutja wa tumba poo omusyona.
Okupaha ombatero tji u kondja nouveruke mouripura
Povikando tjiva, omundu mape ya a utu okuritjinda momuano warwe, tjimuna okurara tjinene, poo okukara nouzeu wokurara, okurya tjinene, poo okuhinokurya tjimuna tjaa ri rutenga, okukara nomerikendero, poo okufula navi. Indu imbi tji mavi tjitwa, omundu mape ya a hepa onganga ndji mai mu vatere, ndji mai yenene okutjiwa kutja ovikwaye mbi mavi eta omarundurukiro ngo, nokutja omomuano uṋe mu mai yenene okuvatera. Nu hapo ombatero mo yenene okuivaza pi?
Omundu onongo ngwa hupire, Jesus Kristus, wa tja: “Mbe hepa omuverukise kawo mba mbe ri nawa, nungwari owo mba mba vera.” (Mateus 9:12) Imba mbe vera nu mbe muna omapangero aruhe, ve tjita kutja ovikaṋena vyomitjise mbyo avi he ve ṱunu tjinene, nokuvevatera okuyorokera ehupo. Ku imba mba vera tjinene poo mba vera orure, ma rire nawa okuhinokuwomba okupangwa. a
Nandarire kutja Ombeibela kambo romapangero, oro ri noviṋa mbi mavi yenene okutuvatera nouveruke mouripura. Eṱe matu mu ṋanga okutara kotupa tu matu kongorere ko, tu matu hungire kutja omomuano uṋe Ombeibela mu mai yenene okutuvatera okutjinda ouzeu wouveruke mouripura.
a Okambo kOruhungu kake raere omundu kutja omapangero yeṋe ngu ma sokutoora. Omundu auhe ma sokurikonḓonona omuini komurungu wokutoora omukambo.
Mo yenene okutara ku imbi wina
ESSENTIAL BIBLE TEACHINGS
Ongwaye Mukuru tje yandjera omauzeu?
Ombeibela i yandja omaziriro omakovise nomayanḓiparise.
OHUNGA NA EṰE
Ningira omahongero wOmbeibela wotjari
Hungirira kepuriro rOmbeibela, poo rihonga ovingi ohunga nOvahongonone va Jehova.
