Mo yenene okunakaura oumune ouvi

HAPO u kara noumune uṋe ohunga nouzeu mbu mo munu? Ovatjiwe ovengi ve kambura kutja eziriro kepuriro ndo ri raisa kutja oove omundu ngu u noumune ouwa poo ouvi. Atuhe tu muna omauzeu pekepeke mehupo, nu tjiva ve muna omauzeu omengi pu varwe. Hapo omena raye ovandu tjiva, tji ve kondja okutuurunga omauzeu ngu mave munu, ngunda varwe ave rihahiza nandarire tjiva munu omauzeu omaṱiṱi?

Otjotjihorera, ripura aayo mo paha oviungura. Tjazumba o isanewa koindaviu nu o ha kutwa. Hapo ove okuzambo mo kara noumune uṋe? Mape ya o ripura kutja owo kave vangere okundjikuta nu oumune mbwo au karerere, nu o rizuvisa omuini kutja, ‘Kape nomundu ngu ma kutu omundu otja ami. Hi mee kamuna oviungura.’ Poo mape ya o yandjere otjiṋa tjimwe ho okuzunḓa omuano mbu mo ripura, nu o munu kutja, ‘Owami otjiporoporo tjomundu. Ami hi nonḓengu kovandu.’ Kunao, ouripura otja imbwo ombu kaeta oumune ouvi.

Nakaura oumune ouvi

Hapo mo yenene vi okurwisa oumune ouvi? Otjiṋa otjitenga notjinanḓengu, okumuna kutja u nouripura ouvi. Nu okuzambo kondja okurwisa ouripura mbwo. Rundurura omeripura woye. Otjotjihorera, hapo ouatjiri kutja hi kutirwe mena rokutja kape nomundu ngu ma vanga okundjikuta? Poo ngahino omuyandje woviungura wa ri ama paha omundu ngu nomahongero warwe?

Tji we ripura nawa, mo yenene okumuna kutja oumune mbu u na wo u ri posyo. Hapo tji u ha toṋene motjiṋa tjimwe, tjiri maku hee kutja kaove omundu omusemba? Poo mo yenene okuripura noviṋa vyarwe mehupo roye mbi ku etera ouwa, tjimuna oviṋa mbi kurisa oupanga woye kuna Jehova, eṱunḓu roye noupanga kuna varwe? Rihonga okunakaura “omeripura omavi” ohunga noruyaveze rwoye. Nu hapo, mape ya o yenene okutjiwa kutja komoo munu oviungura? Pe novingi mbi mo yenene okutjita okunakaura omeripura omavi.

Kara nozondando ozombwa momeripura woye

Mozombura nḓa kapita ovakonḓonone va kahurura kutja okukara nomaundjiro ku heya tjike. Owo va tja omaundjiro ye kamburira mo ongamburiro yokutja mo yenenisa ozondando zoye. Otja orupa ndu maru kongorere ko pu maru raisa, omaundjiro ye kamburira mo oviṋa ovingi pendje nokuyenenisa ozondando uriri, posi yokutja omakahururiro ngo ye munika aayo omananḓengu momiano omingi. Tji twa yandja ombango komaundjiro ngu tu na wo maku tu vatere okukara nozondando ozombwa momeripura wetu.

Kutja tu kare nongamburiro yokutja matu yenenisa ozondando zetu moruyaveze, matu hepa okukara nozondando nḓu tu yenenisa. Nu indu tji mo munu kutja konozondando nḓu wa yenenisa, mo sokuripurira ko nawa ku inḓa nḓu mo twa po. Nu hapo pe nozondando nḓu u na zo? I rira oupupu okuhina okutjiwa kutja tjiri matu vanga ye mehupo poo okuhina okutwa po oruveze okuripurira koviṋa mbi ri ovinanḓengu ku eṱe. Tji twa tara kounahepero wokutwa po imbi mbi ri ovisemba poruveze orutenga, matu munu kutja Ombeibela oruveze orukuru wina ya tja: “Kokutja mu sore okutoorora imbi mbi ri oviwaviwa.”—Ovafilipi 1:10.

Indu tji twa toorora imbi mbi ri ovisemba, i rira oupupu okutwa po ozondando ozombwa mehupo retu, tjimuna ohunga noupanga wetu kuna Jehova, eṱunḓu retu, nomuano mbu tu hupa. Posi yokutja ohepero okuhina okutwa po ozondando ozengi pomautiro, nu wina nga tu twe po ondando ndji matu munu kutja matu yenene okuyenenisa. Indu ondando tji i ri onḓeu okuyenenisa, mape ya atu teka ombango okukayenda komurungu. Kunao ma rire nawa okutwa po ozondando zoruveze orusupi nḓu matu yenenisa kouṱiṱiṱiṱi.

“Pu pe nombango pe nondjira.” Imbwi omuano omukuru wokuhungira nu mape ya mu wo mu nouatjiri. Indu tji twa tjiwa kutja ozondando zeṋe nḓe ri ozonanḓengu ku eṱe, matu hepa okukara nombango poo onḓero okuzeyenenisa. Kokutja tu yenenise ozondando zetu matu sokumuna ounahepero wazo nu wina matu hepa okukara nombango okuzeyenenisa kutja tu kamune mo ouwa. Otjiperi kutja, mape kara oviputarise, posi yokutja matu sokuvivara otjoviṋa mbi matu yenene okutuurunga.

Kunao, matu hepa okuripurira komirari omisemba okuyenenisa ozondando zetu. Omutjange C. R. Snyder, ngwa tjita omakonḓononeno omakoto ohunga nounahepero wokukara nomaundjiro, wa tja omundu u sokuripura nomiano pekepeke vyokuyenenisa ondando kaaṋi ndjo. Kunao, omuano umwe tji u hina okuungura mo yenene okuungurisa imbwi outjavari noutjatatu poo vyarwe.

Snyder wina wa tja omundu u sokutjiwa kutja oruṋe tji ma sokuungurisa ondando yarwe. Tji pe notjiṋa tji matji tu tjaere okuyenenisa ondando, matu tu teka ombango tji twe ripurire ko tjinene. Nu tji twa twa po yarwe ombwa mai tu vatere kutja tu kare nomaundjiro.

Ombeibela i raisa otjihorera tji matji tu vatere okuzuva nawa otjiṋa hi. Ombara David wa ri nondando yokutunga Ondjuwo ondjapuke ya Muhona. Posi yokutja Mukuru wa raera David kutja omuzandu we Salomo ongu ma sokumuna ondjingonekero ndjo. Pendje nokuripurira ko poo okukondja okuhina okuyakura omambo ngo, David wa rundurura ondando ye ndjo. Eye we ripura okuwonga ovimariva noviungurisiwa omuzandu we mbi ma hepa okumana otjiungura tjokutunga.—1 Ozombara 8:17-19; 1 Ekuruhungi 29:3-7.

Nandarire kutja twa yenene okukara nomaundjiro nga yenene okurwisa oumune ouvi nokukara nozondando ozombwa momeripura wetu, mape ya atu hakara nomaundjiro nga zikama. Omomuano une? Omauzeu omengi ngu tu muna mouye ye za koviṋa mbi he ri kehi yomasa wetu. Indu tji matu tara komauzeu omanene nge tuṋa kovandu tji muna ousyona, ovita, ouhasemba, omitjise mbi ha yanda nonḓiro, hapo matu kara vi nomaundjiro?

[Picture]

Indu tji u ha kutirwe poviungura mbi wa ri amo vanga, hapo u muna kutja komoo kamuna oviungura?

 [Picture]

Ombara David wa ri omupupu okuyakura ondando yarwe otja kongaro ndja ri po