Nandarire kutja mo ungura oukukutu kutja u kare norukupo neṱunḓu eṋingandu, mape ya ape tjitwa oviṋa mbi u hina okuundjira ko nu mbi mavi tjiti kutja oha kara nondjoroka. (Omuzuvarise 9:11) Norusuvero Mukuru u tu pa ombatero indu tji twa wirwa i  ouzeu. Indu tji mwa ungurisa omirari vyOmbeibela mbi, ove neṱunḓu roye mamu yenene okutjinda ouzeu ngamwa auhe.

OMBEIBELA MAI TJA: “Omerikendero weṋu aehe yumbeye kombanda Ye, Eye tjinga e mu pa imbi mbi mwa hepa.” (1 Petrus 5:7) Aruhe tjiwa kutja Mukuru kangu eta omauzeu wetu. (Jakobus 1:13) Otja tji mo tumbuka popezu na ye, eye me ku vatere momuano omusembasemba. (Jesaja 41:10) “Mu raereye omaumba weṋu aehe!”—Epsalme 62:8.

Ove wina mo munu omahuhumiṋino mokulesa nokukonḓonona Ombeibela yoye eyuva arihe. Komaandero ove mo kamuna omuano Jehova mu me ‘ku vatere momauzeu woye aehe.’ (2 Ovakorinte 1:3, 4; Ovaroma 15:4) Eye u tu kwizikira kutja me tu pe ‘ohange yaNdjambi ndja kapita ozondunge azehe zovandu.’—Ovafilipi 4:6, 7, 13.

OVIṊA MBI MO YENENE OKUTJITA:

• Kumba ku Jehova kutja me ku vatere okuporimana nokuripura oukahu

• Tara koviṋa avihe mbi mo yenene okutjita okuzambo u toorore ihi tji tji ri otjisembasemba

OMBEIBELA MAI TJA: “Omunazondunge aruhe u muna ondjiviro, nokutwi kwonongo ku paha ondjiviro.” (Omiano 18:15) Tara komapu aehe nawa. Konḓonona kutja omundu auhe meṱunḓu roye ma hepa tjike. Hungira kuna wo nu u puratene tji mave hungire.—Omiano 20:5.

Indu omusuverwa weṋu tja ṱu mamu sokutjita vi? O ṱohoṋi okuraisa kutja otjiṋa hi tje ku ṱunu vi. Tjiwa kutja nandarire Jesus “wa rira.” (Johanes 11:35; Omuzuvarise 3:4) Wina ohepero okurara nawa nokusuva nawa. (Markus 6:31) Okutjita nao maku tjiti kutja ku rire oupupu okutjinda ouzeu ounene.

OVIṊA MBI MO YENENE OKUTJITA:

• Ngunda ape hiya kara ouzeu kaaṋi, kondja kutja u hungire ku neṱunḓu roye aruhe. Indu tji pa kara ouzeu ma rire oupupu ku wo okuhungira kuna ove

• Hungira kuna varwe mba rora okukara mouzeu otjingewo

OMBEIBELA MAI TJA: “Epanga aruhe ri raisa orusuvero rwaro; nungwari omuangu nerumbi ve riraisa moruveze rwombamisiro.” (Omiano 17:17) Omapanga woye mape ya aye vanga okukuvatera posi yokutja mape ya aye ha tjiwa kutja ngaye ku vatere vi. O tira okuveraera kutja ovikeṋa mbi mo hepa. (Omiano 12:25) Nu wina ningira imba mbe zuva Ombeibela nawa okukuvatera okuizuva. Ombatero ndji mave kupe okuza mOmbeibela mai ku vatere.—Jakobus 5:14.

Tji wa kara aruhe pu novandu mbe nongamburiro tjiri mu Mukuru nu mbe kambura momakwizikiro we, mo munu omahuhumiṋino. Tji wa vatere varwe mbu mave hepa omayanḓiparisiro, wina matji ku huhumiṋa tjinene. Raera varwe ohunga nongamburiro yoye mu Jehova na momakwizikiro we. Vatera varwe mbu mave hepa ombatero nu o kara kokure na imba mbe ku suvera nu mbe rikendera kove.—Omiano 18:1; 1 Ovakorinte 15:58.

OVIṊA MBI MO YENENE OKUTJITA:

• Hungira ku nepanga ropopezu nu riyandjera kutja ri ku vatere

• Hungira oukahu nu hungira ouatjiri ohunga nokutja mo hepa tjike