Ombapitisimo orondu omundu tji ma pundisiwa kehi yomeva nokupitisiwa. a Ihi tji kahurura kutja omena raye Jesus tja papitisiwa monḓonḓu onene. (Mateus 3:13, 16) Momuano tjingewo omurumendu Omuetiopi wa ningira okupapitisiwa indu tji ve ya “pomeva.”—Oviungura 8:36-40.

Omaheero wombapitisimo

 Ombeibela i sasaneka ombapitisimo ku nombakero. (Ovaroma 6:4; Ovakolose 2:12) Ombapitisimo yomeva i ri tjimuna omundu tja koza ongaro onguru ndja ri na yo, na utu ongaro ombe otjOmukriste ngwe riyandja ku Mukuru. Ombapitisimo nomikambo omundu mbye toora kutja ma papitisiwe, ondyero ya Mukuru kutja omundu ma kare nomeritjiviro omawa womomutima, nga zikamena kongamburiro ye motjisuta tjonguturiro tja Jesus Kristus. (1 Petrus 3:21) Ku nao, Jesus wa raera ovahongewa ve kutja mave sokupapitisiwa.—Mateus 28:19, 20.

Hapo okupapitisiwa momeva ku kohorora ouvi?

 Kako, katjiperi. Ombeibela i honga kutja matu yenene okukohororwa kouvi okupitira mombinḓu ya Jesus ndja tika. (Ovaroma 5:8, 9; 1 Johanes 1:7) Kutja omundu ma mune ouwa mombunguhiro ya Jesus, ma sokukara nongamburiro mu ye, ma sokurundurura ehupo re, nokuhupa otja komahongero we, nokupapitisiwa.—Oviungura 2:38; 3:19

Hapo Ombeibela i honga ohunga nombapitisimo younatje?

 Kako, kai hongo. Ombapitisimo younatje kai tamuninwe mOmbeibela. Ozokereka tjiva ze kara novitjitwa ounatje mu u “papitisiwa” (mu u tirirwa omeva kombanda yoviuru) nokuruka omana.

 Ombapitisimo yOukriste oyaimba mbe kura pu pa yenene okuzuva nawa nokukambura ‘mOmbuze Ombwa youhona waNdjambi.’ (Oviungura 8:12) Oyo i kamburira mo okuzuva Embo ra Mukuru, nokuriyakura, nokutjita ondanaukiro. Ovyo mbi ri oviṋa mbi hi na maavi tjitwa i yokanatje.—Oviungura 2:22, 38, 41.

 Nu wina, Ombeibela i raisa kutja Mukuru u vara ovanatje ovaṱiṱi mbe novanene Ovakriste otjovayapuke, poo ovakohoke momeho we, mena rongamburiro ovanene vawo ndji ve raisa. (1 Ovakorinte 7:14) Andakuzu ovanatje va sokupapitisiwa, katjave hepa Mukuru okuvevara otjovayapuke poo ovakohoke mena rongamburiro yovanene vawo. b

Oumune woposyo ohunga nombapitisimo yOukriste

 Oumune woposyo: Okutjatja poo okutirira omundu nomeva omuano warwe omuyakurwa mbu u pingena okupundisiwa momeva.

 Ouatjiri: Ozombapitisimo azehe nḓa tamunwa mOmbeibela ze kamburira mo okupundisiwa momeva. Otjotjihorera, indu Filipus tja papitisa omurumendu Omuetiopi owo, ‘va punda momeva’ nu arire tje mu papitisa. Okuzambo, owo “va pita momeva.”—Oviungura 8:36-39. c

 Oumune woposyo: Ombeibela i tja ounatje aau papitisiwa indu omaṱunḓu tjaaye papitisiwa. Otjotjihorera, Ombeibela i tja nai ohunga nomutjevere wondeko moFilipi: “Neye nonganda ye aihe ave papitisiwa.”—Oviungura 16:31-34.

 Ouatjiri: Ehungi ohunga nondanaukiro yomutjevere wondeko ri raisa kutja imba mba papitisiwa va zuva “embo raMuhona” nowo “va nyanda omitima tjinene.” (Oviungura 16:32, 34) Omapu nga maye tu vatere okumuna kutja ounatje mondjuwo womutjevere wondeko ka na pu wa ri orupa rwombapitisimo, mena rokutja kaau yenene okuzuva Embo ra Muhona.

 Oumune woposyo: Jesus aa hongo ohunga nombapitisimo younatje indu tja tja Ouhona womayuru owawo.—Mateus 19:13-15; Markus 10:13-16.

 Ouatjiri: Jesus ka hungire ohunga nombapitisimo indu tja hungire omambo ngo. Nungwari, eye aa raisa kutja imba mbu mave yenene okuhita mOuhona wa Ndjambi mave sokurira ozongozu nu mave sokuyenena okuhongwa tjimuna ovanatje.—Mateus 18:4; Lukas 18:16, 17.