ԵՐԲԵՎԷ դարձե՞լ ես կոռուպցիայի զոհը։ Նույնիսկ եթե Ջոնի իրավիճակում չես հայտնվել, այնուամենայնիվ, կրած կլինես կոռուպցիայի հետևանքները։

Ըստ «Թրանսփարենսի ինթերնեշնլ» (ԹԻ) հակակոռուպցիոն կազմակերպության 2011թ. կոռուպցիայի ընկալման համաթվի (ԿԸՀ) *՝ «ընդգրկված 183 պետությունների ու տարածքների մեծ մասի ԿԸՀ արժեքները 5-ից ցածր են 0-ից 10 սանդղակով, որտեղ 0-ն բացարձակապես կոռումպացված, իսկ 10-ը բացարձակապես չկոռումպացված լինելու ընկալումն է»։ 2009թ. հաշվետվությունը ցույց տվեց, որ կոռուպցիան առկա է աշխարհի բոլոր մասերում։ ԹԻ-ն ընդունեց հետևյալ փաստը. «Աշխարհի ոչ մի երկիր պաշտպանված չէ կոռուպցիայից»։

«Կոռուպցիան իշխանության չարաշահումն է հօգուտ սեփական շահի։ Կոռուպցիայի զոհ կարող է դառնալ յուրաքանչյուր ոք, ում կյանքը, ապրուստը և երջանկությունը կախված են նրանից, թե որքան ազնիվ կլինեն իշխանություն ունեցող մարդիկ» («ԹՐԱՆՍՓԱՐԵՆՍԻ ԻՆԹԵՐՆԵՇՆԼ»)

Որոշ դեպքերում կոռուպցիայի հետևանքները կարող են աղետալի լինել։ Օրինակ՝ «Թայմ» ամերիկյան հանդեսում նշվում էր,  որ 2010թ.-ին Հայիթիում տեղի ունեցած երկրաշարժի ժամանակ մեծ թվով մարդկանց մահվան պատճառը մասամբ «կոռուպցիան և անբարեխղճությունն» են եղել։ Նաև նշվում էր, որ այնտեղ շինարարական գծով փորձագետներին հաճախ կաշառք է տրվում և շինարարությունն իրականացվում է առանց ինժեներների կողմից հաստատված նախագծի։

Հնարավո՞ր է արդյոք հիմնովին վերացնել կոռուպցիան։ Այս հարցին պատասխանելու համար նախ պետք է իմանանք, թե որոնք են կոռուպցիայի հիմնապատճառները։