Jou samdi ki te 1^ye mas 2014 la, te gen 823 moun ki te reyini ak kè kontan nan Sal asanble Temwen Jewova yo ki nan vil Benen, nan peyi Nijerya, pou yo selebre yon evènman enpòtan. Nan ane 1999, yo te vin ak yon pwogram pou konstwi Sal Wayòm nan peyi kote frè nou yo pa gen gwo mwayen e depi lè sa a Temwen Jewova yo rive konstwi 3 000 Sal Wayòm nan peyi sa a.

Nan reyinyon an, yo te fè yon ti pale sou travay ki te fèt nan peyi Nijerya depi ane 1920 pou pèmèt kongregasyon yo jwenn kote pou yo reyini. Pou kòmanse yo te konn fè reyinyon kay moun oswa yo te konn lwe sal pou fè reyinyon. Premye kote yo sonje Temwen Jewova yo te konn itilize sèlman pou reyinyon nan peyi Nijerya se te yon sal yo te konstwi nan vil Ilesa ozanviwon ane 1935. Ant ane 1938 pou rive ane 1990, kantite kongregasyon yo pa t sispann ogmante pou rive preske 200 fwa plis, soti 14 kongregasyon pou rive 2 681, e l te difisil pou anpil nan yo jwenn kote pou yo reyini. Gen kèk Sal Wayòm ki konn gen sis kongregasyon reyini ladan yo. Gen lòt Sal ki konn twò piti pou resevwa moun yo, konsa, gen moun ki te konn kanpe deyò oswa ki te konn koute pwogram reyinyon an nan fenèt. E anpil kongregasyon konn reyini lakay moun oswa nan yon sal klas.

Nan ane 1990 filyal Temwen Jewova yo te kòmanse soutni travay konstriksyon Sal Wayòm yo lè yo te prete kongregasyon yo kòb pa mwayen Fon pou Sal Wayòm nan. Rive nan ane 1997, Komite rejyonal pou konstriksyon Sal Wayòm nan te ede 105 kongregasyon konstwi oswa renove Sal Wayòm pa yo. Soti nan ane 1997 pou rive nan ane 1999, gen 13 Sal Wayòm ki te pran ant 7 oswa 15 jou pou yo konstwi yo.

Se vre yo konstwi anpil Sal Wayòm, men, sa pa sifi piske kantite Temwen Jewova yo nan peyi Nijerya pa sispann ogmante. Nan mwa avril 1998, frè nan biwo filyal la te rann yo kont yo t ap bezwen 1 114 Sal Wayòm nan peyi a.

Men sa Don Trost, yon manm komite filyal Nijerya a te di nan reyinyon espesyal sa a ki te fèt nan vil Benen: “Se te yon kokennchenn travay! Nou te mande tèt nou ki jan nou t ap rive fè gwo travay sa a?” Pwoblèm nan te rezoud nan ane 1999, lè ekip konstriksyon Sal Wayòm yo ki gen sis a uit moun ladan yo te vin ede kongregasyon nan tout peyi a. Nan 14 ane ki sot pase yo, yo te sèvi ak plan ki senp pou yo konstwi an mwayèn 17 Sal Wayòm chak mwa.

Apre frè Trost te fin felisite moun nan asistans lan pou travay ki te fèt la, li te fè konnen gen anpil travay ki pou fèt toujou. Pandan ane 2013 la, te gen plis pase 8 000 moun ki te vin ajoute sou kantite Temwen Jewova ki nan peyi sa a. Men sa l te ajoute: “Nou ta dwe konstwi 100 lòt Sal Wayòm ankò chak ane, akòz kantite moun yo ki pa sispann ogmante.” Nan ane 2013 te vin genyen yon maksimòm 351 000 Temwen Jewova nan peyi Nijerya nan plis pase 5 700 kongregasyon.