Nan kèk peyi an devlopman, moun ki avèg yo pa toujou gen menm opòtinite ak lòt moun ki avèg nan lòt peyi. Pafwa yo mete yo apa nan sosyete a e yo pa jwenn èd yo bezwen lè y ap fè fas ak pwoblèm nan lavi a anpil moun pa bay twòp enpòtans. Pa egzanp, li ka difisil anpil pou y al achte manje nan mache, pou yo pran machin e pou yo jere lajan. Fè lekti kapab yon pwoblèm pou yo tou. Se pa yo tout ki konn li bray. E menm lè yon avèg konn li bray, li ka difisil pou yo jwenn piblikasyon nan lang yo.

Depi plis pase 100 an, Temwen Jewova yo ap pwodui piblikasyon ki baze sou Bib la pou moun ki avèg yo. Pou yo te ka fè piblikasyon pou moun ki avèg yo nan lang chichewa, yon lang yo pale nan peyi Malawi, sa pa gen lontan depi Temwen yo te voye enprimant pou lang bray ak ekipman pou relye liv nan peyi Malawi. Ekipman sa yo te soti nan Peyiba.

Leo, ki gen eksperyans nan pwodui piblikasyon nan lang bray, te vwayaje sot nan biwo filyal peyi Brezil pou l al Malawi. Li te ede yon ekip ki gen senk moun aprann itilize ekipman yo ak yon pwogram enfòmatik Temwen yo fè pou lang bray. Pwogram nan mete tèks ki nan lang chichewa a nan lang bray chichewa. Pou pwogram nan rive fè sa, moun k ap itilize l yo te bezwen mete yon sistèm kote yo te ka wè ni lèt ak mo ki nan tèks nòmal yo ni karaktè ki nan lang bray yo. Pwogram nan kapab konvèti tèks nan lang bray epi fòmate l yon fason ki fè l fasil pou moun ki avèg ka rive li l. Ann konsidere sa kèk moun k ap viv nan peyi Malawi di sou piblikasyon ki fèt nan lang bray yo.

Munyaradzi se yon jèn dam ki avèg ki pap travay aplentan e ki fè yon emisyon sou radyo. Li pase 70 èdtan chak mwa ap anseye lòt moun Labib. Men kòmantè li fè: “Nan tan lontan, mwen te konn resevwa piblikasyon nan lang bray ann anglè, men lè m gen piblikasyon sa yo nan lang manman m, sa vrèman touche kè m. Mwen vrèman apresye tout efò ak tout depans Temwen parèy mwen yo fè pou yo ede n jwenn piblikasyon an bray nan lang nou. Sa fè m santi yo pa t bliye nou e nou gen valè pou yo.”

Francis se yon Temwen k ap viv nan nò peyi Malawi. Piske li avèg, te gen yon epòk se moun ki te konn fè lekti pou li. Lè l te resevwa premye piblikasyon li nan lang bray, men sa l te di: “Èske se nan rèv mwen ye? Sa se yon gwo bagay!”

Loyce se yon sè ki avèg k ap sèvi antanke sèvitè aplentan. Li deja ede 52 moun fè chanjman nan lavi yo pou yo mennen yon pi bon vi. Ki jan l rive fè sa? Li sèvi ak piblikasyon ki an bray pou l anseye etidyan l yo, e etidyan yo menm gen tèks yo enprime, yon seri piblikasyon se Temwen Jewova yo ki pwodui yo.

Leo, pwofesè ki te soti Brezil nou te pale de li anvan an, di: “Se yon bagay ki ban m anpil satisfaksyon lè m lonje yon piblikasyon an bray bay yon moun e pou m wè reyaksyon moun nan lè l rann li kont piblikasyon an nan lang pa l. Anpil nan moun sa yo fè konnen jan yo rekonesan anvè Jewova e jan yo kontan dèske yo ka prepare reyinyon yo ak soti predikasyon poukont yo. Yo pa bezwen pou yon lòt moun li pou yo. Kounye a, yo vin ka fè etid pèsonèl yo poukont yo toutbonvre. Yo vin gen plis mwayen pou yo ede fanmi yo grandi nan domèn espirityèl. Piblikasyon sa yo ede yo vin pi pwòch ak Jewova.”