Bondye ban nou diyite lefètke li ban nou libète pou nou deside olye se li menm oswa desten ki deside pou nou. Gade sa Bib la anseye.

•   Bondye te kreye lèzòm pòtre ak li (Jenèz 1:26). Bèt yo aji selon jan Bondye te pwograme yo pou yo aji, men nou menm nou sanble ak Bondye, sa vle di nou gen kapasite pou n demontre yon seri kalite tankou lanmou ak jistis. Epitou, menm jan ak Sila a ki kreye nou an, nou gen libète pou n deside.

•   Menmsi gen bagay nou pa ka konnen, nou gen kapasite pou n detèmine ki jan lavni nou ap ye. Labib ankouraje nou pou n “chwazi lavi [...] lè nou koute sa [Bondye] di”, sa vle di lè n chwazi obeyi kòmandman l yo (Detewonòm 30:19, 20). Òf sa a Bondye fè nou an pa t ap gen okenn sans, e se t ap mechanste, si nou pa t gen libète pou n deside. Men, Bondye pa fòse nou fè sa l di, okontrè, men ki ankourajman li ban nou: “Si w te annik suiv kòmandman m yo! Ebyen, lapè ou t ap genyen an t ap anpil tankou dlo nan yon rivyè ki pa janm seche.” — Ezayi 48:18.

•   Se pa desten k ap detèmine si n ap reyisi oswa si n ap echwe. Si nou vle reyisi nan yon bagay, nou dwe travay di pou sa. Men sa Pawòl Bondye a di nan Eklezyas 9:10: “Tout sa w jwenn fè ak men w, fè l ak tout fòs ou.” E li di tou: “Moun ki konn travay byen an planifye sa l ap fè.” — Pwovèb 21:5.

 Libète pou n deside a se yon kado ki gen anpil valè Bondye ban nou, paske sa ban nou posiblite pou n renmen Bondye ak “tout kè nou” paske nou vle fè sa. — Matye 22:37.

 Labib fè konnen Bondye Toupisan, pèsonn pa ka anpeche l demontre pouvwa l (Jòb 37:23; Ezayi 40:26). Sepandan, li pa sèvi ak pouvwa l genyen pou l kontwole tout bagay. Pa egzanp, Labib di Bondye “te kontwole tèt [li]” anrapò ak yon ènmi pèp li a, anpalan de Babilòn nan tan lontan an (Ezayi 42:14). Menm jan an tou, pou kounye a, li chwazi pran pasyans ak moun ki mal sèvi ak libète yo genyen pou deside a pou yo fè lòt moun mal. Men, li pap fè sa nètale. — Sòm 37:10, 11.