Nan dat ki te 26 avril 2022 a, frè Mark Sanderson, yon manm Kolèj santral Temwen Jewova yo, te rive nan peyi Polòy pou ankouraje frè ak sè ki viktim akoz lagè ki gen ann Ikrèn nan.

Yo te envite tout kongregasyon nan Polòy ak Ikrèn nan yon reyinyon espesyal ki t ap fèt nan dat ki te 30 avril 2022 a. Yo te envite refijye Ikrényen ki nan peyi Polòy ak moun k ap patisipe nan travay pote sekou a nan pwogram ki t ap fèt an pèsòn nan Sal asanble ki Vasovi a. Lè yo konte moun ki te nan Sal asanble a ak moun ki te sou videyo konferans, te gen plis pase 250 000 moun nan peyi Polòy ak peyi Ikrèn ki te asiste pwogram nan.

Men sa frè Sanderson te di: “Frè ak sè sou tout tè a ap panse avèk nou e y ap priye pou nou. Nan Syèj mondyal la, se chak jou yo priye pou frè ki Larisi ak Ikrèn yo, e Kolèj santral la priye pou nou nan reyinyon yo fè.” Li te bay moun ki t ap koute yo yon asirans, li te di: “Lè moun jwenn difikilte, sa pa vle di yo pèdi favè Jewova. Jewova wè yo, li renmen yo e li sitou pwòch moun ki nan detrès.”

Men sa frè Sanderson te di ankò: “Ret konsantre sou relasyon nou ak Jewova. Objektif nou se pa jis chape, men nou vle soti nan difikilte sa yo ak yon lafwa ki pi solid, e nou vle santi nou vin pi pwòch ak Jewova. Se sa Jewova ap anseye nou.”

Serhiy, yon ansyen nan Odesa, nan peyi Ikrèn, di: “Pandan dènye semèn yo, mwen pa t vrèman ka dòmi paske mwen te santi m panike, mwen pa t konn sa pou m panse e mwen te pè. Men, [pwogram espesyal la] te fòtifye lafwa m, li montre m Jewova pa sèlman enterese nan nou antanke gwoup, men li enterese nan nou chak pèsonèlman.”

Sè Tatiana, yon refijye ki soti Kyèv nan peyi Ikrèn, di: “Jodi a, mwen vrèman wè jis nan ki pwen Jewova pwòch avèk mwen. Mwen santi se kòmsi Jewova pran m nan bra l, e mwen santi lanmou li gen pou mwen. Kèlkeswa kote nou ye, Jewova toujou avèk nou.”

Se pa ti renmen nou renmen frè ak sè nou yo, e nou gen konfyans pwogram espesyal la te fè yo sonje “lanmou fidèl” Jewova gen pou pèp li a. — Sòm 136:1.