Yo te konn sèvi ak moulen abra pou yo fè manje angren yo tounen farin pou moun yo ka fè pen. Se yon travay fi oubyen sèvant nan prèske chak kay te konn fè regilyèman. Nan tan lontan, moun yo te abitye ak bri moulen yo te konn ap fè a nan aktivite y ap mennen chak jou. — Egzòd 11:5; Jeremi 25:10.

Gen kèk atis nan Ejip tan lontan an ki te fè desen oubyen estati ki montre fason yo te fè travay sa a. Yo te mete manje angren an sou yon wòch ki gen fas plat ki panche sou devan e ki yon jan koube nan mitan, yon wòch yo fikse atè. Pafwa yo te rele l moulen abra. Moun k ap moulen an te met ajenou padèyè wòch yo fikse atè a pandan l ap kraze manje angren an ak yon lòt wòch plat ki pi piti e li sèvi ak de men l pou l fè travay la. Li peze wòch ki nan men l lan sou manje angren yo epi li fè mouvman al devan epi tounen dèyè pou l kraze grenn yo. Selon sa yon liv fè konnen, nòmalman, wòch ki nan men moun nan konn peze ant de a kat kilo. Si yo te sèvi ak wòch sa a kòm zam li te ka touye moun. — Jij 9:50-54.

Moulen manje angren te sitèlman enpòtan pou byennèt yon fanmi, gen yon lwa nan Bib la ki te entèdi moun sezi mèl ki pa anlè moulen abra yon moun genyen kòm garanti. Men sa Detewonòm 24:6 (NW) di: “Pèsonn pa dwe sezi yon moulen abra oswa mèl ki pa anlè a kòm garanti, paske se yon nanm li sezi kòm garanti.”

Bib la di Jezi “nan sen Papa a”. (Jan 1:18.) Ekspresyon sa a montre jan Jezi pwòch anpil ak Bondye, jan li gen favè li. Pawòl sa a fè referans ak yon abitid Juif yo te genyen lè y ap manje.

Nan epòk Jezi a, Juif yo te konn lonje kò yo sou yon divan ki bò tab kote y ap manje a. Tout moun k ap manje yo te konn met tèt yo nan direksyon tab la epi yo te lonje pye yo lwen tab la. Yo te apiye sou koud ponyèt goch yo e te gen yon kousen ki soutni kò yo. Pozisyon sa a te pèmèt yo kite men dwat yo lib. Gen yon liv ki fè konnen etandone tout moun k ap manje yo te panche sou bò goch yo, youn akote lòt, “tèt moun ki devan an te toupre sen moun ki dèyè l la e konsa, yo te di ‘li kouche nan sen’ lòt moun nan”.

Lè yon moun te kouche nan sen chèf fanmi an oubyen nan sen moun ki envite l la, yo te konsidere moun sa a jwenn yon onè espesyal oubyen li gen yon privilèj. Se sa k fè, nan dènye fèt Pak Jezi te fè ak disip li yo, se apot Jan, disip Jezi te “renmen an” ki te kouche nan sen Jezi. Konsa, apot Jan te ka “kage sou lestomak Jezi” pou l poze l yon kesyon. — Jan 13:23-25; 21:20.