Lefètke Jezi te resisite, sa te fè disip yo vin gen plis konviksyon e yo te pi zele. Apot Pòl, bò kote pa l, te vwayaje nan Azi Minè ak nan Meditèrane. Li te òganize kongregasyon yo. Li te fòtifye kretyen yo pou yo kenbe djanm devan presyon yo te jwenn nan domèn moral. Li te ankouraje yo rete fèm devan gwo opozisyon. Malgre tout pwoblèm sa yo, kongregasyon yo te kontinye pwogrese e anpil moun te vin kretyen.

Kèk tan apre, yo te mete Pòl nan prizon. Malgre l te nan prizon li te ekri plizyè lèt pou l ankouraje kongregasyon yo e pou l ba yo konsèy. Li te avèti yo t apral gen yon pi gwo danje, se apostazi. Anba enfliyans lespri sen Bondye, Pòl te predi t apral gen “chen sovaj” ki t ap antre nan mitan kretyen yo e yo t ap pale “bagay kwochi” pou yo te ka “rale disip yo vin suiv yo”. — Travay 20:29, 30.

Nan fen premye syèk la, apostazi a te kòmanse. Nan epòk sa a, Jezi, ki te resisite, te bay apot Jan yon revelasyon, yon vizyon senbolik sou sa ki pral rive alavni. Tankou apot Jan te ekri sa, ni opozan ni fo anseyan pa ka anpeche Bondye reyalize objektif li te gen depi okòmansman pou tè a ak pou limanite. “Moun tout nasyon, tout tribi, tout lang ak tout pèp” t apral tande bon nouvèl konsènan Wayòm Bondye a (Revelasyon 14:6). Tè a pral tounen yon paradi ankò e tout moun ki vle fè volonte Bondye ap ka viv ladan l!

Èske pawòl sa yo pa yon bon nouvèl pou ou? Si repons lan se wi, nou ankouraje w pou w aprann plis bagay sou mesaj Bondye bay pou limanite a jan sa parèt nan Bib la epi chèche konnen kòman sa ka pwofitab pou ou depi kounye a e alavni.

Ou ka li Bib la nan 50 lang lè w al sou sit www.isa4310.com la. Sou sit sa a, w ap ka li liv Ki sa Labib anseye toutbonvre? a ak bwochi, tankou Èske w jwenn wout lavi ki pap janm fini an?, Bon nouvèl Bondye bay la!. W ap jwenn lòt piblikasyon ki pale sou rezon ki fè nou ka fè Bib la konfyans e yo esplike fason nou ka aplike bon konsèy ki nan Bib la nan fanmi nou ak nan lavi nou. Oubyen ou ka mande yon Temwen Jewova plis enfòmasyon.

— Li baze sou liv Travay, Efezyen, Filipyen, Kolosyen, Filemon, 1 Jan, Revelasyon.