ANN imajine nou nan vil Jeriko, nan peyi Kanaran, sa gen anviwon 3 500 an. Gen yon tifi ki rele Rahab ki abite nan vil sa a. Li te fèt apre Moyiz ak Izrayelit yo te soti nan esklavaj ann Ejip e yo te travèse lanmè Wouj sou tè sèk. Pa t gen ni radyo, ni televizyon, ni Entènèt, men Rahab te okouran de mirak sa a, menm lè sa te fèt byen lwen kote li abite a. Èske w konn ki jan li te fè aprann sa?— *

Sandout, moun ki abitye vwayaje yo te konn pale de mirak sa yo. Pandan Rahab t ap grandi, li te sonje sa Jewova te fè pou pèp Li a. Apre sa li vin tande lòt bagay estrawòdinè sou Izrayelit yo. Apre 40 an nan dezè a, yo antre Kanaran e Bondye ede yo venk tout moun ki te opoze ak yo. Kounye a, Rahab aprann kan Izrayelit yo anfas rivyè Jouden an ki toupre Jeriko.

Yon jou swa, de moun Rahab pa konnen vin wè l. Se paske yo konnen l ap mennen aktivite yon kote ki pèmèt li akeyi moun ki vin nan vil la. Donk, li envite yo rete. Pandan nuit la, wa Jeriko a aprann gen espyon izrayelit ki antre anndan Jeriko e ki ale lakay Rahab. Donk, wa a voye kèk mesye kot Rahab ki di l fòk li fè mesye ki te vin kote l yo soti. Èske w konnen ki sa Rahab gentan aprann e ki sa l fè?—

Ebyen, menm anvan mesaje wa a te voye yo rive, Rahab gentan aprann moun ki vin lakay li yo se espyon izrayelit yo ye. Sa l fè, li kache yo sou do kay li a, e men sa li di mesaje wa yo: ‘Wi, te gen kèk mesye ki te vin lakay mwen. [...] Men lè yo ta pral fèmen pòtay la apre solèy fin kouche, mesye yo soti. Apre sa, Rahab di mesaje yo: “Rapousib yo.”

Poukisa w panse Rahab te pwoteje espyon yo?— Li esplike poukisa lè l di: “Mwen konnen Senyè a lage peyi a nan men nou. [...] Paske, nou tande ki jan Senyè a te cheche dlo Lanmè Wouj la devan nou lè nou t’ap sòti kite peyi Lejip la.” Li tande pale tou de lòt viktwa Bondye te bay Izrayèl sou ènmi l yo.

 Se sèten Jewova te kontan lefètke Rahab te ede espyon yo, jan Bib la di nou sa nan Ebre 11:31. Li te kontan tou lè Rahab te sipliye espyon yo konsa: ‘Mwen aji byen avèk nou. Tanpri, pwomèt mwen lè nou pran Jeriko n ap sove papa m, manman m, frè m ak sè m yo.’ Espyon yo pwomèt li y ap fè sa si Rahab fè sa yo mande l fè a. Èske w konn sa yo te mande l fè?—

Espyon yo di l: ‘Pran kòd wouj sa a, mare l nan fenèt ou a. Epi, rasanble tout fanmi w avè w anndan lakay ou. Si w fè sa, pèsonn moun ki nan kay la avè w pap pèdi lavi yo.’ Rahab fè egzakteman sa espyon yo te di l pou l fè a. Èske w konnen sa k te rive annapre?—

Izrayelit yo rive bò kote miray vil Jeriko a. Yo fè tou vil la chak jou, pandan sis jou, san yo pa fè bri. Sou setyèm jou a, yo fè laviwonn vil la sèt fwa, apre sa yo pouse yon sèl rèl! Miray yo tonbe plat atè, sof kay kote kòd wouj la te mare nan fenèt la. Rahab ak fanmi l te sove. —Jozye 2:1-24; 6:1-5, 14, 15, 20-25.

Ki sa egzanp Rahab la ka aprann nou?— Ebyen, li pa t sèlman koute nouvèl konsènan sa Bondye t ap fè pou L pwoteje pèp Li a. Rahab te ede yo tou lè l te gen posiblite a. Wi, Rahab te chwazi sèvi Jewova ansanm ak pèp Li a. Èske w ap fè menm jan avè l?— N ap priye pou w kapab fè sa.