Kiyès Bondye ye?

KI JAN w t ap reponn kesyon sa a? Gen moun ki santi yo byen konnen Bondye e ki santi li se yon bon zanmi. Gen lòt ki konsidere l kòm yon moun ki lwen yo. Yo kwè li egziste, men yo pa konnen anpil bagay sou li. Si w se yon moun ki kwè nan Bondye, ki jan w t ap reponn kesyon ki annapre yo?

1. Èske Bondye se yon moun toutbon?

2. Èske Bondye gen yon non?

3. Èske Jezi se Bondye Toupisan an?

4. Èske Bondye gen sousi pou mwen?

5. Èske Bondye aksepte tout relijyon?

Si w ta poze lòt moun kesyon sa yo, petèt w ap sezi tande divès kalite repons yo ka ba ou. Anfèt, nou pa sezi lè nou tande fo kwayans ak ide ki pa kòrèk moun yo genyen sou Bondye.

Rezon ki fè repons kesyon sa yo enpòtan

Yon lè, pandan Jezi Kris t ap pale avèk yon fi ki kwè nan Bondye li te rankontre bò yon pi, li te montre li enpòtan pou yon moun byen konnen Bondye. Fi sa a, ki te yon Samaritèn, te dakò Jezi se yon pwofèt. Men, gen yon bagay ki te ba l pwoblèm, sèke li te wè relijyon pa Jezi a te diferan ak relijyon pa l la. Lè l te pale ak Jezi sou sa, men sa Jezi te di l byen klè: “Nou menm, moun Samari, nou pa konnen sa n’ap sèvi a.” ​(Jan 4:19-22). Sa klè, Jezi te konnen se pa tout moun ki kwè nan Bondye ki byen konnen Bondye.

 Lè Jezi te di sa, èske l te vle di okenn moun pa ka rive byen konnen Bondye? Non. Paske apre sa, li te di fi a pawòl sa yo: “Vrè moun k ap adore yo, yo va adore Papa a nan lespri ak nan laverite. Paske, se moun konsa, Papa a ap chèche pou adore li.” ​(Jan 4:23, Bib Kreyòl La). Èske ou menm ou pami moun k ap adore Bondye “nan lespri ak nan laverite” yo?

Li enpòtan anpil pou w poze tèt ou kesyon sa a. Poukisa? Paske, nan yon priyè Jezi t ap fè, li te montre li nesesè pou yon moun gen konesans egzak sou Bondye. Li te di: “Lavi ki p’ap janm fini an, se pou yo konnen ou, ou menm ki sèl Bondye tout bon an, ansanm ak moun ou voye a: Jezikri.” ​(Jan 17:3). Pa gen dout nan sa, pou w gen espwa w ap jwenn lavi, fò w konnen laverite sou Bondye!

Èske li vrèman posib pou yon moun konnen laverite sou Bondye? Wi, li posib! Men, ki jan l kapab fè sa? Men sa Jezi te di de tèt li ki ede nou konprann ki jan li kapab fè sa: “Se mwen menm ki chemen an. Se mwen menm ki verite a, se mwen menm ki lavi a. Pèsonn pa ka al jwenn Papa a si li pa pase nan mwen.” ​(Jan 14:6). Li te di tou: “Pèsonn pa konn kilès moun Papa a ye, esèpte Pitit la, ak moun Pitit la vle fè konnen li.” —Lik 10:22.

Kidonk, tou sa Jezi Kris, Pitit Bondye a, te anseye yo se kle ki pou ede nou konnen Bondye. Jezi te pwomèt nou: “Si nou menm nou rete nan pawòl mwen, nou va disip mwen vre. Nou va konnen verite a. Epi verite a va libere nou.” —Jan 8:31, 32, Bib Kreyòl La.

Kidonk, ki jan Jezi t ap reponn senk kesyon ki poze nan kòmansman yo?

[Foto nan paj 4]

Èske w ap adore yon Bondye ou pa byen konnen?