Èske Bondye aksepte tout relijyon?

Repons moun yo konn bay:

▪ “Moun ka sèvi Bondye nan nenpòt relijyon.”

▪ “Se pa relijyon k ap sove w, se kè w.”

Ki sa Jezi te di?

▪ “Antre nan pòt jis la. Paske, pòt ki laj la, chemen ki fasil la ap mennen nou tou dwat nan lanmò. Gen anpil moun ki pase ladan li. Men, pòt ki jis la, chemen ki difisil la ap mennen nou tou dwat nan lavi. Pa gen anpil moun ki jwenn li.” ​(Matye 7:13, 14). Jezi pa t kwè nan kèlkeswa relijyon yon moun ye, se Bondye l ap sèvi.

▪ “Lè jou sa a va rive, anpil moun va di m: Mèt, Mèt, se sou non ou nou t’ap bay mesay ki sòti nan Bondye a. Se sou non ou nou te chase move lespri yo. Se sou non ou nou te fè anpil mirak. Lè sa a, m’a di yo: Mwen pat janm konnen nou. Wete kò nou sou mwen, nou menm k’ap fè sa ki mal.” ​(Matye 7:22, 23). Jezi pa aksepte tout moun ki pretann y ap suiv li yo.

GEN anpil moun ki kwè nan Bondye, men ki vrèman atache ak kwayans yo e ak tradisyon y ap suiv. Sepandan, ki pwoblèm ki genyen lè kwayans yo pa ann amoni ak sa Labib, Pawòl Bondye a, anseye? Jezi te montre danje ki genyen lè yon moun ap suiv tradisyon lòm fè lè li te di chèf relijye nan epòk li a pawòl sa yo: “Avèk koutim nou yo, nou fè pawòl Bondye a pase pou anyen.” Apre sa, li te repete pawòl sa yo Bondye te di: “Se nan bouch pèp sa a respekte mwen. Men, kè yo byen lwen mwen. Se tan yo y’ap pèdi, lè y’ap fè sèvis pou mwen. Paske, nan sa y’ap di, se pawòl lèzòm y’ap moutre moun.” —Matye 15:1-9; Izayi [Ezayi] 29:13.

Se pa sèlman kwayans yon moun ki enpòtan, konduit li enpòtan tou. Men sa Labib di konsènan kèk moun ki fè konnen y ap adore Bondye: “Y’ap mache di yo konn Bondye. Men, sa y’ap fè [yo] demanti yo.” ​(Tit 1:16). Anfèt, men sa Labib te di anrapò ak moun k ap viv nan epòk pa nou an: “Y ap renmen plezi pito, pase yo renmen Bondye. Se sou fòm sèlman, y ap genyen devosyon pou Bondye. Men, lavi yo ap nye pisans lan. Moun konsa, evite yo.” — 2 Timote 3:4, 5, Bib Kreyòl La.

Li nesesè pou yon moun sensè, men, se pa sa sèlman ki konte. Poukisa? Paske yon moun kapab sensè, epi li nan erè. Donk, li trèzenpòtan pou nou gen konesans egzak sou Bondye (Women 10:2, 3). Lè nou gen konesans sa a e nou viv ann amoni ak sa Labib anseye, sa ap ede nou fè Bondye plezi (Matye 7:21). Kidonk, vrèman, moun ki nan vrè relijyon an gen bon mobil, yo gen kwayans ki kòrèk e yo fè bon aksyon. E pou yo fè bon aksyon chak jou, sa mande pou yo fè volonte Bondye. —1 Jan 2:17.

Si w ta renmen konnen plis bagay sou sa Labib anseye konsènan Bondye, ou mèt kontakte Temwen Jewova yo pou yo vin etidye Labib avè w gratis lakay ou.

[Antrefilè nan paj 9]

Moun ki nan vrè relijyon an gen bon mobil, yo gen kwayans ki kòrèk e yo fè bon aksyon.