YON jou, manman m te mande m: “Poukisa w refize adore zansèt ou yo? Èske w pa wè se grasa yo ki fè w ap viv? Ou pap genyen yo rekonesans? Ki jan w ka fè pase yon seri koutim ki la depi byen lontan anba pye? Lè w refize onore zansèt nou yo se di w di fason nou adore a pa bon.” Apre sa, manman m pran kriye.

Manman m pa t konn pale avè m konsa. Anvan sa, li te fè aranjman pou yo etidye Labib avè m yon fason pou l te ka refize aksepte yon etid. M te toujou konn obeyi l, e kounye a, li te difisil pou mwen pou m pa suiv konsèy li. Men, fwa sa a, m te fè sa pou m obeyi Jewova. M pa t ap janm ka fè sa san èd Jewova.

Menm jan ak pifò moun nan peyi Japon, fanmi m se Boudis. Men, de mwa sèlman m te fè ap etidye ak Temwen Jewova yo te konvenk mwen Bib la se laverite. Lefètke m te vin konnen mwen gen yon Papa nan syèl la, m te chofe pou m vin konnen l. Manman m avè m te konn pran plezi pou n pale sou sa m t ap aprann yo. M te vin kòmanse asiste reyinyon lè dimanch nan Sal Wayòm nan. Etandone m te kòmanse vin gen plis konesans sou laverite, m te di manman m m pap kontinye patisipe nan seremoni Boudis yo ankò. Bridsoukou, li te vin chanje avè m. Li di m: “Se yon wont sa ye pou n gen yon moun nan fanmi an ki pa renmen zansèt nou yo.” Li te ban m lòd pou m sispann etidye Labib e pou m sispann al nan reyinyon. M pa t ap janm imajine manman m t ap di yon bagay konsa! Li te vin yon lòt moun.

Nan Efezyen 6, m te aprann Jewova vle pou m obeyi paran m. Papa m te dakò ak manman m. Okòmansman, m te di tèt mwen si m koute yo, y ap koute m tou, e fanmi an t ap anpè ankò. Anplis de sa, dat pou m al nan egzamen pou m antre nan lekòl segondè yo t ap pwoche e m te bezwen prepare m pou sa. Donk, m te dakò fè sa yo di m nan pandan twa mwa, men, m te pwomèt Jewova kou twa mwa a fini, m ap rekòmanse al nan reyinyon.

Gen de bagay nan desizyon sa a ki pa t bon. Toudabò, m te panse anyen pa t ap chanje lakay mwen pandan twa mwa sa yo. Epoutan, byen vit, m te kòmanse santi m vid nan domèn espirityèl e m te kòmanse ap vin lwen Jewova. Dezyèmman, olye manman m ak papa m te fè lapè avè m, yo te menm fè plis  presyon sou mwen pou m kanpe tout aktivite ki gen rapò ak vrè adorasyon an.

M te rankontre anpil moun nan Sal Wayòm nan ki te jwenn opozisyon nan fanmi yo. Yo te asire m Jewova t ap ban m fòs (Mat. 10:34-37). Yo te ede m konprann se mwen ki nan pi bon pozisyon pou m ede fanmi m gen lavi. Donk, m te kòmanse priye ak tout kè m e m te vle aprann konte sou Jewova.

Opozisyon te vin sou tout fòm nan fanmi an. Manman m te konn eseye sipliye m e l te konn rezone avè m. Nòmalman, m pa t konn di anyen. Lè m te resi reponn, sa te konn met tansyon nan mitan nou e nou chak te ret konsantre sou pwòp ide nou. M te dwe chèche pi byen konprann santiman manman m e m te dwe demontre respè pou kwayans li paske sa te ka kalme bagay yo. Paran m te vin ban m plis travay pou m fè nan kay la pou anpeche m soti. Pafwa, yo te konn fèmen m deyò oswa yo pa kite manje pou mwen.

Manman m te chèche èd nan men lòt moun. Li te pale ak pwofesè lekòl mwen ki pa t di ni byen ni mal nan koze a. Manman m te mennen m kot patwon travay li pou patwon an te ka eseye konvenk mwen relijyon pa itil anyen. Nan kay la, manman m te telefone plizyè moun nan fanmi an e l t ap kriye pou l sipliye yo pou yo ede l. Sa te deranje m anpil, men, nan reyinyon yo, ansyen yo te ankouraje m reflechi ak tout kantite moun manman m ap bay temwayaj san l pa konnen.

 Apre sa, mwen te gen pou m al nan inivèsite. Paran m yo te planifye pou yo ban m sa yo panse ki se pi bon fòmasyon k ap ede m reyisi nan lavi a. Yo te espere m t ap ka jwenn yon bon djòb. Piske n pa t ka chita pale sou sijè sa a yon fason ki kalm, m te deside ekri manman m ak papa m plizyè lèt pou m esplike yo objektif mwen. Papa m te tèlman fache, li te di m: “Si w panse w ka jwenn yon travay, se swa w jwenn li demen oswa w kite kay la.” M te priye Jewova sou sa. Nan demen, pandan m te nan predikasyon, gen de sè ki te mande m pou m bay pitit yo leson. Papa m pa t kontan pou jan bagay yo te pase a, li te vin sispann pale avè m e l te menm kòmanse ban m vag. Manman m te di pito m te vin yon kriminèl olye m te vin Temwen Jewova.

Pafwa, m te konn mande tèt mwen si Jewova dakò pou m reziste ak paran m yo jis nan pwen sa a. Men, piske m te konn priye anpil e m te konn medite sou vèsè ki pale de lanmou Jewova, m te vin wè opozisyon yon lòt jan e m te vin konprann youn nan rezon ki fè paran m yo ap aji konsa se paske yo gen sousi pou mwen. Jewova te ede m korije panse m pou m te ka konn ki sa pou m fè. Anplis de sa, plis m te patisipe nan travay predikasyon an, se plis m te vin renmen l. Wi, mwen te gen objektif pou m vin pyonye.

Gen kèk sè ki te konnen m vle vin pyonye e yo te konseye m ret tann paran m yo kalme. M te priye Jewova pou m mande l sajès, m te fè rechèch, m te egzamine mobil mwen yo epi m t al pale sou sa ak kèk frè ak sè ki gen matirite. Mwen te rann mwen kont mwen vle fè Jewova plezi. Mete sou sa, mwen pa t gen okenn garanti paran m yo t ap chanje si m tann yo kalme anvan m vin pyonye.

M te antre nan sèvis la nan dènye ane m nan lekòl segondè. Apre m te fin pase yon tan nan sèvis la, m te gen objektif al sèvi kote ki gen plis bezwen. Men, manman m ak papa m pa t vle m kite kay la. Donk, m te tann mwen gen 20 an. Apre sa, pou manman m pa t twò enkyete l pou mwen, m te mande biwo filyal la pou yo voye m al sèvi nan sid peyi Japon kote kèk manm nan fanmi nou t ap viv.

M te jwenn anpil benediksyon nan asiyasyon sa a paske anpil nan moun m te etidye Labib avèk yo te vin batize. Antretan, m te aprann anglè pou m te ka etann sèvis mwen. Te gen de frè pyonye espesyal ki te nan menm kongregasyon avè m. M te ka wè jan yo te chofe e jan yo te konn ede lòt moun. Donk, m te fikse objektif pou m vin pyonye espesyal. Pandan tan sa a, manman m te vin malad byen mal pandan de fwa. Chak fwa sa yo, m te retounen lakay pou m pran swen l. Li te sezi wè sa e l te kòmanse ap byen boule avè m.

Apre setan, Atsushi, youn nan pyonye espesyal m te pale de yo pi wo a, te ekri m yon lèt. Li te di m li t ap reflechi ak maryaj, li te bezwen konn sitiyasyon m e l te bezwen konnen si m gen santiman pou li. M pa t janm gen santiman pou Atsushi e m pa t janm panse l te gen je sou mwen. Apre yon mwa, m te reponn li pou m di l mwen dakò pou youn vin aprann konn lòt pi byen. Nou te wè nou gen anpil pwen ki sanble, nou toule de te vle kontinye nan sèvis aplentan e n te dispoze sèvi kèlkeswa kote yo voye n. Pi devan, nou te vin marye. Se pa ti kontan m te kontan wè papa m, manman m ak anpil manm fanmi nou te vin asiste maryaj nou!

Yon ti tan annapre, pandan n te pyonye pèmanan, Atsushi te vin nome siveyan sikonskripsyon ranplasan. Nou te jwenn lòt benediksyon  tousuit apre. Nou te vin ap sèvi kòm pyonye espesyal, epi apre sa, nou te rantre nan sèvis sikonskripsyon an. Apre n te fin vizite tout kongregasyon nan sikonskripsyon an yon fwa, biwo filyal la te rele nou. Men kesyon yo te poze n: ‘Èske n dakò fè sèvis sikonskripsyon an nan peyi Nepal?’

M t ap mande tèt mwen ki sa paran m yo t apral di lè yo te tande m pral lwen konsa. Donk, m te telefone yo. Se papa m ki te pran telefòn nan, e men repons li te ban m: “Ou pral yon bèl kote.” Yon semèn anvan sa, gen yon zanmi papa m ki te ba l yon liv ki pale de peyi Nepal e papa m te panse se t ap yon bèl kote pou l al vizite.

Nou te jwenn yon lòt benediksyon ankò toutpandan n te byen kontan sèvi bò kot zanmi nou yo nan peyi Nepal. Peyi Bengladèch te vin fè pati sikonskripsyon nou an, se yon peyi ki toupre a men ki diferan anpil. Nou te vin gen tout kalite moun nan tèritwa nou. Apre senkan, yo te voye n al sèvi nan peyi Japon ankò, kote n ap patisipe ak kè kontan nan sèvis sikonskripsyon an kounye a.

Sèvi nan peyi Japon, Nepal, Bengladèch aprann mwen anpil bagay sou Jewova! Chak peyi sa yo gen koutim pa yo ak kilti pa yo. Epi, chak peyi sa yo gen lòt kalite moun ladan yo. M te wè jan Jewova pran swen chak moun, jan l aksepte yo, li ede yo e li beni yo.

Pèsonèlman, Jewova te beni m dèske l te pèmèt mwen vin konnen l, li ban m yon travay pou m fè e l ban m yon bon mari. Li te ede m pran bon desizyon, e kounye a, m gen yon bon relasyon ni avè l ni ak fanmi m. Grasa Jewova, manman m avè m vin bon zanmi ankò. M vrèman rekonesan dèske m fè lapè ni ak Bondye ni ak manman m.