1, 2. a) Ki sa k ka gen enfliyans sou sa n ap gade? b) Ki asirans nou kapab genyen konsènan Wayòm Bondye a?

JAN nou gendwa remake sa, byen souvan, lè plizyè moun te temwen yon evènman, yo tout gendwa pa sonje detay yo menm jan. Menm jan an tou, yon moun kapab twouve sa difisil pou l sonje egzakteman sa yon doktè te di l apre l te fin konsilte l. Li gendwa difisil tou pou yon moun jwenn kle l oswa linèt li alòske yo toupre l. Dapre moun k ap fè rechèch yo, lè yon moun okipe nan plizyè aktivite alafwa, sa gendwa fè l pa remake yon bagay oswa sa gendwa fè l bliye yon bagay, e konsa, li ka aji tankou yon moun avèg. Yo fè konnen sa gen rapò ak fason sèvo nou fonksyone.

² Jodi a, menm jan an tou, gen anpil moun ki aji tankou moun avèg konsènan evènman k ap rive nan monn nan. Yo gendwa dakò gen gwo chanjman ki fèt nan monn nan depi 1914, men, yo pa rive wè vrè siyifikasyon evènman sa yo. Antanke etidyan Labib, nan yon sans, nou konnen Wayòm Bondye a te vini an 1914 lè Bondye te met Jezi Wa nan syèl la. Sepandan, nou konnen gen plis bagay toujou ki dwe fèt pou n jwenn repons pou priyè nou fè lè n di: “Se pou wayòm ou an vini. Se pou volonte w fèt sou tè a kou nan syèl la.” (Mat. 6:10). Li klè, repons sa a ap gen ladan l destriksyon sistèm mechan sa a. Se sèlman lè sistèm  mechan sa a detwi volonte Bondye ap kapab fèt sou tè a kou nan syèl la.

3. Ki byenfè nou jwenn grasa etid nou fè nan Pawòl Bondye a?

³ Lefètke nou etidye Pawòl Bondye a regilyèman, nou kapab wè pwofesi sa a ap reyalize kounye a. Ala yon diferans ki genyen ant nou menm ak pifò moun! Yo tèlman okipe nan aktivite pèsonèl yo ak nan chèche atenn yon seri objektif, yo pa wè prèv klè ki montre Kris ap reye depi 1914, e talè konsa, li pral egzekite jijman Bondye. Sepandan, ann konsidere yon kesyon pèsonèl: Si w se yon moun ki gen plizyè dizèn ane depi w ap sèvi Bondye, èske w toujou sonje siyifikasyon epòk n ap viv la epi w toujou kenbe enpòtans epòk sa a nan lespri w menm jan w te konn fè sa pandan plizyè ane? Menmsi w pa gen lontan depi w vin Temwen, sou ki sa w plis konsantre w? Kèlkeswa repons ou bay la, yon lòt fwa ankò, nou pral analize twa rezon enpòtan ki fè n dwe gen konfyans, talè konsa, Wa Bondye chwazi a pral fè yon seri lòt aksyon yon fason pou volonte Bondye fèt totalman sou tè a.

4, 5. a) Ki sa Jezi ap fè depi 1914? (Gade foto ki nan kòmansman atik la.) b) Ki sa galope twa kavalye yo ap galope a senbolize, e ki jan bagay yo vin ye?

⁴ An 1914, Jezi Kris, Bib la dekri kòm yon moun ki monte sou yon cheval blan, te vin Wa nan syèl la. San pèdi tan, li te derape pou l fin ranpòte laviktwa sou sistèm mechan Satan an. (Li Revelasyon 6:1, 2.) Enfòmasyon nou jwenn nan pwofesi ki nan Revelasyon chapit 6 la fè n wè rezon ki fè n te dwe atann nou kondisyon monn nan t apral deteryore byen vit yonfwa Wayòm Bondye a te fin etabli. T apral gen lagè, rate manje, epidemi ak lòt bagay ki lakòz moun mouri. Pou Bib la dekri evènman sa yo, li sèvi ak imaj twa kavalye k ap galope sou cheval yo e k ap suiv Jezi Kris pye pou pye. — Rev. 6:3-8.

⁵ Jan sa te predi, malgre tout pwomès lèzòm fè pou yo rive travay nan tèt ansanm e nan lapè, pa janm gen “lapè sou tè a” vre. Nou kapab konsidere Premye Gè mondyal la kòm kòmansman yon seri gwo gè, e evènman k ap pase nan monn nan montre sa. Malgre gwo pwogrè monn nan fè nan domèn ekonomik ak syantifik depi 1914, rate manje kontinye fè moun nan monn nan pa santi yo an sekirite. Mete sou sa, ki moun ki pap dakò gen tout kalite maladi, katastwòf natirèl ansanm ak lòt “epidemi mòtèl” ki kontinye ap fè plizyè milyon viktim chak ane? Lefètke evènman sa yo ap fèt toupatou, yo fèt souvan e yo grav anpil, sa montre yo pa t janm konn rive anvan sa nan tout listwa lèzòm. Èske w byen konprann siyifikasyon bagay sa yo?

6. Ki moun ki te rann yo kont pwofesi ki nan Bib la t ap akonpli, e ki sa sa te pouse yo fè?

⁶ Gen anpil moun ki te vin distrè lè Premye Gè mondyal la te eklate a ak lè Grip espayòl la te kòmanse. Sepandan, kretyen Bondye chwazi pou al nan syèl yo te gentan konprann alavans tan janti yo oswa “tan ki fikse pou nasyon yo” t ap fini an 1914 (Lik 21:24). Se vre, yo pa t fin konnen egzakteman ki lè sa t apral rive, men, aktout sa, yo te konnen gen yon bagay enpòtan ki gen rapò ak souvrènte Bondye ki t apral rive an 1914. Yonfwa yo te fin disène se pwofesi ki nan Bib la k ap akonpli, avèk kouraj, yo te fè lòt moun konnen Bondye kòmanse dirije. Efò yo te fè pou preche Wayòm nan te fè yo jwenn gwo pèsekisyon. Yo te jwenn pèsekisyon nan anpil peyi, e pèsekisyon sa a te fè pati akonplisman pwofesi yo tou. Pandan plizyè dizèn ane ki te vin annapre yo, ènmi Wayòm nan te “fè mechanste [y ap fè] yo pase pou lalwa”. Mete sou sa, yo te fè vyolans fizik sou frè nou yo, yo te mete yo nan prizon, e yo te menm egzekite kèk nan yo lè yo pann yo, yo tire yo oswa yo koupe tèt yo. — Sòm 94:20; Rev. 12:15.

7. Ki sa k fè pifò moun pa t rive konprann vrè siyifikasyon evènman ki t ap rive nan monn nan?

 ⁷ Ki sa k fè pifò moun pa t rive konprann siyifikasyon bagay yo byenke yo te gen anpil prèv ki montre Wayòm Bondye a te gentan etabli nan syèl la? Ki sa k fè yo pa t kapab fè lyen ant kondisyon monn nan te ye a ak mesaj ki baze sou pwofesi biblik yo pèp Bondye a t ap preche depi lontan an? Èske se paske pifò moun te konsantre yo sèlman sou sa yo te kapab wè ak je yo (2 Kor. 5:7)? Èske se paske yo te tèlman okipe nan pwòp aktivite yo ki fè yo te vin avèg, e konsa yo pa t ka wè sa Bondye t ap fè yo (Mat. 24:37-39)? Èske kèk nan yo te kite pwopagann Satan t ap fè yo distrè yo (2 Kor. 4:4)? Pou yon moun te ka wè sa k t ap pase nan syèl la, li te dwe gen lafwa ak konpreyansyon espirityèl. Se pa ti kontan nou kontan dèske n pa avèg anrapò ak sa k ap pase toutbonvre yo!

8-10. a) Ki fason 2 Timote 3:1-5 ap akonpli? b) Ki sa k fè n kapab di mechanste vin pi mal toujou?

⁸ Gen yon dezyèm rezon ki fè n kwè pa ret anpil tan pou Wayòm Bondye a pran kontwòl sa k ap fèt sou tè a. Rezon an sèke: Moun ki mechan yo ap vin pi mal toujou. Sa fè prèske yon syèk kounye a depi pwofesi ki nan 2 Timote 3:1-5 yo ap akonpli devan je nou. Anfèt, bagay sa yo gen lontan depi y ap fèt, yo fèt toupatou sou tè a e yo fèt souvan. Èske w pa dakò pwofesi sa a ap reyalize pi plis toujou? Ann egzamine kèk egzanp ki byen montre sa. — Li 2 Timote 3:1, 13.

⁹ Fè yon ti reflechi sou diferans ki genyen ant sa moun te twouve ki chokan nan ane 1940 oswa 1950 yo, ak sa k ap rive jodi a nan kesyon travay, divètisman, spò ansanm ak fason moun abiye. Kounye a, vyolans ak imoralite gaye toupatou. Moun yo ap fè konpetisyon pou wè kiyès ki pi fewòs, ki pi imoral oswa ki pi san pitye pase lòt. Nan ane 1950 yo, sa moun te konn konsidere kòm bagay ki pa kòrèk pou yo pase nan televizyon, kounye a, yo konsidere yo kòm bagay ki nòmal pou fanmi yo gade. Anpil moun dakò omoseksyèl yo jwe yon gwo wòl nan domèn abiman ak divètisman, e omoseksyèl yo menm ap fè piblisite pou fason y ap viv la devan je tout moun. Se pa ti rekonesan nou rekonesan dèske nou konn pwennvi Bondye sou bagay sa yo! — Li Jid 14, 15.

 ¹⁰ Konsa tou, yon kretyen gendwa reflechi sou sa jèn yo te konsidere kòm yon konpòtman rebèl pandan ane 1950 yo ak sa k ap fèt jodi a. Lontan, paran yo te konn ap bay tèt yo pwoblèm dèske pitit yo ap fimen, y ap bwè alkòl oswa dèske y ap danse yon fason ki pa kòrèk, e paran yo te gen rezon pou sa. Jodi a, nou vin twò abitye ak move nouvèl tankou: Yon elèv ki gen 15 an tire sou kamarad lekòl li, li touye de moun epi l blese 13 lòt. Yon gwoup jèn ki sou touye yon tifi ki gen nevan yon fason sovaj, epi yo bat papa tifi a ak yon kouzen l byen bat. Dapre sa yo fè konnen, nan yon peyi ann Azi, mwatye krim ki te fèt pandan 10 ane ki sot pase yo, se jèn ki te fè yo. Èske gen rezon pou yon moun pa dakò bagay yo vin pi mal?

11. Ki sa k fè anpil moun pa rann yo kont bagay yo ap vin pi mal?

¹¹ Se ak rezon apot Pyè te di: “Nan dènye jou yo, ap gen moun k ap pase nou nan rizib, y ap aji selon dezi pa yo, e y ap di: ‘Kote prezans li a li te pwomèt la? Anfèt, depi jou zansèt nou yo kòmanse dòmi nan lanmò, tout bagay rete egzakteman jan yo te ye depi nan kòmansman kreyasyon an.’” (2 Pyè 3:3, 4). Ki sa k ka esplike rezon ki fè kèk moun reyaji konsa? Sanble se paske plis moun yo abitye ak yon sitiyasyon, se mwens y ap gen tandans ba l atansyon. An jeneral, fason sosyete a ap bese nan domèn moral tikras pa tikras gendwa pa choke nou menm jan ak lè se yon moun ki pwòch nou ki chanje konpòtman l bridsoukou. Sepandan, kondisyon moral monn nan k ap degrade tikras pa tikras la reprezante yon danje.

12, 13. a) Ki sa k fè nou pa bezwen dekouraje akoz evènman k ap rive nan monn nan? b) Ki rezònman lè nou fè l k ap ede n fè fas ak kondisyon monn nan ki “difisil pou moun sipòte”?

¹² Se vre, apot Pòl te avèti nou “nan dènye jou yo”, bagay yo t ap “difisil pou moun sipòte”. (2 Tim. 3:1.) Sepandan, sa pa vle di li enposib pou n fè fas ak sa. Kidonk, nou pa bezwen kouri pou reyalite a. Grasa èd Jewova, lespri sen l ansanm ak kongregasyon an, nou kapab rive venk kèlkeswa pwoblèm oswa obstak ki vin sou wout nou. Nou kapab rete fidèl. Bondye ap ban nou ‘pisans ki depase pisans nòmal la’. — 2 Kor. 4:7-10.

¹³ Li bon pou n remake lè Pòl t ap kòmanse pwofesi l te bay konsènan dènye jou yo li te di: “Met sa nan tèt ou.” Pawòl sa yo se yon garanti ki montre sa Pòl t apral di apre yo t ap rive toutbon. Pa gen dout nan sa, sosyete sa a ki lwen Bondye ap kontinye vin pi mal toujou jiskaske Jewova met yon fen ladan l. Dapre sa istoryen yo remake, lè kèk sosyete oswa kèk nasyon ap degrengole nan domèn moral, sosyete sa yo oswa nasyon sa yo toujou detwi. Sepandan, nan tout listwa limanite, monn nan pa t janm rive ba konsa nan domèn moral pase jan l ye jodi a. Anpil moun gendwa chwazi fèmen je yo sou siyifikasyon evènman sa yo, men, pou nou menm, evènman sa yo k ap rive depi 1914 se prèv klè ki montre nou kapab gen konfyans, talè konsa, Wayòm Bondye a pral pase alaksyon.

14-16. Ki twazyèm rezon nou genyen ki fè n kwè Wayòm Bondye a pral “vini” talè konsa?

¹⁴ Gen yon twazyèm rezon ki fè n dwe gen konfyans lafen an toupre. Sa k ap fèt nan mitan pèp Bondye a montre n ap pwoche pi pre fen sistèm nan. Pa egzanp, anvan Wayòm Bondye a te etabli nan syèl la, te gen yon ti gwoup moun Bondye chwazi pou al nan syèl ki te aktif nan sèvis y ap bay Bondye a. Ki sa yo te fè lè kèk bagay yo te panse ki t ap rive an 1914 pa t rive jan yo t ap atann sa? Pifò nan yo te rete fidèl lè yo te jwenn eprèv ak pèsekisyon, e yo te kontinye sèvi Jewova. Rive yon lè, pifò moun Bondye te chwazi pou y al nan syèl la, pou n pa di yo tout, te mouri fidèlman.

 ¹⁵ Men sa Jezi te di nan esplikasyon l t ap bay sou pwofesi konsènan fen sistèm sa a: “Jenerasyon sa a pap pase anvan tout bagay sa yo rive.” (Li Matye 24:33-35.) Nou konprann lè Jezi te di “jenerasyon sa a”, li te fè referans ak de gwoup kretyen Bondye chwazi pou al nan syèl. Premye gwoup la te la an 1914, e byen vit, yo te kapab wè siy ki montre Kris te prezan nan ane sa a. Moun ki te konpoze gwoup sa a pa t sèlman vivan an 1914, men, nan ane sa a oswa anvan ane sa a, Bondye te chwazi yo pa mwayen lespri sen l pou yo vin pitit li. — Wom. 8:14-17.

¹⁶ Dezyèm gwoup moun ki fè pati “jenerasyon sa a”, se yon seri moun Bondye chwazi pou al nan syèl ki t ap viv nan menm epòk ak moun ki nan premye gwoup la. Moun sa yo pa t senpleman ap viv nan menm epòk ak moun ki fè pati premye gwoup la, men tou, yo se moun Bondye te chwazi pa mwayen lespri sen l nan epòk kote moun ki fè pati premye gwoup la te toujou sou tè a. Kidonk, se pa tout moun Bondye chwazi pou al nan syèl k ap viv jodi a ki fè pati “jenerasyon” Jezi te pale de li a. Jodi a, moun ki fè pati dezyèm gwoup la se moun ki gentan granmoun anpil. Se sa k fè, pawòl Jezi te di nou jwenn nan Matye 24:34 la fè n gen konfyans omwen kèk nan moun ki fè pati “jenerasyon sa a pap pase” anvan gwo tribilasyon an kòmanse. Sa dwe fè n gen plis konfyans se yon tikras tan ki rete anvan Wayòm Bondye a detwi mechan yo, epi pou vin gen yon monn nouvo kote jistis pral blayi. — 2 Pyè 3:13.

17. Ki sa n kapab di konsènan twa pwofesi nou sot egzamine la yo?

¹⁷ Ki sa n kapab di konsènan twa pwofesi nou sot egzamine la yo? Se vre, Jezi te di nou pa t ap ka konnen egzakteman jou a ak lè a, e nou pa konnen yo vre (Mat. 24:36; 25:13). Men, jan Pòl te fè konn sa, nou kapab konnen “epòk la”, e nou konnen l vre. (Li Women 13:11.) N ap viv nan epòk sa a, anpalan de dènye jou yo. Si nou bay pwofesi biblik yo ansanm ak sa Jewova Dye ak Jezi Kris ap reyalize yo anpil atansyon, n ap jwenn bonjan prèv ki montre n se toutbon nou toupre fen sistèm sa a.

18. Ki sa k ap ret tann moun ki refize aksepte Wayòm Bondye a?

¹⁸ Tout moun ki refize rekonèt kokennchenn otorite Jewova bay Jezi Kris la, Kavalye ki sou cheval blan an e k ap ranpòte laviktwa a, pral oblije rekonèt erè yo fè a talè konsa. Yo pap jwenn okenn mwayen pou yo chape. Nan moman sa a, anpil nan yo pral rele byen fò tèlman y ap pè, e y ap di: “Ki moun ki ka kanpe?” (Rev. 6:15-17). Sepandan, chapit 7 liv Revelasyon an ban nou repons lan. Vrèmanvre, moun Bondye chwazi pou al nan syèl yo ansanm ak moun ki gen esperans pou viv sou tè a pral “kanpe” nan jou sa a paske y ap gen apwobasyon Bondye. Apre sa, gen “yon gwo foul moun” ki fè pati lòt mouton yo ki pral chape nan gwo tribilasyon an. — Rev. 7:9, 13-15.

19. Antanke moun ki wè prèv klè ki montre dènye jou yo pral fini talè konsa, ki aksepte prèv sa yo e ki aji ann amoni ak yo, ki sa w ap tann ki pou fèt?

¹⁹ Si nou bay pwofesi k ap akonpli nan epòk espesyal n ap viv la tout atansyon nou depi kounye a, nou pap vin distrè akoz tètchaje ki pral gen nan monn Satan an. Anplis de sa, nou pap aji tankou moun ki avèg konsènan vrè siyifikasyon evènman k ap rive nan monn nan. Talè konsa, Kris pral fin ranpòte laviktwa sou monn sa a ki pa konn Bondye lè l pral fè dènye gè a avèk jistis (Rev. 19:11, 19-21). Reflechi sou kantite jwa Bib la ban nou garanti nou pral jwenn alavni! — Rev. 20:1-3, 6; 21:3, 4.