Annou veye menm jan ak Jeremi

“Mwen menm, m’ap veye pou sa m di a rive vre.” — JER. 1:12.

1, 2. Poukisa yo konpare Jewova k ap “veye” ak yon pye amandye?

YOUN nan premye pyebwa ki fè flè sou mòn peyi Izrayèl yo ak mòn Liban yo se pyebwa yo rele amandye a. Flè l yo, ki konn woz oswa blan e ki bèl anpil, kòmanse parèt swa nan fen janvye, swa nan kòmansman fevriye. Non ebre flè sa a vle di “sila k ap leve a”.

² Lè Jewova t ap chwazi Jeremi kòm pwofèt li, Jewova te sèvi ak aspè sa a nan amandye a pou l atire atansyon Jeremi sou yon reyalite enpòtan. Nan kòmansman travay Jeremi antanke pwofèt, Jeremi te fè yon vizyon kote li te wè yon branch pyebwa sa a. Ki sa sa te vle di? Men esplikasyon Jewova te bay: “M’ap veye pou sa m di a rive vre.” ​(Jer. 1:11, 12). Menm jan nan yon sans senbolik pye amandye a “leve” bonè, se konsa tou, Jewova “leve bonè” pou l voye pwofèt li yo al bay pèp li a avètisman konsènan sa k ap rive yo poutèt dezobeyisans yo (Jer. 7:25, NW). Anplis, li pa t pran repo, li te “veye” pou sa l di yo rive. Nan ane 607 anvan epòk nou an, nan lè Jewova te fikse pou sa a, li te jije nasyon Jida a ki te vire do ba li.

3. Ki asirans nou kapab genyen anrapò ak Jewova?

³ Menm jan an tou jodi a, Jewova ap veye pou sa l di yo rive e li enposib pou l pa reyalize pawòl li. Ki jan w santi w lè w aprann sa? Èske w kwè, nan ane 2011 lan, Jewova ap  “veye” pou l reyalize pwomès li yo? Si nou gen dout sou pwomès Jewova yo ki gen pou yo reyalize kanmenm, kounye a se pa moman pou nou kabicha nan domèn espirityèl (Wom. 13:11). Antanke pwofèt Jewova, nan sans sa a, Jeremi pa t kite dòmi pran l. Lè nou egzamine sa Jeremi te fè pou l te kapab kontinye nan asiyasyon Bondye te ba li a e sa k te fè l rete ladan l, sa ap ede nou wè ki jan nou kapab pèsevere nan travay Bondye ban nou an.

Yon mesaj ijan

4. Ki difikilte Jeremi te jwenn lè li t ap anonse mesaj li a, e poukisa mesaj li a te ijan?

⁴ Petèt Jeremi te prèske gen 25 an lè Jewova te ba l asiyasyon antanke yon moun k ap veye (Jer. 1:1, 2). Men, Jeremi te konsidere tèt li kòm yon timoun, e li pa t panse li te vrèman kalifye pou l pale ak granmoun ki t ap viv nan nasyon an. Gen nan yo ki te gen pozisyon ki te ba yo anpil otorite (Jer. 1:6). Li te gen pou l fè konnen moun yo t ap aji mal e li te dwe fè yo konnen jijman Jewova yo ki te bay laperèz. Se te espesyalman pou prèt yo, fo pwofèt yo, dirijan yo ansanm ak moun ki te lage kò yo “nan mechanste” e ki “pa [t] vle chanje” Jeremi te bay mesaj sa a (Jer. 6:13; 8:5, 6). Dapre mesaj Jeremi an, bèl tanp wa Salomon te fè a, kote yo te pratike vrè adorasyon an pandan prèske kat syèk, te gen pou l detwi tou. Pa t ap gen moun nan Jerizalèm ak Jida ankò paske moun ki t ap viv kote sa yo te gen pou y al ann egzil. Pa gen dout nan sa, mesaj Jeremi te gen pou l bay la te ijan!

5, 6. a) Ki jan Jewova sèvi ak gwoup kretyen k ap veye menm jan ak Jeremi yo jodi a? b) Sou ki sa atik sa a pral konsantre?

⁵ Piske Jewova renmen lèzòm, li bay moun yo nan epòk nou an yon gwoup kretyen ki gen pou y al nan syèl. Travay yo se veye epi avèti moun yo Bondye gen pou l jije monn sa a. Menm jan Jeremi te konn fè sa, gwoup kretyen sa yo gen plizyè dizèn lane depi y ap avèti moun yo pou yo fè yo konprann nan ki epòk n ap viv (Jer. 6:17). Bib la fè konnen Jewova gen yon tan fikse pou tout bagay e li pa dousman. Jou jijman l lan ap vini lè pou l vini an nan yon moman lèzòm pap atann. — Sef. 3:8; Mak 13:33; 2 Pyè 3:9, 10.

⁶ Nou bezwen sonje Jewova ap veye e monn nouvo li pwomèt la ap vini nan lè li fikse a. Lefètke gwoup kretyen k ap veye menm jan ak Jeremi yo ansanm ak konpayon yo ki vwe lavi yo bay Jewova konnen sa, sa ta dwe fè yo rann yo kont mesaj yo a ap vin pi ijan chak jou. Ki efè sa gen sou ou? Jezi te fè konnen tout moun bezwen pran pozisyon pou Wayòm Bondye a. Annou egzamine twa kalite ki te ede Jeremi kontinye nan asiyasyon l lan e k ap ede nou fè menm jan an tou.

Lanmou pou moun

7. Esplike ki jan lanmou te pouse Jeremi preche malgre tout difikilte li te rankontre.

⁷ Ki sa k fè Jeremi te kontinye preche malgre li te jwenn difikilte? Se lanmou li te gen pou moun. Jeremi te konnen se fo bèje yo ki te lakòz tout pwoblèm moun yo te genyen yo (Jer. 23:1, 2). Lefètke li te konn sa, sa te ede l fè travay Bondye te ba l fè a avèk lanmou ak konpasyon. Li te vle pou konpatriyòt li yo tande pawòl Bondye a yon fason pou yo pa mouri. Li te tèlman ap enkyete pou yo, li te kriye akoz malè ki t apral tonbe sou yo a. (Li Jeremi 8:21; 9:1.) Liv Lamantasyon an montre byen klè li te renmen non Jewova anpil e li te renmen pèp la anpil. Li te jalou anpil pou non Jewova e li te enkyete anpil pou pèp la (Lam. 4:6, 9). Jodi a, lè w wè jan moun yo “depafini e yo [...] lage tankou mouton ki san bèje”, èske w pa santi w anvi fè yo konnen bon nouvèl Wayòm Bondye a, yon nouvèl ki ka rekonfòte yo? — Mat. 9:36.

8. Ki sa ki montre Jeremi pa t vin egri malgre li te soufri?

⁸ Jeremi te soufri anba men moun li te vle ede yo, sepandan li pa t rann mal pou mal ni li pa t vin egri. Li te gen pasyans ak bonte. Li te menm montre kalite sa yo anvè Sidkiya, yon wa ki te kòwonpi. Menm apre wa sa a te fin  bay pèmisyon pou yo touye l, li te sipliye wa a pou wa a obeyi Jewova (Jer. 38:4, 5, 19, 20). Èske nou renmen moun menm jan ak Jeremi?

Bondye ba li kouraj

9. Ki jan nou fè konnen se Bondye ki te bay Jeremi kouraj?

⁹ Premye fwa Jewova te pale ak Jeremi, Jeremi te eseye rale kò l dèyè. Apati de sa, nou kapab konprann se pa grasa pwòp fòs li li te vin gen kran e li te kontinye fèm nan asiyasyon l. Pandan karyè Jeremi antanke pwofèt, li te montre li gen yon kouraj estrawòdinè, men, se Bondye ki te bay Jeremi kouraj sa a paske Jeremi te konte sou li nèt. Vrèmanvre, Jewova te kanpe bò kote pwofèt la tankou yon “vanyan gason”, sa vle di li te soutni Jeremi e li te ba l fòs pou l fè travay li te ba l fè a (Jer. 20:11). Jeremi te tèlman gen yon repitasyon estrawòdinè antanke yon moun ki te gen kran ak kouraj, pandan ministè Jezi sou tè a, gen kèk moun ki te panse Jezi se Jeremi ki te resisite. — Mat. 16:13, 14.

10. Poukisa nou kapab di rès kretyen Bondye chwazi pou y al nan syèl yo gen “otorite sou pèp yo ak sou gouvènman yo”?

¹⁰ Antanke “wa tout nasyon”, Jewova te bay Jeremi asiyasyon pou l bay tout moun ki sou latè ak tout chèf yon mesaj (Jer. 10:6, 7). Men, nan ki sans rès kretyen Bondye chwazi pou y al nan syèl yo gen “otorite sou pèp yo ak sou gouvènman yo”? (Jer. 1:10.) Menm jan ak Jeremi, gwoup kretyen k ap veye menm jan avè l yo resevwa yon asiyasyon nan men Souvren linivè a. Kretyen sa yo ki gen esperans pou y al nan syèl gen otorite pou yo anonse mesaj jijman Jewova yo bay pèp yo ak gouvènman yo. Piske Bondye Trèwo a ba yo otorite sa a, yo sèvi ak Pawòl li enspire a yon fason ki klè pou yo fè konnen Bondye gen pou l detwi pèp yo ak nasyon yo lè lè a rive e l ap itilize mwayen l vle a pou l fè sa (Jer. 18:7-10; Rev. 11:18). Gwoup kretyen sa yo detèmine pou yo pa sispann anonse mesaj jijman Jewova yo sou tout tè a.

11. Ki sa k ap ede nou kontinye preche malgre tout difikilte nou jwenn?

¹¹ Li nòmal pou nou santi nou dekouraje pafwa lè nou jwenn opozisyon, lè moun pa enterese nan mesaj nou an, oubyen lè nou rankontre difikilte nan lavi a (2 Kor. 1:8). Sepandan, menm jan ak Jeremi, annou kenbe nan asiyasyon nou genyen an. Pinga nou kite dekourajman pote nou ale. Annou kontinye sipliye Bondye, annou kontinye konte sou li e annou kontinye “mete kran sou nou” toutpandan n ap chèche èd nan men l (1 Tes. 2:2). Antanke vrè adoratè Bondye, nou bezwen kontinye pran responsablite nou devan l. Destriksyon Jerizalèm tan lontan an, ki te enfidèl, se yon egzanp sou sa k pral rive Lakretyente e nou bezwen pran detèminasyon pou nou kontinye fè moun yo konnen destriksyon sa a ap vini. Se pa “ane byenveyans Jewova a” sèlman gwoup kretyen k ap veye menm jan ak Jeremi yo ap kontinye pwoklame, men y ap kontinye pwoklame “jou vanjans Bondye nou an” tou. — Iza. 61:1, 2, NW; 2 Kor. 6:2.

Yon jwa ki soti nan kè l

12. Poukisa nou kapab di Jeremi te kenbe jwa l, e ki sa k te ede l fè sa?

¹² Jeremi te jwenn lajwa nan travay li t ap fè a. Men sa li te di Jewova: “Lè ou pale avè m, mwen koute tou sa ou di m. Pawòl ou yo, se tout plezi m. Yo fè kè m kontan, paske yo mete m apa pou ou, Senyè.” ​(Jer. 15:16). Se te yon privilèj pou Jeremi pou l reprezante vrè Dye a e pou l preche pawòl li. Li enteresan pou n remake lè Jeremi te reflechi sou sa moun ki t ap pran plezi sou li yo t ap di l, li te pèdi lajwa l. Sepandan, lè l te reflechi sou jan mesaj li a te bèl e li te enpòtan, li te vin gen lajwa ankò. — Jer. 20:8, 9.

13. Poukisa li enpòtan pou nou nouri tèt nou ak “gwo manje” si nou vle kenbe jwa nou?

¹³ Pou nou kapab kenbe jwa nou nan travay predikasyon n ap fè nan epòk pa nou an, nou bezwen nouri tèt nou ak “gwo manje”, sa vle di verite ki pwofon ki nan Pawòl Bondye a (Ebre 5:14). Lè nou etidye afon, sa fòtifye  lafwa nou (Kol. 2:6, 7). Etid konsa fè nou rann nou kont aksyon nou ka touche kè Jewova. Si nou gen difikilte pou nou jwenn tan pou nou fè lekti Labib e pou nou etidye Labib, nou ta dwe reegzamine fason nou jere tan nou. Menmsi se kèk minit sèlman nou pase ap etidye epi medite chak jou, sa ap ede nou vin pi pwòch Jewova e sa ap ‘fè kè nou kontan’ menm jan ak Jeremi.

14, 15. a) Ki rezilta Jeremi te jwenn poutèt li pa t lage asiyasyon li te genyen an? b) Ki sa pèp Bondye a konnen konsènan travay predikasyon an?

¹⁴ Jeremi te anonse mesaj avètisman ak mesaj jijman Jewova yo san rete, men, sa ki te pi enpòtan pou li se te ‘pou l bati epi plante’ nan sans senbolik (Jer. 1:10). Travay bati ak plante li te fè a te pote fwi. Gen kèk Juif ak kèk moun ki pa t Juif ki te chape vivan lè yo te detwi Jerizalèm nan ane 607 anvan epòk nou an. Rekabit yo, Ebèd-Melèk ak Bawouk fè pati moun sa yo (Jer. 35:19; 39:15-18; 43:5-7). Zanmi sa yo Jeremi te genyen yo ki te fidèl e ki te gen krentif pou Bondye reprezante moun k ap viv jodi a ki gen esperans pou yo viv sou tè a e ki se konpayon gwoup kretyen k ap veye menm jan ak Jeremi yo. Gwoup kretyen sa yo k ap veye a pran anpil plezi pou yo fòtifye lafwa “gwo foul moun” ki se konpayon yo a (Rev. 7:9). Menm  jan an tou, konpayon fidèl sa yo jwenn anpil satisfaksyon lè yo ede moun ki sensè vin konn laverite.

¹⁵ Moun ki fè pati pèp Bondye a konnen lè yo patisipe nan travay predikasyon an, yo rann moun ki sensè yo yon sèvis e yo adore Jewova anmenmtan. Kit moun yo koute nou kit yo pa koute nou, nou jwenn lajwa nan sèvis sakre n ap bay Jewova a grasa travay predikasyon an. — Sòm 71:23; li Women 1:9.

Annou kontinye “veye”!

16, 17. Ki jan Revelasyon 17:10 ak Abakouk 2:3 montre n ap viv nan yon epòk kote nou bezwen aji ann ijans?

¹⁶ Pwofesi Bondye enspire ki nan Revelasyon 17:10 la montre n ap viv nan yon epòk kote nou bezwen aji ann ijans. Setyèm wa a, pisans mondyal Ameriken yo fòme ansanm ak Anglè yo, vin egziste nan epòk pa nou an. Men sa nou li konsènan wa sa a: “Men lè [setyèm pisans mondyal la] rive, l ap rete pou yon ti tan.” Kounye a, “ti tan” sa a prèt pou rive nan bout li. Men asirans pwofèt Abakouk ban nou konsènan fen sistèm sa a: “Vizyon an toujou pou tan fikse a, [...] kontinye tann li paske l ap reyalize kanmenm. Li pap anreta.” — Aba. 2:3, NW.

¹⁷ Poze tèt ou kesyon ki vin annapre yo: ‘Èske fason m viv montre mwen konnen li enpòtan pou m aji ann ijans? Èske fason m viv montre m ap tann lafen an vini? Èske desizyon m ak priyorite m montre mwen pa panse lafen an prèt pou vini, oubyen èske yo montre mwen pa kwè l ap janm vini?’

18, 19. Poukisa kounye a se pa moman pou nou ralanti nan sèvis nou?

¹⁸ Travay gwoup kretyen k ap veye yo ap fè a poko fini. (Li Jeremi 1:17-19.) Nou vrèman kontan lefètke rès kretyen ki pral nan syèl yo kanpe byen djanm tankou “yon poto fè” e tankou “yon lavil ak gwo miray ranpa”. Yo “mare laverite nan ren” yo nan sans y ap kite Pawòl Bondye a fòtifye yo jiskaske yo fini travay yo gen pou yo fè a (Efe. 6:14). Moun ki fè pati gwo foul la gen menm detèminasyon an e yo soutni gwoup kretyen k ap veye menm jan ak Jeremi yo nan asiyasyon Bondye ba yo a.

¹⁹ Kounye a, se pa moman pou nou ralanti sou aktivite n ap fè pou Wayòm nan, men se moman pou nou eseye konprann sans pawòl ki nan Jeremi 12:5 yo. (Li vèsè a.) Nou tout gen pwoblèm pa nou e nou dwe andire yo. Nou kapab konpare tès lafwa nou jwenn yo ak “moun” n ap fè kous avèk yo. Antouka, pandan “gwo tribilasyon” an ap pwoche, nou kapab atann n ap jwenn plis difikilte nan lavi a (Mat. 24:21). Nou kapab konpare lit nou pral oblije mennen ak gwo difikilte n ap gen pou n jwenn yo ak ‘yon kous ak chwal’. Sa mande anpil andirans pou yon moun kenbe tèt ak chwal k ap kouri. Donk, li enpòtan pou nou andire pwoblèm nou genyen jodi a paske yo gendwa ap prepare nou pou pwoblèm n ap bezwen andire pi devan yo.

20. Ki sa w detèmine pou w fè?

²⁰ Nou tout nou kapab imite Jeremi e nou kapab kontinye tennfas nan vrè adorasyon an! Gen kèk kalite Jeremi te genyen tankou lanmou, kouraj ak lajwa, ki te ede l sèvi Jewova fidèlman pandan 67 an. Bèl flè pye amandye yo genyen yo fè nou sonje Jewova ap “veye” pou l fè sa l di yo rive. Se sa k fè nou menm tou, nou gen bonjan rezon pou nou fè menm jan ak Jewova. Si Jeremi te kontinye “veye”, nou menm tou nou kapab fè sa.

Èske nou sonje?

• Ki jan lanmou te ede Jeremi kontinye nan asiyasyon l lan?

• Poukisa nou bezwen Bondye ban nou kouraj?

• Ki sa k te ede Jeremi kenbe jwa l?

• Poukisa w dwe kontinye “veye”?

[Kesyon]

[Foto nan paj 31]

Èske w ap kontinye preche menm lè w jwenn opozisyon?