Annou “ pran pozisyon kont Satan ” menm jan ak Jezi

“ Pran pozisyon kont Satan, la kouri kite nou. ” — JAK 4:7.

1. Ki opozisyon Jezi te konnen li t ap jwenn sou tè a, e ki jan sa t ap gen pou fini ?

JEZI KRIS te konnen li t ap gen pou l fè fas ak opozisyon Dyab la. Sa te parèt klè nan pawòl Bondye te di sèpan an, oswa espri rebèl ki mechan ki te pale pa mwayen sèpan an : “ Ou menm ak fanm lan [pati selès òganizasyon Jewova a], m’ap fè nou lènmi yonn ak lòt. Pitit pitit pa l’ ak pitit pitit pa ou ap lènmi tou. Pitit pitit li [Jezi Kris] ap kraze tèt ou, epi ou menm w’ap mòde l’ nan talon pye l’. ” ​(Jen. 3:14, 15 ; Rev. 12:9). Mòde yo t ap mòde Jezi nan talon an te vle di yo t ap touye l, men se t ap pou yon ti tan sèlman, paske Jewova t ap resisite l pou l gen laglwa nan syèl la. Sepandan, kraze Jezi ap kraze tèt sèpan an vle di Dyab la ap gen pou l pran yon kou k ap touye l nèt. — Li Travay 2:31, 32 ; Ebre 2:14.

2. Ki sa k fè Jewova te gen konfyans Jezi t ap rive opoze ak Dyab la ?

² Jewova te gen konfyans Jezi t ap rive akonpli misyon l lan byen e li t ap opoze ak Dyab la pandan l sou tè a. Sa k fè Jewova te gen konfyans sa a ? Se paske se li ki te kreye Jezi nan syèl la depi lontan, li te suiv li byen e li te konnen “ ouvriye abil ” li a li te fè “ an premye nan tout kreyasyon an ” t ap rete obeyisan e li t ap rete fidèl. (Pwo. 8:22-31, NW ; Kol. 1:15, NW.) Kidonk, lè Bondye te voye Jezi sou tè a e lè li te kite Dyab la teste Jezi jiska lamò, li te gen  konfyans sèl Pitit li fè a t ap ranpòte laviktwa. — Jan 3:16.

Jewova pwoteje sèvitè l yo

3. Ki jan Dyab la aji avèk sèvitè Jewova yo ?

³ Jezi te pale de Dyab la kòm “ chèf k’ap dominen lemonn lan ” e li te avèti disip li yo y ap jwenn pèsekisyon, menm jan li menm li te jwenn pèsekisyon (Jan 12:31 ; 15:20). Monn nan, ki anba pouvwa Satan Ledyab, rayi vrè kretyen yo paske y ap sèvi Jewova e y ap preche sa ki jis (Mat. 24:9 ; 1 Jan 5:19). Dyab la vize sitou rès kretyen wen yo ki pral dirije avèk Kris nan Wayòm selès li a pou l pèsekite yo. Li vize tou plizyè milyon Temwen Jewova ki gen esperans pou yo viv nan yon paradi sou tè a pou toutan. Men ki avètisman Pawòl Bondye a ban nou : “ Dyab la, lènmi nou an, ap veye nou tankou yon lyon ki move, k’ap chache moun pou l’ devore. ” — 1 Pyè 5:8.

4. Ki sa ki pwouve pèp Bondye a reyisi opoze ak Dyab la nan epòk nou an ?

⁴ Antanke òganizasyon ki gen sipò Jewova Dye, nou reyisi opoze ak Dyab la. Annou egzamine kèk egzanp. Pandan 100 ane ki sot pase yo, gen kèk nan rejim diktatè ki te pi di yo ki te eseye elimine Temwen Jewova yo. Men, kantite Temwen yo kontinye ogmante e li prèske rive 7 000 000 nan plis pase 100 000 kongregasyon ki gen sou tout tè a. Poutan, se rejim diktatè fewòs ki te pèsekite sèvitè Jewova yo, ki pa egziste ankò.

5. Ki jan Izayi 54:17 akonpli nan ka sèvitè Jewova yo ?

⁵ Men sa Bondye te pwomèt kongregasyon Izrayèl tan lontan an, yon kongregasyon li te konsidere kòm madanm li : “ Tout zam y’a fè pou sèvi kont ou yo p’ap fè ou anyen. W’a gen repons nan bouch ou pou tout moun ki va akize ou nan tribinal. Se sa m’ap fè pou tout sèvitè m’ yo. Se mwen k’ap defann kòz yo. ” ​(Iza. 54:11, 17). Jewova kenbe pwomès sa a an favè pèp li a sou tout tè a pandan epòk “ dènye jou yo ”. (2 Tim. 3:1-5, 13). Nou kontinye opoze ak Dyab la, e pa gen okenn zam li eseye itilize kont nou pou l elimine nou ki reyisi, paske Jewova bò kote nou. — Sòm 118:6, 7.

6. Ki sa pwofesi Dànyèl la fè nou konnen anrapò ak dominasyon Dyab la ?

⁶ Fen sistèm mechan ki la kounye a ap pwoche rapidman. Lè l va rive, dominasyon Satan an ak tout sa k makònen avèk li pral elimine nèt. Men sa pwofèt Dànyèl te anonse anba enspirasyon Bondye : “ Nan jou wa sa yo [sa ki la nan epòk nou an], Bondye nan syèl la ap tabli yon wayòm [nan syèl la] ki pap janm kraze. E yo pap pase wayòm nan bay okenn lòt pèp. Li pral krabinen tout wayòm sa yo [ki la kounye a], e l ap mete yon fen nan yo, epi li menm l ap la pou tan endefini. ” ​(Dàn. 2:44, NW). Lè sa rive, dominasyon Satan an ak dominasyon lèzòm enpafè pral disparèt. Tout sa ki gen rapò ak sistèm Dyab la etabli a ap disparèt pou toutan, e Wayòm Bondye a pral dirije tout tè a san okenn opozisyon sou tout tè a. — Li 2 Pyè 3:7, 13.

7. Ki jan nou fè konnen chak sèvitè Jewova kapab reyisi opoze ak Dyab la ?

⁷ Pa gen dout nan sa, Jewova ap pwoteje òganizasyon l lan e òganizasyon an ap pwospere nan domèn espirityèl. (Li Sòm 125:1, 2.) E nou menm pèsonèlman ? Bib la fè nou konnen nou ka reyisi opoze ak Dyab la menm jan Jezi te fè sa. Anfèt, pwofesi Kris te bay pa mwayen apot Jan an demontre, malgre opozisyon Satan, gen “ yon gwo foul ” moun ki gen esperans pou yo viv sou tè a ki pral sove nan fen sistèm nan. Ekriti yo montre yo pral rele byen fò : “ Se Bondye nou an ki chita sou fòtèy la. Se li menm ansanm ak ti Mouton an [Jezi Kris] ki vin delivre nou. ” ​(Rev. 7:9-14). Yo pale de kretyen wen yo kòm moun ki pote laviktwa sou Satan e “ lòt mouton yo ”, ki se konpayon yo, reyisi opoze ak li tou (Jan 10:16 ; Rev. 12:10, 11).  Men, pou yo rive fè sa, sa mande pou yo fè bonjan efò e pou yo priye ak tout kè yo pou yo ‘ delivre anba mechan an ’. — Mat. 6:13.

Yon egzanp san fay nan kesyon opoze ak Dyab la

8. Selon sa ki ekri nan Bib la, ki premye tantasyon Dyab la te met devan Jezi nan dezè a, e kòman Jezi te reyaji ?

⁸ Dyab la te eseye kraze entegrite Jezi. Nan dezè a, Satan te sèvi ak tantasyon pou l te ka fè Jezi dezobeyi Jewova. Men, Jezi te bay yon egzanp pafè nan kesyon opoze ak Satan an. Sandout, Jezi te grangou anpil apre l te fin pase 40 jou ak 40 nuit ap jene. Satan di l : “ Si ou se Pitit Bondye, bay wòch sa yo lòd pou yo tounen pen. ” Men, Jezi te refize sèvi ak pouvwa Bondye te ba li a nan pwòp avantaj pa l. Olye Jezi te fè sa Satan mande l la, li te di : “ Men sa ki ekri : Moun pa kapab viv ak manje ase. Yo bezwen tout pawòl ki soti nan bouch Bondye tou. ” — Mat. 4:1-4 ; Det. 8:3.

9. Poukisa nou dwe reziste lè Dyab la ap chèche itilize dezi natirèl nou yo pou l fè nou fè sa k mal ?

⁹ Jodi a, Dyab la ap chèche itilize dezi natirèl sèvitè Jewova yo genyen pou l fè yo fè sa k mal. Se sa k fè, nou dwe gen detèminasyon pou nou reziste kont dezi seksyèl imoral yo ki kouran nan vye monn sa a. Pawòl Bondye a di byen klè : “ Nou konnen byen pwòp moun ki mechan p’ap resevwa anyen nan peyi kote Bondye wa a. Pa twonpe tèt nou : moun k’ap viv nan dezòd, moun k’ap sèvi zidòl, moun k’ap viv nan adiltè, moun pèvèti k’ap sèvi fanm ak fanm, gason ak gason [...] p’ap resevwa anyen nan peyi kote Bondye wa a. ” ​(1 Kor. 6:9, 10). Kidonk, li klè, moun k ap mennen yon vi ki imoral e ki refize chanje pap gen posiblite viv nan monn nouvo Bondye a.

10. Selon Matye 4:5, 6, ak ki lòt tantasyon Satan te sèvi pou l eseye kraze entegrite Jezi ?

¹⁰ Men sa Bib la di anrapò ak youn nan tantasyon Jezi te jwenn nan dezè a : “ Apre sa, grandyab la mennen l’ lavil Jerizalèm. Li mete l’ kanpe sou pwent fetay tanp lan. Li di Jezi konsa : Si ou se Pitit Bondye, lage kò ou anba. Paske, men sa ki ekri : Bondye va bay zanj li yo lòd pou yo veye sou ou. Y’a pote ou nan men yo, pou ou pa kase zòtèy pye ou sou okenn wòch. ” ​(Mat. 4:5, 6). Petèt si Jezi te fè sa, se t ap yon kokenn espektak ki t ap montre se li ki Mesi a. Men, an reyalite, se t ap yon aksyon ki deplase, ki t ap demontre li gen ògèy, yon aksyon Bondye pa t ap dakò avè l ni li pa t ap soutni l ladan l. Yon lòt fwa ankò, Jezi te kontinye mache nan entegrite l devan Jewova e li te site Ekriti yo pou l reponn Satan. Li te di l : “ Men sa ki ekri tou : Ou pa dwe seye sonde Mèt la [“ Jewova ”, NW], Bondye ou. ” — Mat. 4:7 ; Det. 6:16.

11. Ki fason Satan kapab twonpe nou, e ki rezilta sa ka bay ?

 ¹¹ Satan ka fè nou gen tantasyon pou nou chèche laglwa divès fason. Li ka fè nou imite mòd ki gen nan monn nan nan fason nou abiye ak nan aparans nou oswa li ka fè nou patisipe nan detant ki pa kòrèk. Men, si nou pa suiv konsèy Bib la e nou imite monn nan, èske nou ka atann pou zanj yo pwoteje nou kont move konsekans konduit nou ? Byenke wa David te repanti pou peche l te fè ki te anrapò ak Batcheba yo, li te sibi konsekans aksyon l yo (2 Sam. 12:9-12). Pinga nou mete Jewova aleprèv nan move fason, pa egzanp, lè nou chèche vin zanmi monn nan. — Li Jak 4:4 ; 1 Jan 2:15-17.

12. Ki tantasyon yo rapòte nan Matye 4:8, 9 Pitit Bondye a te sibi, e ki jan l te reyaji ?

¹² Yon lòt fason Dyab la te chèche tante Jezi nan dezè a, se lè l te ofri l pouvwa politik. Satan te montre Jezi tout wayòm ki te nan monn nan ak glwa yo, epi li di l : “ M’ap ba ou tout bagay sa yo, si ou mete ou ajenou devan m’ pou ou adore m’. ” ​(Mat. 4:8, 9). Ala malveyan Satan te montre li malveyan lè l te chèche jwenn adorasyon ki pou Jewova a e l te eseye fè Jezi vin enfidèl devan Jewova ! Te gen yon tan, zanj sa a te fidèl, men kòm li te kontinye ap reflechi sou dezi l te genyen pou yo adore l, li te vin tounen Satan Ledyab, yon tantatè k ap pratike sa k mal, ki plen konvwatiz e ki mechan (Jak 1:14, 15). Kontrèman ak li, Jezi li menm te detèmine pou l rete fidèl devan Papa l ki nan syèl la, e se poutèt sa li te di : “ Wete kò ou sou mwen, Satan. Paske, men sa ki ekri : Se Mèt la, Bondye ou, pou ou adore, se li menm sèl pou ou sèvi. ” Konsa, yon lòt fwa ankò, Jezi te montre li opoze ak Dyab la nan fason kategorik li te pale avè l. Pitit Bondye a pa t vle fè pati monn Satan an e li pa t ap janm adore Dyab la. — Mat. 4:10 ; Det. 6:13 ; 10:20.

“ Pran pozisyon kont Satan, la kouri kite nou ”

13, 14. a) Lè Satan te ofri Jezi tout wayòm ki gen nan monn nan, ki sa l te ofri l an reyalite ? b) Ki jan Satan eseye kòwonp nou ?

¹³ Lè Dyab la te montre Jezi tout wayòm ki gen nan monn nan, li te ofri l pouvwa ak otorite okenn moun potko janm gen anvan sa. Satan te espere sa Jezi te wè yo t ap atire l e yo t ap konvenk li pou l aksepte vin lidè politik ki gen plis pisans sou tè a. Jodi a, Dyab la pa ofri nou pou l ban nou wayòm, men li sèvi ak je nou, zòrèy nou e ak lespri nou pou l eseye kòwonp kè nou.

¹⁴ Se Dyab la k ap dirije monn sa a. Kidonk, li kontwole medya yo. Se sa k fè se pa etonan si sa monn nan ofri pou moun gade, pou yo koute oswa pou yo li chaje ak imoralite ansanm ak vyolans ladan yo. Nan reklam y ap fè pou bagay ki nan monn nan, yo eseye fè nou anvi achte yon pakèt bagay nou pa bezwen. Konsa, se toutan Dyab la ap tante nou ak bagay materyèl ki parèt bèl nan je nou, ki parèt enteresan nan zòrèy nou e nan lespri nou. Men, lè nou refize gade bagay ki pa ann amoni ak Labib, nou refize koute yo e nou refize li yo, anfèt se kòmsi nou di : “ Wete kò ou sou mwen, Satan. ” Konsa, nou imite Jezi lè nou fèm e lè nou deside rejte monn Satan an ki sal. Lè nou idantifye tèt nou kòm Temwen Jewova e kòm disip Kris avèk kouraj nan travay nou, nan lekòl nou, nan vwazinaj nou e nan fanmi nou, nou montre aklè tou nou pa fè pati monn Satan an. — Li Mak 8:38.

15. Poukisa nou dwe toujou rete vijilan pou nou reyisi opoze ak Dyab la ?

¹⁵ Apre Dyab la te fin echwe nan twazyèm tantativ li te fè pou l fè Jezi vin enfidèl devan Bondye a, Labib di ‘ grandyab la te kite l’ ’. (Mat. 4:11.) Sepandan, Satan pa t gen entansyon sispann tante Jezi, paske Labib di : “ Apre Satan fin sonde Jezi tout jan sa yo [nan dezè a], li kite l’ jouk la jwenn yon lòt okazyon. ” ​(Lik 4:13). Nou ta dwe di Jewova mèsi lè nou reyisi  opoze ak Dyab la. Men tou, nou ta dwe kontinye chèche jwenn èd Bondye, paske Dyab la ap tounen tante nou nan lòt okazyon ki bon pou li, e se pa fòseman nan moman n ap atann l ap fè sa. Kidonk, nou dwe toujou rete vijilan e nou dwe dispoze pèsevere nan sèvis sakre n ap bay Jewova a, kèlkeswa eprèv nou ka rankontre.

16. Ki fòs pisan Jewova ban nou, e poukisa nou ta dwe priye pou nou jwenn li ?

¹⁶ Yon bagay ki ka ede nou nan efò n ap fè pou nou opoze ak Dyab la, se lespri sen Bondye, pi gwo fòs ki egziste nan linivè a. Se sa k fè nou bezwen priye Bondye pou li ban nou fòs sa a. L ap ede nou fè yon seri bagay nou pa t ap janm ka fè ak pwòp fòs pa nou. Jezi te bay disip li yo asirans yo kapab jwenn lespri sen Bondye. Men sa l te di yo : “ Si nou menm ki [enpafè, donk nan yon sèten sans ki] mechan jan nou mechan an, nou konn bay pitit nou bon bagay, se pa Papa nou ki nan syèl la ki pou ta refize ban nou Sentespri l’, lè nou mande l’ li. ” ​(Lik 11:13). Annou kontinye priye Jewova pou nou jwenn lespri sen l. Si nou gen fòs sa a, pi gwo fòs ki te ka egziste a, n ap rive pote laviktwa paske l ap ede nou kenbe fèm nan detèminasyon nou genyen pou nou opoze ak Dyab la. Nonsèlman nou bezwen priye Jewova regilyèman e ak tout kè nou, men tou, nou bezwen mete tout ekipman konba li ban nou an yon fason “ pou nou ka kenbe tèt anba riz Satan ”. — Efe. 6:11-18.

17. Ki sa k te fè kè Jezi kontan e ki sa k te ede l opoze ak Dyab la ?

¹⁷ Gen yon lòt bagay ki te ede Jezi opoze ak Dyab la, e menm bagay sa a ka ede nou tou. Men sa Labib di : “ [Jezi] pa pran wont sa a pou anyen, paske li te toujou chonje apre l’ te fin soufri a, Bondye t’ap fè kè l’ kontan. Kifè koulye a li chita sou bò dwat fotèy Bondye a. ” ​(Ebre 12:2). Nou ka gen kè kontan menm jan an lè nou soutni souvrènte Jewova, lè nou onore non l e lè nou toujou mete rekonpans lavi etènèl la devan nou. Se pa ti kontan nou pral kontan lè Satan ak tout sa l te fè yo pral disparèt, lè ‘ moun ki soumèt devan Bondye yo pral resevwa peyi a [“ tè a ”, NW] pou byen yo e lè y’a viv ak kè poze nèt ale ’ ​(Sòm 37:11) ! Kidonk, annou kontinye opoze ak Dyab la menm jan ak Jezi. — Li Jak 4:7, 8.

Ki repons nou ta bay ?

• Ki sa k pwouve Jewova pwoteje pèp li a ?

• Ki jan Jezi te kite yon egzanp nan fason li te opoze ak Satan ?

• Bay kèk fason nou ka opoze ak Dyab la.

[Kesyon]

[Foto nan paj 29]

Lè nou zanmi monn sa a, sa ap fè nou vin lènmi Bondye.

[Foto nan paj 31]

Jezi te refize òf Satan te fè l pou l te ba l tout wayòm ki gen nan monn nan.