• Yon moun Bondye chwazi. “Se mwen menm ki mete wa m nan [...], m ap ba w nasyon yo kòm eritaj pa w, m ap ba w tout tè a kòm byen pa w.” — Sòm 2:6, 8.

• Yon eritye wa David. “Gen yon timoun ki vin fèt pou nou. Yo ban nou yon pitit gason. [...] Gouvènman l lan ap kontinye gen plis pouvwa e lapè ap kontinye blayi nètale sou twòn David la e sou wayòm li an, pou wayòm nan ka byen tabli.” — Ezayi 9:6, 7.

• Fèt nan vil Betleyèm. “O Betleyèm [...], se lakay ou sila a ki pral dirije [...] pou mwen an ap soti, [...] dominasyon l lan ap rive jis nan dènye bout tè a.” — Miche 5:2, 4.

• Yon moun yo rejte e yo touye. “Moun te meprize l, epi nou pa t pran l pou anyen. [...] yo te pèse l pou bagay mal nou fè yo. Yo te kraze l pou peche nou yo.” — Ezayi 53:3, 5.

• Leve sot nan lanmò e jwenn glwa. “Ou pap kite m nan Tonm, ou pap kite sèvitè fidèl ou a rete nan twou a. [...] Wi, bò kote w, se lajwa pou toutan.” — Sòm 16:10, 11.

Nan tout listwa lèzòm, se yon sèl moun ki byen mache ak sa yo te anonse konsènan pi bon Dirijan an, moun sa a se Jezi Kris. Anfèt, gen yon zanj ki te di Mari, maman Jezi: ‘Bondye ap ba li twòn David, papa l. [. . .] e Wayòm li an pap janm fini.’ — Lik 1:31-33.

Jezi pa t janm vin yon dirijan sou tè a. Olye de sa, li gen pou l dirije limanite depi nan syèl la antanke Wa nan Wayòm Bondye a. Ki sa k fè l se pi bon Dirijan an? Ann egzamine sa Jezi te fè lè l te sou tè a.

•   Jezi te gen sousi pou moun. Jezi te konn ede gason kou fi, jèn kou granmoun, kèlkeswa kote yo soti oubyen pozisyon yo (Matye 9:36; Mak 10:16). Lè yon mesye ki te gen lèp te sipliye Jezi konsa: “Depi w vle, ou ka geri m”, Jezi te gen pitye pou li e l te geri l. — Mak 1:40-42.

• Jezi te anseye nou fason pou nou fè Bondye plezi. Li te di: “Nou pa ka esklav Bondye ak Lajan anmenmtan.” Li te di nou dwe trete lòt moun menm jan nou ta renmen yo trete nou. Yo rele prensip sa a Règ annò a. Anplis de sa, li te montre Bondye pa sèlman enterese nan sa n ap fè, men li enterese tou nan fason nou panse ak santiman nou. Donk, pou nou fè Bondye plezi, nou dwe kontwole santiman ki pi pwofon nou genyen yo (Matye 5:28; 6:24; 7:12). E Jezi te met aksan sou sa nou dwe fè pou n gen kè kontan toutbonvre: aprann konnen sa Bondye vle nou fè epi fè l. — Lik 11:28.

• Jezi te anseye ki sa renmen lòt moun vle di. Sa Jezi te konn di ak sa l te konn fè te gen anpil fòs e yo te touche kè moun ki t ap koute l yo. “Foul moun yo [te] rete bouch ouvè devan fason l anseye. Paske, li te anseye yo antanke moun ki gen otorite.” ​(Matye 7:28, 29). Li te di yo: “Renmen ènmi nou.” Li te menm priye pou kèk nan moun ki te responsab lanmò l yo lè l te di: “Papa, padone yo, paske yo pa konn sa y ap fè a.” — Matye 5:44; Lik 23:34.

Se Jezi ki pi byen kalifye pou l dirije monn nan pi bon fason an. Li renmen ede moun e li gen bonte. Men, ki lè l ap kòmanse dirije?