Byen ak mal: Konsèy ki bay bon rezilta
Ann egzamine kat domèn nan lavi a kote plizyè milyon moun te rive wè konsèy ki nan Bib la bay bon rezilta e moun ka fè yo konfyans.
1. Maryaj
Moun yo gen divès kalite opinyon sou maryaj ak sa sa mande pou yon maryaj gen kè kontan.
SA BIB LA DI: “Nou chak dwe renmen madanm nou menm jan nou renmen tèt nou. Madanm nan, bò kote pa l, dwe gen yon gwo respè pou mari l.” — Efezyen 5:33.
SA SA VLE DI: Se Bondye ki vini ak maryaj, donk, li konnen ki sa de moun marye dwe fè pou yo gen kè kontan (Mak 10:6-9). De moun ki marye ap gen kè kontan lè yo pa ret konsantre sou sa yo chak la ap jwenn nan maryaj la, men pito sou sa yo chak ka bay pou fè maryaj la vin pi solid. Yon mari ki renmen madanm li ap montre sa nan fason li trete l ak fason li pran swen l. Epi, yon madanm ki respekte mari l ap montre sa nan fason l pale ak fason l aji.
KONSÈY BIB LA BAY BON REZILTA: Quang ak Thi, ki soti nan peyi Vyetnam, te kwè yo pa t ap janm gen kè kontan nan maryaj yo. Souvan, Quang pa t konn aji ak jantiyès. Men sa l di: “M pa t bay santiman madanm mwen regle anyen pou mwen, souvan m te konn imilye l.” Thi te vle divòse. Li te di: “M te santi m pap janm ka fè mari m konfyans e m pap ka respekte l.”
Avèk letan, Quang ak Thi te aprann sa Bib la anseye ak fason pou yo aplike Efezyen 5:33 nan maryaj yo. Men sa Quang di: “Vèsè sa a te ede m wè enpòtans pou m aji ak jantiyès e pou m fè Thi santi mwen renmen l e m ap pran swen l nan domèn materyèl, fizik ak emosyonèl. Lè m te aji konsa, Thi te vin renmen m e l te respekte m.” Epi, men sa Thi te di: “Plis m t ap aplike Efezyen 5:33 epi m te demontre respè pou mari m, se plis mari m te fè m santi li renmen m, l ap pwoteje m e nou te anpè.”
Pou w jwenn plis enfòmasyon sou maryaj, li Reveye n! No 2 2018 ki gen tit “12 sekrè pou fanmi yo reyisi” ki sou jw.org.
2. Fason pou n trete lòt moun
Souvan, moun konn maltrete lòt moun akoz ras yo, nasyonalite yo, aparans yo, relijyon yo oswa oryantasyon seksyèl yo.
SA BIB LA DI: “Onore tout kalite moun.” — 1 Pyè 2:17.
SA SA VLE DI: Bib la pa ankouraje nou pou n rasis, pou n rayi omoseksyèl yo oswa etranje yo. Okontrè, li ankouraje nou pou n respekte moun kèlkeswa ras, nasyonalite yo ak ran sosyal yo (Travay 10:34). Menmsi n pa dakò ak sa lòt moun kwè oswa fason yo aji, nou dwe toujou trete yo avèk bonte e avèk respè. — Matye 7:12.
KONSÈY BIB LA BAY BON REZILTA: Yo te aprann Daniel pou l wè moun ki soti ann Azi yo tankou yon menas pou peyi l. Li te vin rayi nenpòt moun ki soti ann Azi, e l te konn manke yo dega an piblik. Men sa Daniel di: “M te panse m t ap ‘soutni peyi m’. M pa t menm konsidere fason m te panse a ak fason m te konn aji a te mal.”
Pi devan, Daniel te vin aprann sa Bib la anseye. Men sa l di: “M te oblije chanje fason m te panse nèt. M te oblije aprann wè moun fason Bondye wè yo, sa vle di nou tout egal kèlkeswa kote nou soti.” Daniel esplike fason l santi l kounye a lè l rankontre ak lòt moun. Men sa l di: “Souvan, m pa menm reflechi ak kote moun yo soti. M renmen tout kalite moun kounye a, e m gen bon zanmi toupatou sou tè a.”
Pou w jwenn plis enfòmasyon, li Reveye n! No 3 2020, ki gen tit “Èske gen yon remèd pou prejije?” sou jw.org.
3. Lajan
Anpil moun ap kouri dèyè richès pou yo ka gen kè kontan ak yon bèl avni.
SA BIB LA DI: “Sajès se yon pwoteksyon, menm jan lajan se yon pwoteksyon. Epi, men avantaj yon moun ki gen konesans genyen: Si l gen sajès, sa ap pwoteje lavi l.” — Eklezyas 7:12.
SA SA VLE DI: Nou bezwen lajan, men, lajan pa ka garanti kè kontan ak avni nou (Pwovèb 18:11; 23:4, 5). Olye de sa, se lè nou fè efò pou n gen sajès Bondye bay nou jwenn nan Bib la, n ap gen bonjan kè kontan ak yon avni ki sèten. — 1 Timote 6:17-19.
KONSÈY BIB LA BAY BON REZILTA: Cardo, yon mesye ki moun Endonezi, te konsantre l sou fè lajan. Men sa l te di: “Mwen te genyen sa pifò moun reve genyen. M te ka vwayaje, epi mwen te konn achte pwodui deliks, plizyè machin ak plizyè kay.” Kalite richès sa yo pa dire. Men sa Cardo te di ankò: “Yo te pran m nan pyèj, e tout lajan m te travay di pou m fè pandan tout ane sa yo te pèdi nan yon bat je. M te pase tout lavi m ap kouri dèyè richès, men alafen, m te santi m vid, m te santi m pa t itil anyen e m te dekouraje.”
Cardo te kòmanse suiv konsèy Bib la bay sou lajan. Li te sispann depanse tout enèji l ap ranmase richès pou l te ka mennen yon vi ki pi senp. Men sa l di: “Vrè trezò k ap dire pou toutan an soti nan Bondye. Kounye a, m ka dòmi chak swa e m santi m vrèman kontan.”
Pou w jwenn plis enfòmasyon konsènan pwennvi Bib la sou lajan, li atik “Èske gwo etid ak lajan ka garanti yon avni ki sèten?” ki nan Toudegad No 3 2021 sou jw.org.
4. Sèks
Moun yo gen divès kalite opinyon sou sa ki akseptab anrapò ak sèks.
SA BIB LA DI: “Se pou nou evite imoralite seksyèl. Chak moun pami nou dwe konnen ki jan pou l gen kontwòl sou pwòp kò l nan sentete ak nan onè, san l pa gen dezi seksyèl san kontwòl, menm jan ak nasyon sa yo ki pa konn Bondye.” — 1 Tesalonisyen 4:3-5.
SA SA VLE DI: Bib la met limit nan fason pou moun satisfè dezi seksyèl yo. Ekspresyon “imoralite seksyèl” la gen ladan l adiltè, pwostitisyon, relasyon seksyèl ant moun ki pa marye, relasyon seksyèl ant moun ki gen menm sèks ak relasyon seksyèl ant moun ak bèt (1 Korentyen 6:9, 10). Relasyon seksyèl se yon kado espesyal Bondye bay yon gason ak yon fi ki marye youn ak lòt. — Pwovèb 5:18, 19.
KONSÈY BIB LA BAY BON REZILTA: Men sa Kylie, yon dam nan peyi Ostrali di: “Antanke yon selibatè, m te panse si m fè sèks, m t ap santi moun renmen m e m an sekirite. Epoutan, se pa sa m te santi. M te vin pa kwè nan tèt mwen e kè m te fann.”
Annapre, Kylie te aprann sa Bib la anseye sou sèks e l te viv ann amoni ak yo. Men sa l di: “M ka wè prensip Bondye yo ede nou evite soufrans ak doulè. Kounye a, m santi m an sekirite e m santi moun renmen m, paske mwen mennen lavi m jan Jewova vle a. Lefètke m suiv prensip ki nan Bib la, sa fè m evite anpil tètchaje!”
Pou w jwenn plis enfòmasyon, li atik “Ki sa Bib la di sou kesyon de moun k ap viv ansanm san yo pa marye?” sou jw.org.
Kreyatè nou an ede n konn sa ki byen ak sa ki mal. Byenke l pa toujou fasil pou yon moun respekte prensip moral li yo, sa vo lapèn pou n fè sa. Nou ka sèten lè n suiv prensip Bondye yo, sa ap toujou fè nou jwenn kè kontan k ap dire a.
