Tank nou aprann konnen kalite yon moun genyen, se tank nou vin konnen moun sa a pi byen. Konsa, nou kapab vin pi pwòch avè l. Menm jan tou, plis nou aprann konnen kalite Jewova gen lakay li, se plis n ap aprann konnen ki kalite moun li ye, e se konsa tou n ap vin pi pwòch avè l. Pami tout bèl kalite Bondye genyen, gen kat ladan yo ki vrèman estrawòdinè, anpalan de pouvwa li, sajès li, jistis li ak lanmou l.

“O Jewova, Seyè ki Souvren an! Se ou ki fè syèl la ak tè a avèk pouvwa w genyen an.” — JEREMI 32:17.

Kreyasyon an montre aklè Bondye gen pouvwa oswa pisans. Pa egzanp, lè w kanpe nan yon solèy cho ann ete, ki sa w santi sou po w? Chalè solèy la pa vre. Anfèt, sa w santi a se yon bagay ki montre pouvwa Jewova genyen pou l kreye. Jis nan ki pwen solèy la pisan? Tanperati nan mitan solèy la se anviwon 15 milyon degre Sèlsiyis. Chak segonn, solèy la ap degaje yon kantite enèji ki egal ak kantite enèji plizyè santèn milyon bonm nikleyè t ap degaje si yo ta eksploze.

Epoutan, solèy la piti devan plizyè milyon zetwal ki gen nan linivè. Selon etid syantifik yo fè, zetwal ki rele UY Scuti a tèlman gwo, si yo ta mete l nan plas solèy la, nonsèlman li t ap kouvri tout tè a, men tou, li t ap menm rive kouvri planèt ki rele Jipitè a. Petèt, sa ede n pi byen konprann pawòl Jeremi te di ki fè konnen Jewova fè syèl la ak tè a, anpalan de linivè, ak pouvwa li genyen an.

 Nan ki sans pouvwa Bondye bon pou nou? Lavi lèzòm depann de kreyasyon Bondye a, pa egzanp, solèy la ak tout bèl bagay ki sou tè a. Anplis de sa, Bondye sèvi ak pouvwa li genyen pou l ede chak grenn moun. Ki sa k fè nou di sa? Nan premye syèk la, Bondye te bay Jezi pouvwa pou l fè yon seri gwo mirak. Men sa nou li nan Bib la: “Moun avèg wè kounye a, moun enfim mache, moun ki gen lèp geri, moun soud tande, moun mouri leve.” (Matye 11:5). E jodi a menm? Men sa Labib di: “Moun ki fatige yo, li ba yo fòs.” Bib la di tou: “Moun ki met espwa yo nan Jewova ap repran fòs.” (Ezayi 40:29, 31). Bondye ka ban nou “pisans ki depase yon pisans nòmal” pou n rive fè fas ak pwoblèm lavi a (2 Korentyen 4:7). Èske w pa santi w anvi zanmi Bondye sa a ki tèlman renmen w opwen li sèvi ak pouvwa li genyen pou l ede w fè fas ak pwoblèm ou yo?

“Ala anpil sa w fè yo anpil, o Jewova! Ou fè tout sa w fè yo avèk sajès.” — SÒM 104:24.

Plis nou aprann konnen bagay Bondye fè yo, se plis nou rete bouch be devan sajès li. Anfèt, gen yon domèn nan lasyans ki rele byomimetik, se yon travay kote syantifik yo egzamine bagay Jewova kreye nan lanati yo, epi yo kopye sou yo pou yo ka amelyore envansyon pa yo. Soti nan sa k piti, tankou senp lakòl, pou rive nan sa k pi gwo tankou avyon.

Pi bèl egzanp ki montre sajès Jewova se fason kò lèzòm fèt. Pa egzanp, ann pran fason yon tibebe rive fèt. Sa kòmanse ak yon senp selil ki fegonde, ki gen tout enfòmasyon ki nesesè anndan l konsènan enstriksyon sou kòd jenetik timoun nan. Premye selil sa a vin bay plizyè lòt selil ki sanble youn ak lòt. Men rive yon lè, selil sa yo kòmanse bay plizyè santèn lòt kalite selil tankou selil ki konpoze san an, selil ki fè nè yo ak zo yo. Byen vit, ògàn yo parèt e yo kòmanse fonksyone. Sa pran nèf mwa sèlman pou premye selil ki te devlope a vin fòme yon tibebe ki fèt ak plizyè milyon selil. Sajès moun wè ki gen nan fason tibebe a devlope a pouse anpil moun dakò ak sa youn nan moun ki te ekri Sòm yo te di: “M ap fè louwanj pou ou paske ou fè m yon fason ki estrawòdinè, yon fason ki fè m gen respè pou ou.” — Sòm139:14.

Nan ki sans sajès Bondye bon pou nou? Kreyatè a konn sa nou bezwen pou kè n kontan. Piske li gen anpil konesans ak bon konprann, li ban nou anpil bon konsèy nan Labib, Pawòl li. Pa egzanp, Labib ankouraje nou pou n ‘kontinye padone youn lòt ak tout kè n’. (Kolosyen 3:13.) Èske sa se yon bon konsèy? Wi. Doktè ki fè rechèch sou kesyon sa a wè lè yon moun konn padone sa fè l dòmi pi byen e li pa gen pwoblèm tansyon. Sa kapab fè l gen mwens chans fè depresyon epi gen lòt pwoblèm sante. Bondye tankou yon zanmi ki gen sajès, ki konn pran ka moun e ki pa janm sispann ban nou bonjan konsèy pou l ede nou (2 Timote 3:16, 17). Èske w pa t ap renmen gen yon zanmi konsa?

“Jewova renmen jistis.” — SÒM 37:28.

Bondye toujou fè sa ki dwat. An reyalite, “li enposib pou vrè Dye a aji ak mechanste, pou Toupisan an fè sa ki mal”. (Jòb 34:10.) Jewova toujou fè jijman l yo yon fason ki onèt, jan nou ka wè sa nan pawòl youn nan moun ki te ekri Sòm yo te di pandan l t ap pale avè l: “Ou gen pou w jije pèp yo avèk jistis.” (Sòm 67:4). Etandone ‘Jewova wè sa k nan kè yon moun’, pa gen okenn moun k ap aji ann ipokrit ki ka twonpe l. Jewova gen kapasite pou l toujou konnen ki moun ki sensè, e konsa li jije yo kòmsadwa (1 Samyèl 16:7). Anplis de sa, Bondye konnen tout enjistis ak koripsyon ki gen sou latè, e li pwomèt ‘mechan yo pral detwi sou tè a’ talè konsa. — Pwovèb 2:22.

Men, Bondye pa yon jij bout di ki toujou pare pou l pini moun. Li demontre mizèrikòd lè sa nesesè. Men sa Labib di: “Jewova gen mizèrikòd ak konpasyon”, menm anvè mechan yo depi yo regrèt ak tout kè yo move aksyon yo te konn fè yo. Èske se pa sa ki vrè jistis la? — Sòm 103:8; 2 Pyè 3:9.

Nan ki sans jistis Bondye bon pou nou? Apot Pyè te di: “Bondye pa gen patipri. Nan tout nasyon, yon moun ki gen lakrentif pou li e k ap pratike sa ki jis, moun sa a fè l plezi.” (Travay 10:34, 35). Jistis Bondye gen lakay li bon pou nou paske li pa janm nan patipri oswa nan zafè moun pa. Nenpòt moun ka fè l plezi e yo ka adore l, kèlkeswa ras yo, peyi kote yo soti, nivo edikasyon yo ak ran sosyal yo.

Etandone Bondye vle nou konprann jistis li gen lakay li ak byenfè sa kapab fè nou jwenn, li ban nou yon konsyans. Pawòl Bondye a fè konnen konsyans lan tankou yon lwa ki “ekri nan kè” nou e ki “rann temwayaj” pou fè n konnen si fason n ap aji a bon oswa l pa bon (Women 2:15). Ki jan sa ede nou? Lè konsyans nou byen fòme, li kapab ede  nou vire do bay sa ki mal. E si nou fè yon erè, li kapab pouse nou regrèt sa epi korije sa n fè a. Pa gen dout nan sa, lè nou byen konprann jistis Bondye gen lakay li, sa ede nou e sa ankouraje n pwoche bò kote l.

“Bondye se lanmou.” — 1 JAN 4:8.

Labib montre aklè Bondye gen pouvwa, sajès ak jistis. Men Labib pa di Bondye se pouvwa, sajès oswa jistis. Epoutan, li fè konnen Bondye se lanmou. Sa k fè sa? Se paske nou kapab di san okenn dout, pouvwa Bondye genyen pèmèt li aji e jistis ak sajès li gen lakay li gide l nan fason l ap aji. Men se lanmou Jewova ki pouse l aji. Kèlkeswa sa Jewova fè, li gen lanmou ladan l.

Byenke Jewova pa t janm manke kèlkeswa sa l ye a, lanmou l genyen pouse l fè yon seri kreyati entèlijan nan syèl la ak sou tè a, yon seri kreyati li renmen e li gen sousi pou yo, e yo kontan sa. Li te pran plezi prepare tè a pou lèzòm, ki se pi bon kote yo te ka viv. Li kontinye montre lèzòm li renmen yo paske li “fè solèy li leve ni sou moun ki mechan ni sou moun ki bon e li fè lapli tonbe ni sou moun ki jis ni sou moun ki pa jis”. — Matye 5:45.

Anplis de sa, “Jewova gen anpil konpasyon ak anpil mizèrikòd”. (Jak 5:11.) Li montre li gen afeksyon pou moun ki pran bonjan dispozisyon pou yo aprann konnen l epi pwoche bò kote l. Bondye gen konsiderasyon pou yo chak. Alaverite, “li gen sousi pou nou.” — 1 Pyè 5:7.

Nan ki sans lanmou Bondye bon pou nou? Nou pran plezi gade solèy la k ap kouche. Nou kontan tande yon tibebe k ap ri. Nou santi n byen lè yon moun nan fanmi n ki pwòch avè n renmen nou. Nou pa oblije gen bagay sa yo pou n viv, men yo bay lavi nou sans yon fason nou pa ka janm imajine.

Yon lòt fason lanmou Bondye bon pou nou, se lefètke nou kapab priye l. Men ki ankourajman nou jwenn nan Bib la: “Pa enkyete nou pou anyen, men fè Bondye konnen demann nou yo nan tout bagay, pa mwayen lapriyè ak siplikasyon toutpandan n ap di l mèsi.” Jewova menm jan ak yon papa ki renmen pitit li, li vle nou mande l èd pou bagay ki fè nou mal anpil. E Jewova, nan bonte l, pwomèt nou l ap ban nou “lapè Bondye, ki depase tout sa moun ka konprann”. — Filipyen 4:6, 7.

Èske ti pale sa a sou kalite Bondye gen lakay li ki vrèman estrawòdinè yo, anpalan de pouvwa li, sajès li, jistis li ak lanmou l, ede w pi byen konnen ki kalite moun Bondye ye? Nou ankouraje w aprann konnen sa Bondye deja fè ak sa l gen pou l fè pou byen w, konsa, w ap aprann renmen l pi plis toujou.