Men sa Rosie di: “Se toutan m ap enkyete m pou yon seri bagay, e sa te vin fè mwen egzajere yo nan lespri m.” Ki vèsè ki te ede l? Youn ladan yo se Matye 6:34 ki di: “Pa janm bay tèt nou pwoblèm pou demen, paske demen ap gen pwòp pwoblèm pa l. Chak jou gen kont traka pa l.” Kounye a Rosie di pawòl sa yo Jezi te di yo te ede l sispann enkyete l pou bagay ki te ka rive demen. Men sa li ajoute: “Mwen deja gen kont pwoblèm mwen deja, mwen pa bezwen ajoute sou yo lè m enkyete m pou bagay ki pa t janm pase oswa ki gendwa pa menm rive.”

Yasmine tou te santi enkyetid te soti pou pote l ale. Men sa l di: “Mwen te konn fè plizyè jou ap kriye nan semèn nan, e gen kèk nuit m pa t ka dòmi. Mwen te santi santiman negatif yo t ap manje m pa anndan.” Ki vèsè ki te ede l? Li te site 1 Pyè 5:7 ki di: “Lage tout tètchaje nou genyen sou [Bondye], paske li gen sousi pou nou.” Men sa Yasmine di: “Tank tan t ap pase, mwen te kontinye priye Jewova e li te reponn priyè m yo. Mwen te santi se kòmsi yo te retire yon gwo chay sou zepòl mwen. Santiman negatif yo konn tounen detanzantan, men, kounye a mwen konn ki jan pou m fè fas ak yo.”

Gen yon jèn fi ki rele Isabella ki di: “Mwen panse zafè di m a gentan an se nan san m sa ye paske papa m konsa tou. Mwen te konn di m a gentan pou m fè bagay ki enpòtan yo pou m te ka rete san m pap fè anyen, pa egzanp, m konn vle jis rilaks mwen oswa gade televizyon. Se yon vye abitid paske sa fè w vin gen plis strès, e sa fè w pa byen fè travay ou.” Lè l te reflechi sou 2 Timote 2:15, sa te ede l. Men sa vèsè a di: “Fè tout sa w kapab pou w prezante tèt ou bay Bondye antanke moun li apwouve, antanke yon ouvriye ki pa gen anyen pou l wont.” Men sa Isabella di: “Mwen pa vle wont devan Jewova poutèt travay mwen afòs m ap plede di m a gentan.” Se pa ti chanje Isabella te vin chanje.

Nan menm sans lan, men sa Kelsey te di: “Mwen te konn gen yon dat pou m fini yon travay, men mwen te toujou ret tann dènye minit lan pou m fè travay la. Mwen te konn kriye, pèdi nuit e m te konn ap enkyete m. Sa pa t bon pou mwen menm.” Sa k te ede Kelsey se Pwovèb 13:16 ki di: “Moun ki gen lespri a konn sa l ap fè, men, moun ki sòt la fè tout moun wè jan l sòt.” Men sa l fè konnen li te aprann lè l te medite sou vèsè sa a: “Li bon pou yon moun planifye sa l ap fè. Kounye a, mwen gen yon ajanda sou biwo m pou m ekri tout travay mwen gen pou m fè, e sa ede m pou m pi byen planifye yon fason pou m pa tann se nan dènye minit pou m fè yon seri bagay.”

Men sa Kirsten di: “Mari m te leve kite m ak kat timoun.” Ki prensip nan Bib la ki te ede l? Men sa nou li nan Pwovèb 17:17: “Yon bon zanmi demontre lanmou toutan, e li se yon frè yo ka konte sou li lè gen malè.” Kirsten te chèche fè zanmi ak lòt moun k ap sèvi Jewova menm jan avè l. Èske sa te ede l? Men sa l di: “Zanmi m yo te ede m plizyè fason! Gen nan yo ki te kite pwovizyon ak flè devan pòt lakay mwen. Pandan twa fwa, gen yon ti gwoup moun ki te ede pitit mwen yo avè m lè n t ap bwote al abite yon lòt kote. Gen yon lòt menm ki te ede m jwenn yon travay. Zanmi m yo te toujou kanpe la avè m.”

Delphine nou te pale de li pi wo a te konn santi l poukò l tou. Men sa l te di apre li te fin pèdi tout bagay: “Mwen te santi tout moun t ap viv sof mwen menm. Mwen te santi m poukò m e m pa t gen kè kontan.” Yon vèsè ki te ede l se Sòm 68:6 ki di: “Bondye bay moun ki poukont yo yon kay pou yo rete.” Men sa Delphine esplike: “Mwen te konnen vèsè sa a pa t vle di m t ap jwenn kay toutbon depi kounye a. Okontrè, mwen te vin konprann Bondye t ap fè m jwenn yon kay nan sans mwen t ap santi mwen an sekirite toutbon e mwen t ap santi m vrèman pwòch ak lòt moun ki renmen Jewova. Men mwen te konnen mwen pa t ap janm pwòch ak lòt moun si m pa t vin pwòch ak Jewova anvan. Donk, Sòm 37:4 te ede m nan sans sa a, li di: ‘Pran tout plezi w nan Jewova e l ap ba ou tout sa w swete nan kè w.’”

Men sa l te ajoute pou l fini: “Mwen te rann mwen kont mwen te bezwen vin pi pwòch Jewova toujou. Pa gen tankou l. Annapre, mwen te fè yon lis aktivite mwen ta renmen fè ak lòt moun ki renmen Jewova tou, yon fason pou m ka vin pi pwòch avèk yo. Mwen aprann wè sa ki bon lakay lòt moun e m pa rete sou defo yo.”

Sa klè, zanmi nou yo k ap sèvi Bondye enpafè toujou. Temwen Jewova yo gen pwoblèm menm jan ak tout moun. Men fòmasyon ki nan Bib la ankouraje moun ede lòt moun chak fwa sa posib. Se yon bon bagay sa ye pou moun gen zanmi konsa. Men, èske prensip nou jwenn nan Bib la ka ede n fè fas ak pwoblèm ki pa gen solisyon pou kounye a, pa egzanp maladi ki pa gen tretman oswa lapenn?