Nou pa ta dwe panse lefètke 70 disip yo pa t la lè Jezi te tabli Soupe Seyè a sa vle di yo pa t fidèl oswa yo te abandone l. Nan okazyon sa a, Jezi te jis vle ansanm ak apot li yo.

Ni 12 apot yo, ni 70 disip yo, yo tout te disip Jezi. Jezi te chwazi 12 gason pami tout disip li te genyen yo, e li te rele yo apot (Lik 6:​12-16). Jezi te Galile lè l te “rele 12 apot yo”. Li te “voye yo al preche Wayòm Bondye a e li [te] voye yo geri moun malad”. (Lik 9:​1-6.) Annapre, pandan Jezi te Jide, li te “chwazi 70 lòt disip, li [te] voye yo de pa de”. (Lik 9:51; 10:1.) Se sa k fè Jezi te gen disip tout kote yo t ap preche mesaj li a.

Yon ti tan anvan Jezi te mouri, li menm ak apot li yo t al Jerizalèm. Men, li pa t mande tout disip li yo nan Jide, nan Galile ak nan Pere pou yo vin selebre fèt Pak la ansanm avè l. Sanble Juif ki te vin disip Jezi yo te konn selebre fèt Pak la chak ane, petèt yo te konn fè sa ansanm ak fanmi yo (Egz. 12:​6-11, 17-20). Men, Jezi te vle ansanm ak apot yo nan okazyon sa a. Men sa l te di yo: “Se pa ti anvi mwen te anvi manje manje Pak sa a ansanm avèk nou anvan m soufri.” — Lik 22:15.

Te gen bonjan rezon pou sa. Nan yon ti tan, Jezi t apral mouri antanke “Ti Mouton Bondye a k ap retire peche monn nan”. (Jan 1:29.) Li t ap mouri Jerizalèm, kote moun yo te konn ofri Bondye sakrifis depi byen lontan. Mouton Pak la te fè Izrayelit yo sonje Jewova te libere yo nan esklavaj ann Ejip. Men, sakrifis Jezi te fè a te pi enpòtan toujou. Li t ap libere limanite anba peche ak lanmò (1 Kor. 5:​7, 8)! Sa Jezi te fè a t ap pèmèt 12 apot yo vin fondasyon kongregasyon kretyen an (Efe. 2:​20-22). Yon bagay ki enteresan, sèke fondasyon vil sakre a, anpalan de Jerizalèm, gen “12 wòch” ladan l, e yo “gen non 12 apot Ti Mouton an ekri sou yo”. (Rev. 21:​10-14.) Vrèmanvre, apot fidèl yo t ap gen pou yo jwe yon gwo wòl nan reyalize objektif Bondye. Kidonk, nou konprann rezon ki fè Jezi te vle yo la ansanm avèk li pou dènye fèt Pak sa a e pou sa k t apral fèt annapre a, anpalan de Soupe Seyè a.

Swasanndis disip yo ak lòt disip Jezi te genyen yo pa t nan soupe sa a ansanm avè l. Sepandan, tout disip Jezi ki te fidèl yo t ap jwenn byenfè grasa sa Jezi te tabli a, anpalan de Soupe Seyè a. Tout disip sa yo Bondye te vin chwazi pi devan pou al nan syèl t ap vin fè pati yon alyans pou yon Wayòm Jezi te fè apot yo konnen jou swa sa a. — Lik 22:​29, 30.