1-2. a) Poukisa apot Pòl te ka di lanmou se kalite ki “pi enpòtan” an? b) Ki kesyon nou pral egzamine?

 LÈ APOT Pòl t ap pale konsènan lafwa, esperans ak lanmou, alafen li te di: “[Kalite] ki pi enpòtan pami yo, se lanmou.” (1 Kor. 13:13). Sa k fè Pòl te ka di sa? Rive yon lè, nou pap bezwen gen lafwa ankò nan pwomès Bondye fè pou vin gen yon monn nouvo, oswa nou pap bezwen gen espwa pwomès sa yo ap reyalize, paske y ap deja reyalize. Men, n ap toujou bezwen gen lanmou pou Jewova e pou lòt moun. Anfèt, lanmou nou gen pou yo a ap kontinye vin pi plis chak jou.

² Piske n ap toujou bezwen gen lanmou, gen twa kesyon nou pral egzamine. Premyèman, poukisa nou bezwen gen lanmou youn pou lòt? Dezyèmman, ki jan nou montre nou gen lanmou youn pou lòt? Twazyèmman, ki jan nou ka kontinye gen anpil lanmou youn pou lòt?

3. Ki rezon nou genyen pou n renmen youn lòt?

³ Poukisa l enpòtan pou n gen lanmou youn pou lòt? Youn nan rezon yo, se paske lè nou gen lanmou, sa fè lòt moun wè se nou menm ki vrè kretyen. Men sa Jezi te di apot li yo: “Tout moun ap konnen nou se disip mwen si nou gen lanmou nan mitan nou.” (Jan 13:35). Epitou, lè nou gen lanmou youn pou lòt, sa fè nou gen tèt ansanm. Pòl te fè konnen lanmou se “yon chenn ki ini moun  yon fason ki san fay”. (Kol. 3:14.) Sepandan, gen yon lòt rezon enpòtan ki fè nou bezwen gen lanmou youn pou lòt. Men sa apot Jan te ekri kwayan parèy li yo: “Yon moun ki renmen Bondye dwe renmen frè l tou.” (1 Jan 4:21). Lè nou montre n gen lanmou youn pou lòt, nou montre nou renmen Bondye.

4-5. Bay yon egzanp ki montre lanmou nou gen pou Bondye makònen ak lanmou nou gen youn pou lòt.

⁴ Nan ki sans lanmou nou gen pou Bondye makònen ak lanmou nou gen pou frè n ak sè n yo? Ann pran yon egzanp. Reflechi sou rapò ki genyen ant kè nou ak lòt pati nan kò nou. Lè yon doktè ap tcheke batman kè nou nan ponyèt nou pou l wè si l bat dousman oswa si l bat fò, sa ka ede l wè nan ki eta kè nou ye. Ki leson nou ka aprann nan prensip sa a?

⁵ Menm jan yon doktè ka tcheke batman kè nou nan ponyèt nou pou l wè ki jan kè nou ye, se konsa tou nou ka wè jis nan ki pwen nou renmen Bondye lè n egzamine fason nou demontre lanmou pou lòt moun. Si nou remake lanmou nou gen pou frè n ak sè n yo yon ti jan ap bese, sa ka vle di lanmou nou gen pou Bondye ap bese tou. Men, lè n toujou montre nou renmen frè n ak sè n yo, sa montre nou gen anpil lanmou pou Bondye.

6. Si lanmou nou gen pou frè n ak sè n yo ap bese, poukisa sa ta dwe ban nou pwoblèm? (1 Jan 4:​7-9, 11).

⁶ Si lanmou nou gen pou frè n ak sè n yo ap bese, sa ta dwe ban nou pwoblèm. Poukisa? Paske sa ka vle di relasyon n ak Jewova an danje. Apot Jan te montre sa klè lè l te fè n sonje: “Yon moun ki pa renmen frè l li wè pa ka renmen Bondye li pa wè.” (1 Jan 4:20). Ki leson nou aprann? Se sèlman si nou gen “lanmou youn pou lòt”, n ap ka fè Jewova plezi. — Li 1 Jan 4:​7-9, 11.

7-8. Bay kèk fason nou kapab demontre lanmou youn pou lòt.

⁷ Nan Pawòl Bondye a, nou jwenn kòmandman ki di pou “youn renmen lòt” la plizyè fwa (Jan 15:​12, 17; Wom. 13:8; 1 Tes. 4:9; 1 Pyè 1:22; 1 Jan 4:11). Sepandan, lanmou se yon kalite ki soti nan kè nou, oswa moun nou ye pa anndan an, e pa gen moun ki ka wè sa k nan kè nou. Donk, ki jan nou ka montre nou gen lanmou youn pou lòt? Pawòl nou di ak fason nou aji ap montre sa.

⁸ Gen plizyè fason nou ka montre frè n ak sè n yo nou renmen yo. Men kèk egzanp: “Se pou youn di lòt laverite.” (Zak. 8:16). “Se pou nou kontinye gen lapè nan mitan nou.” (Mak 9:50). “Pran devan nan onore youn lòt.” (Wom. 12:10). “Se pou youn akeyi lòt.” (Wom. 15:7). “Se pou youn kontinye padone lòt.” (Kol. 3:13). “Se pou youn kontinye pote fado lòt.” (Gal. 6:2). Se pou youn “kontinye konsole [...] lòt”. (1 Tes. 4:18.) “Se pou youn kontinye fòtifye lòt.” (1 Tes. 5:11). “Se pou nou priye youn pou lòt.” — Jak 5:16.

9. Poukisa lè n konsole lòt moun se yon bon fason nou montre nou renmen yo? (Gade foto a tou.)

⁹ Ann wè youn nan fason nou ka montre nou renmen lòt moun, jan sa parèt nan paragraf anvan an. Nou pral egzamine konsèy Pòl te bay lè l te di se pou youn “kontinye konsole [...] lòt”. Poukisa lè n konsole lòt moun se yon bon fason nou montre nou renmen yo?  Selon yon kòmantè yo fè sou Bib la, mo Pòl te itilize pou “konsole” a vle di “kanpe bò kote yon moun pou ankouraje l lè l anba gwo eprèv”. Konsa, lè n konsole yon kwayan parèy nou ki nan difikilte se ede nou ede l kanpe pou l kontinye mache nan wout lavi a. Chak fwa nou konsole yon frè nou oswa yon sè nou, se montre nou montre nou renmen l. — 2 Kor. 7:​6, 7, 13.

10. Ki rapò konpasyon genyen ak konsolasyon?

¹⁰ Nan ki sans demontre konpasyon ak konsole lòt moun mache ansanm? Lè yon moun gen konpasyon pou yon moun k ap soufri, li vle konsole moun sa a, epi li fè yon bagay pou ede l. Toudabò, nou santi n gen konpasyon pou moun nan, e apre sa nou konsole l. N ap remake Pòl montre konpasyon Jewova gen pou moun pouse l konsole yo. Pòl fè konnen Jewova se “Papa ki gen kè sansib la, Bondye tout konsolasyon an”. (2 Kor. 1:3.) Nan vèsè sa a, Pòl sèvi ak ekspresyon “kè sansib la” pou l esplike konpasyon yon moun gen pou lòt moun. Se sa k fè yo rele Bondye Papa ki gen kè sansib la, oswa Sous kè sansib la, paske li gen anpil konpasyon pou moun, e konpasyon sa a pouse l konsole nou “nan tout eprèv nou yo”. (2 Kor. 1:4.) Menm jan dlo pwòp k ap sot nan yon sous soulaje moun ki swaf, se konsa tou Jewova soulaje moun ki gen pwoblèm e li konsole yo. Ki jan n ka imite Jewova nan fason li demontre konpasyon pou lòt moun ak nan fason li konsole yo? Youn nan fason nou kapab fè sa se lè n fè efò pou n vin gen yon seri kalite k ap ede n konsole lòt moun. Ki kalite konsa?

11. Selon Kolosyen 3:12 ak 1 Pyè 3:​8, ki lòt kalite nou dwe chèche genyen pou n kontinye gen lanmou k ap pouse nou konsole lòt moun?

¹¹ Ki sa k ap ede n kontinye gen lanmou pou n ka “kontinye konsole [...] youn lòt” chak jou? Nou bezwen chèche gen yon seri kalite tankou senpati, afeksyon pou frè yo ak bonte. (Li Kolosyen 3:12; 1 Pyè 3:8.) Ki jan kalite sa yo ap ede n? Lè konpasyon ak lòt kalite menm jan an vin fè pati pèsonalite nou, n ap vrèman anvi konsole frè n ak sè n k ap soufri yo. Men sa Jezi te di: “Pawòl ki sot nan bouch yon moun montre sa k ranpli kè l. Yon bon moun ap retire bon bagay nan bon bagay li gen sere.” (Mat. 12:​34, 35). Lè n konsole frè n ak sè n ki bezwen konsolasyon, se yon bon fason pou n montre nou renmen yo.

12. a) Poukisa nou bezwen veye pou n pa pèdi lanmou nou gen youn pou lòt la? b) Ki kesyon nou pral egzamine kounye a?

¹² Nou tout vle “kontinye gen lanmou youn pou lòt”. (1 Jan 4:7.) Sepandan, li enpòtan pou n sonje avètisman Jezi te bay ki di “lanmou pifò moun [t] ap vin rafredi”. (Mat. 24:12.) Jezi pa t vle di sa t ap gen pou rive anpil nan disip li yo. Men, nou dwe veye pou n pa kite fason moun nan monn nan ap aji, ki montre yo pa gen lanmou, detenn sou nou. Pandan n ap reflechi sou sa, men yon kesyon enpòtan nou bezwen egzamine: Ki sa k ap ede n wè si nou renmen frè n ak sè n yo anpil?

13. Ki sa k ap ede n wè si n renmen frè n ak sè n yo toutbon?

¹³ Youn nan fason nou kapab wè si nou gen anpil lanmou, se lè n egzamine fason  nou reyaji nan kèk sitiyasyon nan lavi a (2 Kor. 8:8). Apot Pyè te pale konsènan youn nan sitiyasyon sa yo. Men sa l te di: “Anvan tout bagay, se pou nou gen anpil lanmou youn pou lòt, paske lanmou kouvri yon pakèt peche.” (1 Pyè 4:8). Sa montre, defo ak enpèfeksyon frè n ak sè n yo genyen ka ede n wè si nou renmen yo toutbon.

14. Selon 1 Pyè 4:​8, ki kalite lanmou nou bezwen genyen? Bay yon egzanp.

¹⁴ Ann egzamine pawòl Pyè yo. Premye pati vèsè 8 la montre ki kalite lanmou nou bezwen genyen: nou bezwen gen “anpil lanmou”. Mo Pyè itilize pou “anpil” la vle di literalman “detire”. Dezyèm pati vèsè a montre sa anpil lanmou kapab fè. Li kapab kouvri peche frè n ak sè n yo. Men ki jan nou ta ka esplike l: Se kòmsi nou ta kenbe lanmou nou genyen an ak de men, tankou yon moso twal ki ka detire, epi nou detire l anpil jiskaske l kouvri, pa sèlman youn oswa de peche, men, “yon pakèt peche”. Nan kontèks sa a, “kouvri” vle di padone. Menm jan yon nap kapab kouvri yon tach ki gen sou yon tab, lanmou ka kouvri defo ak enpèfeksyon lòt moun genyen.

15. Si n renmen frè n ak sè n yo anpil, ki sa n ap ka fè? (Kolosyen 3:13).

 ¹⁵ Lanmou nou gen pou frè n ak sè n yo ta dwe fè n kapab padone enpèfeksyon yo genyen, menmsi sa mande anpil efò ak anpil tan. (Li Kolosyen 3:13.) Lè n padone lòt moun, nou montre nou gen anpil lanmou e nou vle fè Jewova plezi. Ki lòt bagay ki ka ede n pou n pa kouri fache akoz sa moun fè ki kontrarye nou e pou n padone sa yo fè ki mal?

16-17. Ki lòt bagay k ap ede n pase sou ti erè lòt moun fè? Bay yon egzanp. (Gade foto a tou.)

¹⁶ Panse ak bèl kalite frè w ak sè w yo genyen, pa ret sou defo yo. Ann pran yon egzanp. Imajine ou nan yon ti fèt ak kèk frè ak sè. W ap pase yon bon moman, e lè fèt la fini ou fè yon foto an gwoup. Anfèt, ou pran de lòt foto pou si premye foto a pa ta byen soti. Kounye a ou gen twa foto. Men, nan youn ladan yo, ou remake gen yon frè ki parèt move. Ki sa w ap fè ak foto sa a? W ap efase l paske w gen de lòt foto kote tout moun nan gwoup la, san wete frè a, ap souri.

¹⁷ Ann konpare foto nou konsève yo ak souvni nou chwazi kenbe. An jeneral, moman nou pase ak frè n ak sè n yo kite bon souvni nan panse nou. Men, ann sipoze pandan youn nan moman sa yo, gen yon frè oswa yon sè ki di oswa fè yon bagay ki pa fè n plezi. Ki sa n ta dwe fè  lè sa a? L ap bon pou n eseye efase souvni sa a, menm jan nou t ap efase youn nan foto yo (Pwo. 19:11; Efe. 4:32). Nou ka pase sou ti erè frè n nan oswa sè n nan te fè a paske bon moman nou te pase ansanm fè nou gen anpil bon souvni. Se souvni konsa nou bezwen kenbe e nou bezwen bay anpil valè.

18. Ki pwen enpòtan ki gen rapò ak lanmou nou sot egzamine nan atik sa a?

¹⁸ Poukisa nou vle kontinye gen anpil lanmou youn pou lòt? Jan nou sot wè sa, lè n montre nou renmen frè n ak sè n yo, nou montre nou renmen Jewova. Ki fason nou montre nou gen lanmou pou kwayan parèy nou? Youn nan fason nou fè sa, se lè nou konsole yo. N ap kapab “kontinye konsole [...] youn lòt” si nou gen konpasyon. Ki jan n ka kontinye gen anpil lanmou youn pou lòt? Se lè n fè tout sa n kapab pou n padone erè lòt moun fè.

19. Poukisa li vrèman enpòtan jodi a pou n demontre lanmou youn pou lòt?

¹⁹ Poukisa li vrèman enpòtan jodi a pou n demontre lanmou youn pou lòt? Men rezon apot Pyè bay: “Lafen tout bagay vin pi pre. Donk, [...] se pou nou gen anpil lanmou youn pou lòt.” (1 Pyè 4:​7, 8). Tank fen monn mechan sa a ap pwoche, ki sa nou ka atann? Men sa Jezi te anonse konsènan disip li yo: “Tout nasyon ap rayi nou poutèt non mwen.” (Mat. 24:9). Pou n rive andire kalite lahèn sa a, nou bezwen kontinye gen tèt ansanm. Si nou renmen frè n ak sè n yo, Satan pap janm ka met divizyon nan mitan nou, paske lanmou se “chenn ki ini moun yon fason ki san fay”. — Kol. 3:14; Flp. 2:​1, 2.