ANPIL moun abitye ak istwa Jezi yo te pann nan mitan de kriminèl e yo te egzekite sou yon poto (Mat. 27:35-38). Men, gen kèk moun ki kwè lè Bib la di yo te prepare kò Jezi pou antèman e yo te mete l nan yon tonm, enfòmasyon sa a pa egzak. — Mak 15:42-46.

Gen kèk moun k ap kritike Evanjil yo ki pa fin kwè yo t ap kite yon moun yo egzekite jwenn yon antèman nòmal, pa egzanp pou yo ta mete l nan yon tonm. Okontrè, gen moun ki panse se yon lòt bagay yo te konn fè ak kriminèl yo te egzekite yo. Men sa yon jounalis ki rele Ariel Sabar ekri nan yon jounal pou esplike rezon ki fè kèk moun panse konsa: “Se moun ki pi mal nan sosyete a yo te konn krisifye, e se pinisyon sa a ki te rezève pou yo. Gen kèk espè ki di sa pa t ap fè sans pou yon moun ta panse Women yo t ap pèmèt moun sa yo gen yon antèman nòmal.” (Smithsonian). Women yo te vle kriminèl yo kondane yo jwenn imilyasyon ki pi rèd la, se sa k fè yo te konn kite kò moun sa yo sou poto pou bèt sovaj manje. Apre sa, yo te ka lage rès kò moun yo nan yon twou kote yo te konn lage kadav.

Sepandan, gen akeyològ ki jwenn prèv ki montre se pa toujou konsa sa te konn fèt, omwen ak kadav kèk Juif yo te fin egzekite. An 1968, yo te jwenn rès eskèlèt yon mesye yo te egzekite nan premye syèk la. Yo te jwenn li nan tonm yon fanmi juif toupre Jerizalèm. Rès eskèlèt la te nan yon bwat ki gen zo. Pami rès yo te jwenn yo, te gen yon zo talon. Li te kloure nan yon moso bwa ak yon klou an fè ki te mezire 4 pous edmi. Men sa Sabar di: “Talon an, ki se zo talon pye yon mesye ki te rele Jewochanan, te bay prèv istwa Evanjil yo rapòte ki fè konnen yo te antere Jezi nan yon tonm nan se kapab laverite.” Li klè, “zo talon pye Jewochanan an se prèv ki montre, nan epòk Jezi a, Women yo te konn pèmèt Juif yo fè antèman yon moun yo te krisifye”.

Zo talon sa a yo te jwenn nan ka fè moun gen divès opinyon sou pozisyon yo te met Jezi sou poto a. Men, sa ki klè, gen kèk kriminèl yo te egzekite ki te resevwa yon tonm, yo pa t annik lage yo yon kote. Vrèmanvre, sa Bib la di konsènan kò Jezi yo te mete nan yon tonm nan se laverite. Prèv yo jwenn nan kore sa Bib la di a.

Sa k pi enpòtan an, Jewova te gentan fè konnen yo t ap antere Jezi nan tonm yon mesye ki rich, e pèsonn pa ka anpeche pawòl Bondye reyalize. — Eza. 53:9; 55:11.