YOMARA ak frè l yo, Marcelo ak Hiver, ap viv nan yon ti bouk nan peyi Gwatemala. Yomara te kòmanse etidye Labib ak Temwen yo, e rive yon lè, frè l yo te vin ap etidye tou. Men, te gen yon pwoblèm. Yo toule twa avèg e yo pa t konn li bray. Se sa k fè moun ki te etidye Labib avè yo a te konn li paragraf yo ak vèsè ki nan leson yo pou yo.

Li te difisil pou yo te asiste reyinyon nan kongregasyon an. Yo pa t ka fè 40 minit ap mache pou y al nan Sal ki pi pre a poukont yo. Men frè yo nan kongregasyon an te fè aranjman pou mennen yo nan tout reyinyon yo. Lè touletwa te kòmanse gen patisipasyon nan reyinyon lasemèn nan, frè yo te ede yo aprann patisipasyon yo te gen pou yo fè yo pa kè.

An me 2019, gen yon kongregasyon ki te kòmanse fè reyinyon nan bouk kote yo te abite a. Lè sa a, gen yon mari ak madanm ki pyonye pèmanan ki te vin abite nan bouk la. Yo te gen objektif pou yo aprann twa frè ak sè sa yo li epi ekri bray, menm lè mari ak madanm sa a pa t konn anyen nan bray. Yo t al nan yon bibliyotèk pou yo te chèche jwenn liv ki t ap ede yo aprann bray, konsa yo t ap ka anseye lòt moun bray.

Nan kèk mwa sèlman, twa frè ak sè sa yo te kapab li bray byen fasil, e sa te pèmèt yo fè plis pwogrè nan sèvis Jewova a a. Kounye a, Yomara, Marcelo, ak Hiver se pyonye pèmanan. Marcelo se sèvitè ministeryèl. Yo okipe anpil nan sèvis Jewova pandan tout semèn nan. Lefètke yo bay tout yo menm nan sèvis Jewova sa fè lòt moun chofe tou.

Twa frè ak sè sa yo gen rekonesans pou bonjan èd kongregasyon an ba yo. Men sa Yomara di: “Depi premye fwa nou te rankontre Temwen yo, yo te montre yo gen vrè lanmou kretyen an pou nou.” Men sa Marcelo di: “Nou gen bon zanmi nan kongregasyon nou an e nou fè pati yon fanmi ki toupatou sou tè a ki renmen youn lòt.” Yomara ak frè l yo ap tann avèk enpasyans jou yo pral wè tè a vin yon paradi. — Sòm 37:10, 11; Eza. 35:5.