Èske espwa ede moun vre?

DANIEL te gen dizan sèlman, men sa te gentan fè ennan depi l t ap goumen ak yon kansè. Ni doktè yo ni moun ki pwòch li yo te pèdi espwa. Men, Daniel te toujou gen espwa. Li te gen konviksyon li t ap viv e lè l vin gran, li t ap fè rechèch pou l jwenn yon tretman pou kansè. Sa k te plis fè l gen espwa se paske te gen yon espesyalis ki konn trete kalite kansè l genyen an ki te gen pou vin nan zòn nan. Malerezman, lè jou a te rive, doktè a te oblije anile vizit la akoz move tan. Daniel te vin dekouraje. Pou premye fwa, li te pèdi espwa. Li mouri kèk jou apre sa.

Istwa sa a, se yon moun ki travay nan domèn lasante e ki te etidye efè espwa ak dezespwa genyen sou sante moun, ki te pale de li. Petèt ou tande istwa konsa deja. Pa egzanp, yon moun aje gendwa prèske mouri, men l ap tann pou l wè yon moun li renmen oswa pou l selebre anivèsè maryaj li. Yonfwa evènman an fin pase oswa l fin wè moun nan, li mouri. Ki sa k lakòz sa? Èske l posib vre pou espwa rive bay moun tout fòs sa a jan kèk moun kwè a?

De jou an jou, gen plis rechèch nan domèn lamedsin ki fè konprann lè yon moun wè bagay yo yon fason pozitif, lè l gen espwa ak lòt santiman pozitif, sa gen yon gwo efè vre sou lavi l ak sante l. Men, se pa tout moun ki dakò ak sa. Gen kèk moun k ap fè rechèch ki fè konnen tout sa se lejann, se istwa ki pa chita sou lasyans. Pou yo menm, se sèlman yon bagay fizik ki lakòz yon pwoblèm fizik.

Fò n di se pa premye fwa moun gen dout sou efè espwa genyen sou sante moun. Sa gen plizyè milye ane, yo te mande Aristòt, yon filozòf grèk, pou l bay yon definisyon pou espwa. Men sa l te di: “Se yon rèv moun fè je klè.” E pi pre nou, Benjamin Franklin, yon gwo politisyen ameriken, te di: “Moun k ap viv ak espwa ap mouri grangou.”

Nan ka sa a, ki sa pou n kwè? Èske espwa se sèlman yon bagay yon moun swete, yon senp rèv ki pèmèt moun jwenn konsolasyon? Oswa èske gen bonjan rezon pou n kwè espwa se yon bagay nou tout bezwen, ki bon pou sante nou e ki ede n gen kè kontan, yon bagay reyèl ki gen bonjan fondman e ki pote byenfè pou nou?