1, 2. Ki fason Jewova konsole nou nan eprèv nou yo, e ki asirans nou jwenn nan Pawòl li a?

GEN yon jèn frè selibatè, n ap bay non Eduardo, ki t ap fè yon ansyen ki aje e ki marye ki rele Stephen konn enkyetid li genyen. Eduardo t ap reflechi ak pawòl nou jwenn nan 1 Korentyen 7:28 la ki di: “Moun ki marye yo ap jwenn tribilasyon nan lavi yo.” Li te mande Stephen: “Ki sa ‘tribilasyon’ sa a ye e ki jan m ap kapab fè fas avè l si m marye?” Anvan Stephen reponn kesyon sa a, li te mande Eduardo pou l egzamine yon lòt bagay apot Pòl te ekri ki fè konnen Jewova se “Bondye tout konsolasyon an, ki konsole nou nan tout eprèv [“tribilasyon”, nòt] nou yo”. — 2 Kor. 1:3, 4.

² Vrèmanvre, Jewova se yon Papa ki gen lanmou, e li konsole n lè n ap fè fas ak difikilte. Petèt ou te fè kèk eksperyans kote Bondye te ba w èd ak konsèy, byen souvan, pa mwayen Pawòl li a. Nou kapab gen asirans li vle sa ki pi bon an pou nou, menm jan l te fè sa pou sèvitè l yo nan tan lontan. — Li Jeremi 29:11, 12.

3. Ki kesyon nou pral reponn?

 ³ Nòmalman, n ap nan pi bon pozisyon pou n fè fas ak pwoblèm oswa tribilasyon nou yo si n ka idantifye sa k lakòz yo. Se menm bagay la tou pou tribilasyon ki gen rapò ak maryaj oswa lavi fanmi. Nan ka sa a, ki bagay konsa Pòl te di ki ka fè yon moun jwenn “tribilasyon nan lavi” a? Ki egzanp nan tan biblik yo ak nan epòk nou an ki ka ede n jwenn konsolasyon nou bezwen an? Lè n konn repons kesyon sa yo, sa ap ede n fè fas ak tribilasyon yo.

4, 5. Site kèk bagay ki ka lakòz “tribilasyon nan lavi” a.

⁴ Yon ti tan apre Bondye fin kreye lèzòm, men sa l te di: “Yon gason ap kite papa l ak manman l, li pral atache ak madanm li, e y ap vin yon sèl chè.” (Jen. 2:24). Jewova te di pawòl sa yo lè l t ap marye premye mesyedam yo. Men, akoz enpèfeksyon, lè de moun marye e yo fonde yon nouvo fanmi, kapab vin gen mezantant nan fanmi yo (Wom. 3:23). An jeneral, se otorite mari a ki vin pran plas otorite paran yo. Bondye bay mari a otorite pou l chèf madanm li (1 Kor. 11:3). Gen kèk mari ak madanm ki fèk marye ki twouve sa pa fasil. Selon Pawòl Bondye a, yon madanm dwe aksepte se mari l ki pou dirije l olye se paran l. Moun ki fèk marye yo ka pa antann yo ak fanmi mari yo oswa fanmi madanm yo e sa ka fè yo jwenn tribilasyon.

⁵ Byen souvan, gen lòt pwoblèm ki konn rive apre yon madanm fin di mari l: “Nou pral gen yon bebe.” An jeneral, kè kontan moun ki marye yo konn genyen lè yo aprann yo pral gen yon timoun konn mache ak kèk enkyetid anrapò ak pwoblèm sante ki ka rive pandan gwosès la oswa apre. Epitou, yo dwe konsidere enpak sa pral gen sou yo nan domèn ekonomik, kit se tousuit, kit se alavni. Lè tibebe a fèt, li konn vin nesesè pou yo fè plis ajisteman. Manman an ka pase tout tan l ap pran swen pitit li, e li ka ba l tout atansyon l. Mari a ka santi madanm li abandone l paske madanm nan okipe nan pran swen tibebe a. Yon lòt bò, yon moun ki fèk papa vin gen lòt responsablite sou do l. Travay li vin ogmante paske l vin gen yon lòt moun nan fanmi an pou l pran swen e pou l ba l sa l gen bezwen.

6-8. Lè yon mari ak madanm li vle gen pitit men yo pa ka genyen, ki jan sa ka lakòz tètchaje?

⁶ Yon lòt kalite tribilasyon kèk moun marye konn rankontre se lè yo vle gen pitit ak tout fòs, men yo pa ka genyen. Lè madanm nan pa ka ansent, sa ka ba l anpil pwoblèm. Maryaj ak fè pitit pa bay garanti moun marye yo pap jwenn pwoblèm. Sepandan, lè yon mari ak madanm li vle gen pitit men yo pa ka genyen, sa poukont li se yon “tribilasyon nan lavi” a (Pwo. 13:12). Nan tan biblik yo, byen souvan, se te yon wont pou yon fi lè l pa t ka fè pitit. Rachèl, madan Jakòb, te santi l boulvèse lè l te wè sè l la gen pitit (Jen. 30:1, 2). Byen souvan, yo konn mande misyonè k ap sèvi nan peyi kote moun yo abitye gen anpil pitit poukisa yo pa gen pitit. Malgre bonjan esplikasyon lojik yo konn bay, moun yo konn di: “O, n ap priye pou nou!”

⁷ Ann pran egzanp yon sè nan peyi Angletè ki te vle gen timoun ak tout fòs, men espwa l te genyen an pa t reyalize. Rive yon lè, li te fè menopoz. Li fè konnen li te santi l dezespere paske l te rann li kont dezi l te genyen an pap reyalize nan sistèm sa a. Li menm ak mari l te deside adopte yon timoun. Men sa l di aktout sa: “Mwen toujou santi m nan  lapenn. M te konnen adopte yon timoun pa t ap menm bagay ak lè w fè pwòp pitit pa w.”

⁸ Bib la fè konnen lè yon kretyèn “fè pitit [...] sa ap yon pwoteksyon” pou li (1 Tim. 2:15). Men, sa pa vle di fè pitit oswa gen timoun ap fè yon moun jwenn lavi ki pap janm fini an. Olye de sa, sa vle di lè yon fi gen timoun pou l okipe e l gen lòt bagay pou l fè ki gen rapò ak pran swen kay, sa ka anpeche l tonbe nan tripotay e sa ka anpeche l antre nan zafè lòt moun (1 Tim. 5:13). Men, li ka toujou rankontre tribilasyon nan maryaj ak nan lavi fanmi.

9. Nan ki sans lanmò yon konjwen se yon eprèv san parèy?

⁹ Lè n ap pale de tribilasyon ki gen nan maryaj, gen yon tribilasyon ki gendwa pa vin nan lespri n tousuit. Se lanmò youn nan konjwen yo. Vrèmanvre, se yon eprèv san parèy pou anpil moun ki marye lè mari yo oswa madanm yo te renmen anpil la mouri. Konjwen ki vivan an gendwa pa t atann l ap jwenn yon eprèv konsa nan sistèm sa a. Kretyen yo gen bonjan konfyans nan pwomès Jezi te fè konsènan yon rezirèksyon ki gen pou fèt alavni (Jan 5:28, 29). Ki sa yon esperans konsa fè pou konjwen ki vivan an? Li fè l jwenn yon gwo konsolasyon. Se yon lòt fason Papa nou ki renmen nou an sèvi ak Pawòl li a pou l ede moun k ap fè fas ak tribilasyon e pou l konsole yo. Kounye a, ann egzamine fason kèk sèvitè Jewova te santi konsolasyon Jewova bay la ak fason sa te pwofitab pou yo.

10. Ki fason Ana te jwenn soulajman anba eprèv? (Gade foto ki nan kòmansman atik la.)

¹⁰ Ana, yon madanm Èlkana te renmen anpil, t ap fè fas ak yon eprèv. Li pa t ka fè pitit alòske Penina, lòt madanm Èlkana a, te gen anpil pitit. (Li 1 Samyèl 1:4-7.) “Chak ane”, Penina te konn fawouche Ana. Sa te boulvèse Ana anpil e l te nan gwo lapenn. Li te chèche jwenn soulajman lè l te pale ak Jewova sou pwoblèm li nan lapriyè. Konsa, li “te pase yon pakèt tan ap priye Jewova”. Èske l te atann pou Jewova ba l sa l te mande a? Sandout li te espere sa. Kèlkeswa jan sa te ye, “figi l pa t tris ankò”. (1 Sam. 1:12, 17, 18.) Li te gen konfyans swa Jewova t ap fè l vin ka fè pitit, swa l t ap konble bezwen sa a yon lòt fason.

11. Ki jan lapriyè ka fè n jwenn konsolasyon?

¹¹ Toutotan nou enpafè e n ap viv nan sistèm sa a ki anba pouvwa Satan, n ap kontinye jwenn eprèv ak tribilasyon (1 Jan 5:19). Men, li vrèman bon pou n konnen Jewova se “Bondye tout konsolasyon an”! Youn nan fason nou ka jwenn èd pou n fè fas ak eprèv oswa tribilasyon n ap rankontre yo se lè n priye. Ana te ouvri kè l bay Jewova. Menm jan an tou, lè n nan tribilasyon, nou bezwen fè plis pase annik di Jewova sa n santi. Nou bezwen sipliye l, wi, nou bezwen fè l konn sa n santi lè n priye l ak tout kè nou ak anpil fòs. — Flp. 4:6, 7.

12. Ki sa k te ede Àn ki te vèv gen kè kontan?

¹² Menmsi nou santi yon gwo vid nan lavi n, kit se paske nou pa gen timoun oswa nou gen yon moun pa nou ki mouri, nou ka toujou jwenn konsolasyon. Nan epòk Jezi a, Àn, yon dam ki te pwofèt, te pèdi mari l apre sèlman setan maryaj. Bib la pa di si l te gen pitit. Ki sa Àn te toujou ap fè aktout li te gen 84 an? Lik 2:37 di: “Li pa t janm pa nan tanp lan pou l bay Bondye yon sèvis sakre lajounen kou lannuit, li te konn fè jèn e li te konn fè siplikasyon.” Wi, Àn te jwenn konsolasyon e l te gen kè kontan nan adorasyon l t ap bay Jewova a.

13. Bay yon egzanp sou fason bon zanmi nou genyen yo ka konsole n menm lè moun ki fanmi pwòch nou pa fè sa.

 ¹³ Lè n travay kòtakòt ak frè n ak sè n yo, nou jwenn bon zanmi ak bonjan konpayon travay (Pwo. 18:24). Paula sonje jan l te santi l tris apre manman l te fin abandone laverite lè l te gen senkan. Li pa t fasil pou l fè fas ak eprèv sa a. Men, li te jwenn anpil ankourajman lè Ann, yon sè ki pyonye nan kongregasyon an, te montre l vrèman enterese nan ede l fè pwogrè nan domèn espirityèl. Men sa Paula esplike: “Menmsi Ann pa t fanmi m, lanmou ak sousi li te gen pou mwen te ede m anpil. Sa te ede m kontinye sèvi Jewova.” Paula kontinye sèvi Jewova fidèlman. Anplis de sa, li kontan anpil dèske manman l retounen vin sèvi Jewova ansanm avè l nan kongregasyon an. Sè Ann kontan tou paske l tankou yon manman pou Paula nan domèn espirityèl.

14. Ki byenfè moun k ap konsole lòt moun yo ka jwenn?

¹⁴ Li enteresan pou n konnen, lè n montre n enterese nan lòt moun avèk lanmou, sa ka fè n bliye kèk santiman negatif nou genyen. Gen anpil sè, kit yo marye kit yo pa marye, ki jwenn anpil jwa lè y ap preche bon nouvèl la antanke konpayon travay Bondye. Objektif yo se fè Bondye jwenn louwanj lè yo fè volonte l. Gen kèk nan yo ki menm konsidere patisipasyon yo nan travay predikasyon an  kòm yon terapi. Sa klè, se nou tout ki kontribye pou gen yon lyen solid nan kongregasyon an lè n demontre sousi pou lòt moun, anpalan de moun nan tèritwa a ak moun nan kongregasyon an (Flp. 2:4). Apot Pòl kite yon bon egzanp pou nou. Li te vin tankou “yon manman” pou moun ki te nan kongregasyon Tesalonik yo, e l te vin tankou yon papa espirityèl pou yo. — Li 1 Tesalonisyen 2:7, 11, 12.

15. Kiyès an premye ki gen responsablite pou anseye timoun yo laverite?

¹⁵ Yon lòt domèn ki merite atansyon se konsolasyon ak èd n ap bay fanmi yo. Pafwa, moun ki fèk vin nan laverite yo konn mande kèk pwoklamatè ki gen matirite pou yo ede yo anseye pitit yo laverite oswa menm pou yo etidye Labib avèk pitit yo. Selon sa Ekriti yo fè konnen, se paran yo an premye ki gen responsablite pou anseye timoun yo e pou ba yo fòmasyon (Pwo. 23:22; Efe. 6:1-4). Nan kèk ka, li ka nesesè pou lòt moun ede yo, e paran yo konn apresye sa anpil. Men, sa pa retire responsablite paran yo. Li enpòtan anpil pou yo kominike regilyèman ak fanmi an.

16. Ki sa n dwe sonje lè n ap ede timoun yo?

¹⁶ Si yon paran deside pou yon lòt moun etidye ak pitit li, moun k ap fè etid la pa dwe eseye pran plas paran an. Gendelè yo konn mande yon Temwen pou l etidye Labib ak timoun paran yo pa enterese nan laverite. Nan ka sa a, Temwen an bezwen sonje, menm lè l ap ede timoun nan nan domèn espirityèl, sa pa fè l vin paran l pou sa. Epitou, si l ap kondui yon etid konsa, li t ap bon pou l fè l lakay timoun nan an prezans paran l oswa yon lòt Temwen ki gen matirite oubyen l ka fè l nan yon zòn ki apwopriye kote lòt moun ka wè yo. Konsa, pèsonn pap gen okenn rezon pou yo mal entèprete sa k ap fèt la. Petèt, rive yon lè, paran yo ap ranpli responsablite Bondye ba yo pou yo pran swen pitit yo nan domèn espirityèl.

17. Ki jan timoun yo ka vin yon sous konsolasyon pou lòt moun?

¹⁷ Timoun ki aprann demontre lanmou pou vrè Dye a e ki suiv konsèy li yo ka vin yon sous konsolasyon pou lòt moun nan fanmi an. Yo ka fè sa lè yo demontre respè pou paran yo ak lè yo ede yo divès fason. Mete sou sa, yo ka ba yo bonjan èd nan domèn espirityèl. Anvan delij la, Lamèk, yon desandan Sèt, t ap adore Jewova. Men sa chèf fanmi sa a te di konsènan Noye, pitit gason l: “[L] ap pote konsolasyon pou nou nan travay di n ap fè ak nan mizè n ap pase akoz Jewova te lage malediksyon sou tè a.” Pwofesi sa a te reyalize lè Jewova te retire malediksyon l te lage sou tè a (Jen. 5:29; 8:21). Nan yon sans, timoun ki vin nan vrè adorasyon an ka montre yo se yon sous konsolasyon pou moun nan fanmi yo lè yo ede yo andire eprèv yo rankontre e pou yo chape nan yon bagay ki pi gwo lontan pase delij la.

18. Ki sa k ka ede n gen kouraj pou n andire malgre tribilasyon oswa eprèv n ap rankontre yo?

¹⁸ Gen plizyè milyon moun ki jwenn konsolasyon nan tout eprèv yo rankontre depi kounye a lè yo priye, lè yo medite sou egzanp ki nan Bib la ak lè yo chèche gen bon zanmi pami pèp Jewova a. (Li Sòm 145:18, 19.) Sa klè, lefètke n konnen Jewova se Sous konsolasyon ki la pou toutan an, sa ap ede n gen kouraj pou n andire kèlkeswa tribilasyon n ap rankontre depi kounye a e alavni.