Pandan Jezi ap manje lakay Farizyen an, gen plizyè milye moun rasanble deyò a ap tann lè Jezi ap soti. Li te fè menm eksperyans sa a ak foul moun ki te Galile yo (Mak 1:33; 2:2; 3:9). Pandan l nan Jide a, gen anpil moun ki vle wè l e ki vle tande l, sa ki diferan parapò ak atitid Farizyen yo ki nan repa a.

Premye sa Jezi di a gen yon siyifikasyon espesyal pou disip li yo. Men sa l di: “Veye kò nou ak ledven Farizyen yo, ki se ipokrizi.” Jezi bay avètisman sa a deja, men, sa l te wè nan repa a montre jan konsèy sa a li bay la enpòtan (Lik 12:1; Mak 8:15). Petèt Farizyen yo ka pran pòz yo gen pitye yon fason pou yo ka eseye kache mechanste yo genyen, men, yo reprezante yon danje moun yo bezwen wè aklè. Men sa Jezi di: “Pa gen anyen ki byen kache ki pap vin parèt aklè e pa gen anyen ki sekrè moun pap vin konnen.” — Lik 12:2.

Petèt anpil nan foul moun ki antoure Jezi yo se moun Jide ki poko tande l ap anseye nan Galile. Se sa k fè, li repete pwen kle li te di anvan yo. Men ki ankourajman li bay moun k ap koute l yo: “Pa pè moun ki ka touye kò a e ki pa ka fè anyen apre sa.” ​(Lik 12:4). Menm jan l te fè anvan sa, li atire atansyon sou jan li enpòtan pou disip li yo kwè Bondye ap pran swen yo. Yo bezwen rekonèt Pitit lòm nan epi yo bezwen rekonèt Bondye kapab ede yo. — Matye 10:19, 20, 26-33; 12:31, 32.

Apre sa, gen yon mesye nan foul la ki vin pale ak Jezi konsènan yon bagay ki enterese l, li di Jezi: “Anseyan, di frè m nan pou l ban m pa m nan eritaj mwen gen avè l la.” ​(Lik 12:13). Lwa Moyiz la fè konnen premye pitit gason an dwe resevwa de pòsyon nan eritaj la, se poutèt sa pa ta dwe gen diskisyon (Detewonòm 21:17). Sepandan, sanble mesye sa a vle gen plis pase sa Lalwa te pèmèt li jwenn. Avèk sajès, Jezi pa pran pozisyon pou youn nan yo. Men sa l mande mesye a: “Zanmi, kiyès ki mete m jij nou oswa kiyès ki mete m kòm abit nou?” — Lik 12:14.

Annapre, Jezi bay tout moun ki la yo ankourajman sa a: “Rete je ouvè, epi evite tout kalite tanta. Paske, menm lè yon moun ap viv nan abondans, lavi l pa depann de bagay li posede yo.” ​(Lik 12:15). Kèlkeswa kantite bagay yon moun rive posede, èske lè l mouri li pap kite yo? Pou Jezi mete aksan sou pwen sa a, li sèvi ak yon egzanp moun pap janm bliye ki montre enpòtans pou yon moun gen bon repitasyon devan Bondye.

Men sa Jezi di: “Te gen yon mesye rich ki te gen tè ki te bay bon rannman. Konsa, misye kòmanse ap reflechi, li di: ‘Ki sa m pral fè kounye a, paske mwen pa gen kote pou m met rekòt mwen yo?’ Apre sa, li di: ‘Men sa m ap fè: M ap kraze depo m yo, m ap bati depo ki pi gwo, epi m ap mete tout manje angren m yo ak tout sa m genyen yo ladan yo. Apre sa, m ap di tèt mwen: “Ou gen anpil bon bagay la a nan depo pou anpil ane. Pran lèz kò w, manje, bwè, epi pran plezi w.”’ Men, Bondye di li: ‘Egare! Aswè a menm y ap mande w vi w. Bon, bagay ou sere yo, pou kiyès y ap ye?’ Se konsa sa ye pou moun k ap sere trezò pou tèt li, men ki pa rich nan je Bondye.” — Lik 12:16-21.

Disip Jezi yo ak lòt moun k ap koute yo te ka tonbe nan pyèj nan chèche anpile richès. Menm jan an tou enkyetid lavi a ka distrè sèvitè Jewova yo. Se sa k fè Jezi repete bèl konsèy li te bay nan Diskou sou mòn nan sa gen ennan edmi.

Men sa Jezi di ankò: “Sispann bay tèt nou pwoblèm pou vi nou pou n ap mande ki sa n ap manje, oubyen pou kò nou pou n ap mande ki  sa n ap met sou nou. [...] Gade kaw yo byen. Yo pa ni simen ni rekòlte, e yo pa gen depo manje. Men, Bondye ba yo manje. Èske nou pa gen plis valè pase zwazo? [...] Suiv byen jan flè yo pouse. Yo pa ni travay di, ni koud rad. Poutan, m ap di nou sa: Menm Salomon, nan tout glwa li, pa t konn abiye tankou youn nan yo. [...] Se poutèt sa, sispann enkyete nou pou n ap mande ki sa n ap manje e ki sa n ap bwè, epi sispann bay tèt nou pwoblèm. [...] Papa nou konnen nou bezwen bagay sa yo. [...] Kontinye chèche Wayòm li an e l ap ajoute bagay sa yo pou nou.” — Lik 12:22-31; Matye 6:25-33.

Ki moun k ap kontinye chèche Wayòm Bondye a? Jezi fè konnen, nan yon sans, se yon ti gwoup moun fidèl oswa yon “ti twoupo” ki t ap fè sa. Annapre yo t ap fè konnen kantite sa a se sèlman 144 000 moun. Ki sa yo pral jwenn? Jezi ba yo asirans sa a: “Papa nou twouve li bon pou li ban nou Wayòm nan.” Yo pa konsantre yo ap chèche jwenn trezò sou tè a, kote vòlè ka vòlè yo. Olye de sa, yo konsantre yo ap “chèche gen yon trezò ki pap janm fini nan syèl la”, kote yo pral dirije ak Kris. — Lik 12:32-34.