CHAPIT 17

Ki jan m dwe konsidere kesyon fè zanmi nan lekòl?

“Pafwa mwen wè yon gwoup elèv epi m di: ‘Waw, yo bon zanmi vre. Mwen ta renmen gen zanmi konsa.’” — Joe.

“M pa t gen pwoblèm pou m fè zanmi lè m te lekòl. Sa te fasil. E se sa k te pwoblèm mwen.” — Maria.

 TOUT moun bezwen zanmi, sa vle di moun yo ka pase bon moman avè yo lè sa bon e yo ka konte sou yo lè sa pa bon. Jezi te gen zanmi e li te renmen pase tan avèk yo (Jan 15:15). Lè l te prèske mouri sou poto soufrans lan, Jan ki te bon zanmi l, “disip li renmen an”, te toupre l (Jan 19:25-27; 21:20). Se zanmi konsa ou bezwen, moun k ap rete bò kote w nan bon kou nan move tan.

Ou ka santi ou jwenn kalite zanmi sa a nan lekòl la, petèt gen youn oswa de elèv nan klas ou ou antann ou byen avè yo. Gen bagay nou enterese ladan yo, e nou renmen pale ansanm. Pou ou menm, jèn sa yo pa sanble “move frekantasyon”. (1 Korentyen 15:33.) Anne di: “Ou wè timoun sa yo chak jou, donk ou santi w alèz lè w avè yo. Se pa menm jan ak lè w ansanm ak frè ak sè yo, paske pafwa lè w bò kot frè yo ou santi fò w veye kò w. Nan lekòl la ou ka rilaks.” Oubyen tou, ou ka wè bagay yo menm jan ak Lois, men sa l di: “Mwen te vle pou zanmi nan lekòl la wè Temwen Jewova pa si diferan pase sa, m te vle montre yo nou se moun nòmal.” Èske rezon sa yo se bon rezon pou w vin bon zanmi ak elèv lekòl ou?

Poukisa w bezwen pran prekosyon?

Ann wè sa k te rive Maria nou te pale de li pi wo a. Lefètke li te alèz ak moun sa te fè l fasil pou l fè zanmi, men li te difisil pou l konnen ki limit pou l mete. Li di: “Mwen te santi m byen lè ni fi ni gason te apresye m kòm zanmi.  Kòm rezilta, mwen te tonbe nan yon seri sitiyasyon ki te difisil pou m soti.” Lois te fè yon eksperyans prèske menm jan an. Li di: “Lòt elèv yo te kòmanse detenn sou mwen. Mwen te kòmanse aji menm jan avèk yo.”

Sa pa fè n sezi. Anfèt, pou w ka ret bon zanmi yon moun, ou bezwen enterese nan menm bagay avè l e nou bezwen gen menm prensip. Si w fè zanmi ak moun ki pa gen menm kwayans avè w e ki pap suiv prensip ki nan Bib la, se sèten y ap detenn sou ou (Pwovèb 13:20). Apot Pòl te gen rezon ekri: “Pa mete tèt nou anba menm jouk ak moun ki pa kwayan, piske jouk sa a t ap miwomiba.” — 2 Korentyen 6:14.

Sa w ka fè

Èske konsèy apot Pòl la vle di ou dwe evite gen kontak ak tout elèv nan lekòl ou epi w ret poukont ou? Non, se pa sa! Pou kretyen yo ka suiv lòd pou yo “fè disip pami moun tout nasyon”, yo bezwen gen kontak ak gason kou fi, ki nan tout ras, tout relijyon ak tout kilti. — Matye 28:19.

Apot Pòl kite yon bèl egzanp nan sans sa a. Li te konnen sa pou l fè pou l ka pale ak “tout kalite moun”,  menmsi li pa gen menm kwayans avè yo (1 Korentyen 9:22, 23). Ou ka suiv egzanp apot Pòl. Se pou w janti ak jèn parèy ou yo. Aprann jan pou w byen kominike avè yo. Men, veye pou w pa vin pale oswa aji menm jan avèk yo. Pou sa pa rive, kou sa posib, avèk respè, esplike yo rezon ki fè ou chwazi suiv prensip ki nan Bib la. — 2 Timote 2:25.

Se vre, w ap parèt diferan e se pa yon bagay ki fasil (Jan 15:19). Ann pran yon egzanp pou ede w konprann. Si w ta nan yon bato epi w wè gen moun nan dlo a k ap nwaye, ki sa w t ap fè pou ede yo? Èske w t ap kite bato a pou w plonje al jwenn yo? Se sèten ou pa t ap fè sa!

 Menm jan an tou, nan lekòl la ou antoure ak moun ki pa gen pwoteksyon w genyen dèske w se zanmi Jewova (Sòm 121:2-8). Si w kite prensip Jewova yo jis paske w vle vin pi pwòch elèv nan lekòl ou yo, ou riske pèdi relasyon ou gen ak Jewova a, e w riske pa gen kè kontan (Efezyen 4:14, 15; Jak 4:4). Li t ap pi bon pou w eseye ede elèv nan lekòl ou yo pou yo vin jwenn ou lè w montre yo ki jan pou yo sèvi Jewova. Vrèmanvre, se pi bon fason ou ka montre ou se yon bon zanmi pou yo.

VÈSÈ KLE

“Mwen fè tout bagay pou bon nouvèl la, pou m ka pataje l ak lòt moun.” — 1 Korentyen 9:23.

MEN YON IDE

Si kèk nan elèv nan klas ou vle aprann plis bagay sou kwayans ou, ba yo posiblite pou yo di sa yo panse. Byen koute yo. Lè w ap pale, fè sa “avèk dousè e avèk gwo respè”. — 1 Pyè 3:15.

ÈSKE W TE KONNEN?

Anpil nan moun k ap sèvi Bondye jodi a te aprann Labib nan men yon elèv nan klas yo ki te gen kouraj pou l pale sou lafwa l.

SA M KONTE FÈ

Men sa m ap fè si m santi mwen vin twò pwòch ak youn nan elèv nan lekòl mwen an ․․․․․

Men sa m ap fè si youn nan elèv nan lekòl mwen ap pase m nan rizib akoz kwayans mwen ․․․․․

Men sa mwen ta renmen mande paran m sou sijè sa a ․․․․․

KI SA W PANSE?

● Ki sa k fè w panse li pi fasil pou w fè zanmi nan lekòl la pase nan kongregasyon an?

● Ki danje ki genyen lè w pran detant apre lekòl fin lage ak elèv nan klas ou ki pa kwayan?

● Ki avantaj ki genyen lè w fè elèv nan klas ou konnen ou se Temwen Jewova?

[Antrefilè nan paj 143]

“Mwen te konn aji menm jan ak elèv yo, sa ki te fè l fasil pou m fè zanmi avèk yo. Men, mwen te aprann nan erè m te fè yo. Kounye a, mwen gen zanmi nan kongregasyon an, zanmi mwen ka fè konfyans.” — Daniel.

[Foto nan paj 146]

Ki jan w ka pi byen ede yon moun k ap nwaye? Èske se lè w plonje nan dlo a oswa lè w ba l yon bagay pou l ka sove lavi l?