CHAPIT 33

Poukisa m dwe evite pònografi?

Ki kantite fwa ou tonbe sou pònografi san se pa sa w t ap chèche?

□ Jamè

□ Yon lè konsa

□ Regilyèman

Ki kote sa pi fasil fèt?

□ Sou Entènèt

□ Nan lekòl

□ Nan televizyon

□ Lòt

Ki sa w fè lè konsa?

□ Mwen vire tèt mwen tousuit.

□ Kòm mwen anvi konnen sa l ye, mwen konn fè ti koudèy.

□ Mwen ret ap gade e mwen menm konn chèche wè plis.

 LÈ PARAN W te nan laj ou, pou yon moun te wè pònografi, li te oblije al chèche l. Men kounye a, w a di se pònografi a ki chèche w. Gen yon jèn fi ki gen 19 an ki di: “Pafwa, lè m m ap navige sou Entènèt, petèt m ap chèche bagay pou m achte oswa m ap verifye kantite kòb ki sou kanè bank mwen, sanzatann gen imaj pònografi ki konn parèt!” Se yon bagay ki fèt souvan. Nan yon sondaj yo te fè, sou chak 100 jèn ki gen ant 8 a 16 an gen 90 ladan yo ki di imaj pònografi konn parèt devan yo lè yo sou Entènèt san yo pa t chèche sa, e nan pifò ka se pandan y ap fè devwa yo.

Etandone pònografi gaye konsa, ou ka mande tèt ou èske se yon bagay ki mal vre? Repons lan se wi! Pònografi degrade ni moun ki patisipe ladan l lan ni moun k ap gade l la, e souvan se premye pa anvan yon moun tonbe nan imoralite seksyèl. Men li fè plis domaj toujou.

Lè w gade pònografi sa ka vin tounen yon abitid ki gen move efè k ap dire lontan. Ann pran egzanp yon mesye ki rele Jeff ki gen 14 an depi l sispann gade pònografi. Li di: “Se chak jou m ap lite ak anvi pou m gade l. Se vre, se pa menm jan ak anvan men anvi a toujou la. Mwen toujou anvi konnen. Imaj yo toujou nan lespri m. Mwen regrèt dèske mwen te pran wout sa a. Okòmansman, li parèt san danje. Men, kounye a mwen konnen se pa vre. Pònografi lakòz gwo domaj, li sal anpil e li degrade ni moun ki fè l yo ni moun ki gade l yo. Malgre sa moun ki patizan l yo di, pa gen anyen menm ki bon nan pònografi.”

 Analize sitiyasyon an

Ki jan w ka evite tonbe sou pònografi menm pa aza? Premyèman, analize sitiyasyon an. Èske gen kèk bagay ki pi fasil lakòz ou tonbe sou li? Reflechi sou egzanp ki vin annapre yo:

Èske gen chans pou elèv nan klas ou voye pònografi pou ou nan imel ou oswa sou telefòn ou? Si se sa, li t ap bon pou w efase mesaj yo voye ba ou san w pa menm ouvri yo.

Lè w ap fè rechèch sou Entènèt, èske gen mo lè w tape yo ki fè mesaj oswa imaj pònografi parèt? Lefètke w konn sa ka fèt, sa ka ede w pi presi epi pran plis prekosyon lè w ap tape mo kle sou Entènèt.

Pi ba a, ekri tout sitiyasyon ki te lakòz ou tonbe sou pònografi.

․․․․․

Èske gen yon bagay ou ka fè pou w pa tonbe sou pònografi menm jan an oswa pou w evite tonbe sou li nèt? Si se sa, nan espas ki pi ba a, ekri sa w konte fè.

․․․․․

Si w deja tonbe nan gade pònografi

Tonbe sou pònografi pa aksidan se youn, al chèche gade pònografi se yon lòt bagay. Ki sa pou w fè si w gen  abitid gade pònografi? Natirèlman, li pa fasil pou yon moun sispann gade pònografi. Pa egzanp: Imajine yo ta mare de men w ak yon fil. Siman ou te ka libere tèt ou lè w annik rale men w. Men, e si yo ta woule fil la nan men w plizyè fwa? Li t ap pi difisil pou w libere tèt ou. Se menm bagay la pou moun ki gen abitid gade pònografi. Plis yo gade l se plis l ap difisil pou yo libere tèt yo anba l. Si sa rive w, ki jan w ka rive libere tèt ou?

Konsidere pònografi pou sa l ye a. Pònografi se vrèman yon taktik Satan sèvi avè l pou l sal yon bagay Jewova kreye ki onorab. Lè w byen konprann sa pònografi ye vre, sa ap ede w pou w “rayi sa ki mal”. — Sòm 97:10.

Egzamine konsekans yo. Pònografi kraze maryaj. Li fè moun pa gen respè pou moun k ap fè pònografi yo.  Li rabese moun k ap gade l yo. Labib gen rezon lè l di: “Moun ki gen lespri a wè danje a, li kache.” (Pwovèb 22:3). Nan espas ki pi ba a, ekri yon move bagay ki ka rive w si w pran abitid gade pònografi.

․․․․․

Pran yon desizyon fèm. Jòb, ki te yon moun fidèl, te di: “Mwen te fè sèman pou m pa janm gade yon jenn fi avèk move lide.” (Jòb 31:1, Bib la). Men kèk rezolisyon ou ka pran:

Mwen pap sèvi ak Entènèt lè m poukont mwen.

Si yon imaj oswa yon sit ki gen pònografi parèt, m ap fèmen l tousuit.

M ap pale ak yon zanmi ki gen matirite si m gade pònografi ankò.

Èske w jwenn youn oswa de lòt rezolisyon ki ka ede w lite kont pònografi? Si se sa, ekri yo la a.

․․․․․

Priye sou sijè a. Gen youn nan moun ki te ekri Sòm yo ki te sipliye Jewova, li di: “Pa kite je m ret ap gade sa k  pa vo anyen.” (Sòm 119:37). Jewova vle w reyisi, e li ka ba w fòs ou bezwen pou w fè sa ki dwat. — Filipyen 4:13.

Pale ak yon moun. Byen souvan, chwazi yon moun pou pale sou pwoblèm nan se yon etap enpòtan pou sispann gade pònografi (Pwovèb 17:17). Nan espas ki pi ba a, ekri non yon moun ki gen matirite ou santi w alèz pou w pale avè l sou sa.

․․․․․

Ou mèt gen asirans ou kapab genyen batay w ap mennen kont pònografi a. Anfèt, chak fwa ou evite gade l se yon viktwa ou ranpòte. Lè konsa, priye Jewova pou w di l mèsi paske l te ba w fòs pou w evite l. Toujou sonje, lè w evite pònografi ki se yon gwo sous pwoblèm ak soufrans, ou fè kè Jewova kontan! — Pwovèb 27:11.

VÈSÈ KLE

“Se poutèt sa, fè manm kò nou ki sou tè a mouri anrapò ak imoralite seksyèl, salte, dezi seksyèl san kontwòl, anvi pou nou fè sa ki mal, e anrapò ak tanta, ki se idolatri.” — Kolosyen 3:5.

MEN YON IDE

Asire w òdinatè w la sou yon mòd ki bloke sit pònografi yo. Epitou, lè moun ou pa konnen voye imel ba ou evite klike sou lyen ki nan imel yo.

ÈSKE W TE KONNEN?

Fason moun obsede ak pònografi sanble anpil ak fason espri mechan yo te obsede ak sèks nan epòk Noye a. — Jenèz 6:2.

SA M KONTE FÈ

Men sa m ap fè pou m evite tonbe sou pònografi san se pa sa m t ap chèche ․․․․․

Men sa mwen ta renmen mande paran m sou sijè sa a ․․․․․

KI SA W PANSE?

● Nan ki sans pònografi sal bagay ki onorab?

● Ki jan w t ap ede yon frè w oswa yon sè w ki konn gade pònografi?

[Antrefilè nan paj 278]

“Anvan m te etidye Labib, mwen te konn pran prèske tout gwo dwòg ki genyen yo. Men, pami tout bagay mwen te esklav, se pònografi ki te pi difisil pou m libere anba l. Se sèlman grasa èd Jewova ki fè m te rive pote laviktwa.” — Jeff.

[Foto nan paj 276]

Efè pònografi gen sou yon moun vin pi plis chak fwa moun nan gade l, plis li gade l se plis li difisil pou l libere tèt li anba l.