Nan kòmansman ane 1930 yo, Temwen Jewova yo potko janm preche nan Endonezi, Malezi ak nan peyi ki rele Papwazi Nouvèl Gine jodi a. Ki jan yo t ap fè pou yo pèmèt bon nouvèl la rive nan tèritwa sa yo? Enben, filyal peyi Ostrali a (kounye a se filyal Ostralazi) te achte yon bato ki gen de gwo vwal e ki mache ak motè ki mezire 16 mèt (52 pye) longè. Yo te rele bato a Lightbearer (laytbèwèr), paske tout moun ki te nan bato a se te pyonye a. Pyonye sa yo te konn itilize bato a pou yo gaye limyè verite a nan tèritwa ki lwen yo. — Matye 5:14-16.

 Nan mwa fevriye 1935, sèt frè yo ki te nan bato a te kite vil Sidne, nan kot lès peyi Ostrali e yo te pran direksyon Pò Moresbi nan Nouvèl Gine. Pandan vwayaj la, yo te konn peche pwason pou yo manje e yo te konn kanpe nan kèk pò pou yo kapab achte gaz ak bagay y ap bezwen pou yo manje e yo te fè kèk reparasyon nan bato a. Nan dat 10 avril 1935, yo te pran direksyon Cooktown, nan Queensland. Nan kòmansman vwayaj la, yo pa t twò itilize motè bato a, men etandone yo te rive nan zòn ki rele Gwo baryè Resif la, yon zòn ki danjere anpil, yo te deside balanse motè a. Men, motè a te kòmanse fè yon bri dwòl, yo te oblije etenn li. Nan ka sa a, ki sa pou yo fè? Èske yo dwe kase tèt tounen oubyen kontinye wout yo pou Nouvèl Gine? Kapitèn bato a, Eric Ewins, sonje “pa gen nou youn ki te anvi tounen”. Donk, bato a te kontinye wout li, e yo te rive nan Pò Moresbi an byen nan dat 28 avril 1935.

 Pandan yon mekanisyen t ap ranje motè a, tout gwoup la, sof Frank Dewar, te pwofite preche bon nouvèl la nan Pò Moresbi. Men sa Frank, yon “pyonye ki te konn travay di” selon youn nan mesye yo, di konsènan jou sa a: “Mwen te pran kèk liv epi mwen mache nan vil la, mwen te fè anviwon 32 kilomèt, si se pa plis, ap mache epi pale ak moun mwen rankontre nan vil la.” Lè l ap tounen nan bato a, li te pase nan yon lòt wout, e li te oblije travèse yon ti rivyè ki te chaje kwokodil. Li te pran anpil prekosyon e konsa li te retounen sennesof. Bonjan efò mesye yo te fè nan tavay predikasyon an te bay bon rezilta. Pi devan, kèk nan moun ki te pran piblikasyon nan men yo nan epòk la te vin Temwen Jewova.

 Yonfwa motè bato a fin ranje, yo kite Pò Moresbi e yo pran direksyon zile Java ki nan End oryantal Neyèlandè (jodi a ki se sitou Endonezi). Gwoup la te rive nan vil Batavya (yo rele l Jakata kounye a) 15 jiyè 1935.

 Lè yo rive, Charles Harris, youn nan frè yo, te kite bato a pou l rete nan zile Java kote l te kontinye preche bon nouvèl la avèk zèl. b Li fè konnen: “Nan epòk sa a, travay predikasyon an se te sitou ale nan yon vil bay moun yo piblikasyon ki baze sou Bib la epi travèse nan yon lòt vil. Mwen te gen piblikasyon nan lang arab, chinwa, neyèlandè, anglè ak endonezyen. Moun yo te kontan aksepte piblikasyon yo, sa ki fè nan yon ane, mwen te rive plase anviwon 17 000 piblikasyon”.

 Gwo zèl Charles te demontre nan travay predikasyon an te atire atansyon otorite neyèlandè yo. Yon lè, gen yon ofisye ki te mande youn nan Temwen ki t ap preche nan Java yo konbyen Temwen k ap preche nan Java delès, kote Charles te ye a. Frè a te reponn: “Yon sèl.” Ofisye a te reponn li byen fò: “Ou panse m ap kwè sa w di a? Ou dwe gen yon lame moun k ap travay lòtbò a, e tout kantite piblikasyon nou distribye toupatou yo montre sa!”

 Soti Endonezi, bato ki rele Lightbearer la te met vwal pou Sengapou, e l te rive Sengapou 7 out. Chak kote frè yo te kanpe bato a, yo te konn itilize gwo opalè ki gen nan bato a ak yon anplifikatè ki pisan pou yo pase yon seri diskou ki tou anrejistre. Souvan, metòd predikasyon sa a te konn atire atansyon anpil moun. Anfèt, gen yon jounal nan Sengapou (Singapoor Free Press) ki te fè konnen: “Lè mèkredi swa, nou kapab tande yon gwo vwa k ap pale byen fò sou lanmè a. [...] Sou bato ki rele Lightbearer la, y ap pase yon diskou ki san parèy. [...] Depi lè bato sa a, ki sot ann Ostrali, te rive Sengapou, y ap pase diskou Watch Tower yo.” Rapò a menm fè konnen: “Lè pa gen move tan, yon moun kapab tande diskou a menmsi li ta nan yon distans [...] 3 oubyen 4 kilomèt parapò ak bato a.”

 Pandan bato a te Sengapou, Frank Dewar te kite gwoup la pou l ale nan yon lòt asiyasyon. Men sa l sonje konsènan lè l t ap kite frè yo: “Nou te kòmanse preche nan Sengapou toutpandan n ap viv sou bato a. Lè moman an te rive pou bato a rekòmanse vwayaj li, Eric Ewins te ban m yon nouvèl ki te fè m sezi, li te di: ‘Bon, Franck, ou te di ou menm se Syam (yo rele Taylann kounye a) ou chwazi kòm tèritwa w. Nou pa kapab rive pi lwen avè w. Ou mèt ale.’ M te tèlman sezi m pa t ka pale klè, m te di l: ‘Men, kote m ye la a m pa menm konn ki wout pou m fè pou m al Syam!’” Eric te di Franck li ka ale Kwala Loumpou, ki rele Malezi jounen jodi a, epi l ap pran yon tren k ap depoze l Taylann. Franck pa t fè ni de ni twa, li pran direksyon Kwala Loumpou epi kèk mwa apre li rive Taylann. c

 Pandan bato a t ap pase nan kot lwès Malezi, li te kanpe nan yon seri vil tankou Jowore Bawou, Mouwa, Malaka, Klang, Pò Swetennham (kounye a se Pò Klang), ak Penang. Chak fwa bato a rive nan yon pò, frè yo te itilize gwo opalè yo genyen nan bato a pou yo pase diskou ki baze sou Bib la ki deja anrejistre. Men sa Jean Deschamp, yon Temwen ki t ap sèvi nan Endonezi alepòk, di: “Menm yon soukoup volan pa t ka atire atansyon moun plis pase bato sa a.” Apre yo fin pase anrejistreman diskou yo, frè yo desann nan pò a epi yo kòmanse bay moun ki enterese yo piblikasyon.

 Soti Penang, yo pase nan detwa Malaka a pou y ale Medan, yon vil nan Soumatra (kounye a li fè pati Endonezi). Men sa Eric Ewins sonje: “Nou te pase bèl ti moman nan Medan, e anpil moun te tande bon nouvèl la.” Frè yo te bay anviwon 3 000 piblikasyon nan tout zòn nan.

 Pandan bato a ap kontinye wout li nan direksyon sid, frè yo te preche nan gwo pò ki nan lès Soumatra yo. Nan mwa novanm 1936, bato a te retounen Sengapou, e se la Eric Ewins te kite frè yo. Kèk semèn annapre, li te marye ak Irene Struys, yon Temwen ki t ap viv Sengapou. Eric ansanm ak Irene te kontinye sèvis yo antanke pyonye nan Soumatra. Piske Eric te ale, Lightbearer la te vin bezwen yon nouvo kapitèn.

 Norman Senior te vin nouvo kapitèn bato a, se yon moun ki te pran fòmasyon nan kesyon dirije bato. Se Sidne li te soti nan mwa janvye 1937 pou l rejwenn gwoup la. Apre sa, bato a te met tèt pou Bòneyo ak Selebèz (ki rele Soulawezi kounye a), kote frè yo te preche anpil, yo te menm rive preche sou yon distans 480 kilomèt (300 mil) konsa nan zòn sa yo.

 Lè bato a te rive nan Pò Samarinda, nan Bòneyo, responsab pò a te refize kite frè yo preche moun nan zòn nan. Men, lè Norman esplike l sa travay predikasyon nou an gen ladan l, li te dakò kowopere avèk nou e li te menm aksepte kèk piblikasyon.

 Nan yon lòt okazyon, gen yon pastè nan zòn nan ki te envite Norman pou l vin pale nan legliz li a. Men olye pou Norman te pale, li te pito itilize fonograf la pou l pase senk nan diskou ki baze sou Bib la ki te deja anrejistre. Pastè a te renmen sa l te tande yo. Li te menm pran kèk piblikasyon pou l bay zanmi l. Men se sèl li menm pami chèf relijye nan zòn nan ki te renmen bon nouvèl la. An jeneral, chèf relijye yo pa t kontan ak travay Temwen Jewova yo t ap fè a. Anfèt, yo te ankòlè anpil kont frè yo pou temwayaj yo te bay avèk kran an e yo te menm fè presyon sou otorite yo pou yo entèdi bato ki rele Lightbearer la rantre nan lòt pò yo.

 Nan mwa desanm 1937, akoz entèdiksyon chèf relijye yo te fè otorite yo mete a, bato Lightbearer la te met vwal pou tounen ann Ostrali. Yo te jete lank nan pò Sidne a atan pou yo te asiste kongrè Temwen Jewova yo t ap fè nan mwa avril 1938 la. Sa vle di, yo te tounen nan pò Sidne a sou plis pase twazan apre yo te kite l pou ale nan kanpay predikasyon sa a. Yo te vann bato Lightbearer la nan kòmansman ane 1940 yo, kèk tan apre yo te entèdi travay Temwen Jewova yo ann Ostrali. Men sa frè Ewins fè konnen: “Sa klè, bato a te jwe wòl li te dwe jwe a.” E li di tan li te pase sou bato a “se moman li te gen plis kè kontan nan lavi l”.

 Frè yo ki te sou bato Lightbearer la te simen semans verite Wayòm nan yon seri kote ki gen anpil moun. E malgre opozisyon, tikras pa tikras, travay yo a te pote fwi (Lik 8:11, 15). Anfèt, jodi a gen plis pase 40 000 pwoklamatè k ap preche mesaj Wayòm nan nan peyi kote pyonye sa yo te preche bon nouvèl la. Frè sa yo te fè yon travay ki mande pou yo gen anpil kouraj e yo te sèvi ak bato ki rele Lightbearer la pou yo gaye limyè verite ki nan Bib la. Se pa ti bèl egzanp yo kite pou nou!