Nineva be Asuria Basileia ena siti badana. Unai siti ai king edia ruma namodia bona dubu momo idia noho, ena strit be idia bada, bona magu (wall) badadia ese hanua idia hagegea. Peroveta tauna Nahumu ese unai siti ia gwauraia, ‘taunimanima edia rarana ia bubua hanua.’​—Nahumu 3:1.

Unai be ladana maorona, badina Asuria edia dagedage taudia edia laulau be Nineva ai king Senakeriba ena ruma ena haba ai idia torea. Unai laulau ta ai, Asuria taudia haida ese dibura tauna ta ena imana idia kwatua bona idia dogoatao lalonai, ena malana be Asuria tauna ma ta ese ia veria. Nadi ai toretore ta ia gwau, Asuria taudia ese dibura taudia edia udu baubau o bibina ai huku idia atoa, varo idia kwatua, bena idia veridia. Asuria taudia ese idia hadiburaia ofesa taudia edia king edia kwarana idia utua bona unai ofesa taudia edia aiona ai idia taua dae, ageva bamona.

Diba bada tauna Archibald Henry Sayce ese taoni ta idia abia Asuria taudia edia dagedage karana be inai bamona ia herevalaia: “Tuari ai idia alaia taudia edia kwarana idia haboua amo idia hahedinaraia idia kwalimu; memero kekeni idia mauri lalonai lahi ai idia gabua o idia hadikadia; tatau be au ta dekenai idia taua dae, idia kwadia, edia matana ruaosi idia kokia, eiava edia imana, aena, taiana o udu baubau idia utua oho.”

Dirava ese Iuda taudia ia oda henia: “Ruma matamata do umui haginia neganai, guhi ena isena dekenai magu maragina do umui haginia, emui ruma guhi dekena amo tau ta do ia moru garina.” (Deuteronomi 22:8) Baibel negadiai, Iuda famili momo be unai oda idia badinaia, badina nega haida edia ruma ena guhi ai gau idauidau idia karaia.

Israela taudia momo edia ruma ena guhi be palaka. Nega momo famili be unuseniai dina ai idia helai, lai namona idia moalelaia, o gaukara haida idia karaia. Siahu neganai, haida be unuseniai idia mahuta. (1 Samuela 9:26) Biru tauna be unuseniai kurukuru, fig, bona greips ia hakaukaudia.​—Iosua 2:6.

Danu, unuseniai haida be Iehova idia tomadiho henia to ma haida be kaivakuku idia tomadiho henia. (Nehemia 8:​16-18; Ieremia 19:13) Adorahi 12 oklok bamona ai, aposetolo Petero be ruma ena guhi ia lao, ia guriguri totona. (Kara 10:​9-16) Bema ruma ena guhi be vain o pama au raurau amo idia koua, ena ikerukeru be namo herea.

Buka ta, The Land and the Book ia gwau, Israela taudia edia ruma ena guhi ena vadavada ta be “ruma ena saidi ai idia karaia, to mai ena magu” o haba. Bema ruma tauna ia ura lasi ruma lalonai ia vareai, unai vadavada ia gaukaralaia. Unai dainai, Iesu ese do idia hadikaia siti amo do idia heau mauri taudia ia hadibaia: “Namona be ruma ataiai ia noho tauna ia diho lasi, ruma amo ena kohu ia abia totona.”​—Mataio 24:17.