• IA VARA LAGANINA: 1963

• TANO: BRITAIN

• GUNA: MONI GAUKARA NAMONA IA MOALELAIA

EGU MAURI GUNANA:

Lau be Croydon, South London ai lau vara. Egu tama sina be Caribbean motumotu ta ladana St. Vincent amo idia mai. Edia natudia ibounai be 9, lau be namba 6. Egu sinana be Methodist dubu dekenai ia lao. Ena be lau ura egu diba lau habadaia, to Dirava dibaia totona lau laloa lasi. Nega momo egu sikuli holidei negadiai, laiberi amo lau abia buka idauidau be kahirakahira ia noho gohu ta badinai lau duahia.

Sikuli lau rakatania bena lagani haida murinai lau ura ogogami taudia lau durua. Noho gabuna lasi, tauanina dika bona idia hekwarahi stadi totona taudia lau durua. Bena iunivesiti ai helt saiens ena kosi ta lau abia. Lau gradueit murinai gaukara namodia momo lau abia dainai mauri namona lau moalelaia. Lau be freelance management consultant bona social research gaukara lau karaia dainai, lau gaukaralaia gaudia be laptop kompiuta bona Intanet sibona. Nega haida peleini amo tano ma haida dekenai lau lao, wiki rua lau noho hotel namona ta dekenai bona spa bona gym lau gaukaralaia egu tauanina hanamoa totona. Lau laloa mauri namona be inai. To ogogami taudia lau laloaboio lasi.

BAIBEL ESE EGU MAURI IA HAIDAUA DALANA:

Lagani momo lalonai lau laloa, ‘Dahaka dainai ita mauri noho?’ To haere be Baibel lalonai lau tahua lasi. Lagani 1999 lalonai, egu taihuna ladana Margaret be Iehova ena Witnes hahine ta bona dina ta ia bona ena Witnes turana ese lau idia vadivadi henia. Ena turana ese lau ia lalonamo henia bona Baibel stadi ia gwauraia neganai lau abia dae. Egu moni gaukara ese egu nega bada herea ia haorea dainai egu stadi nega be bada lasi bona diba lau abia haraga lasi.

Lagani 2002 ena siahu negana ai lau lao Sautwest England dekenai. Unuseniai social research iunivesiti postgraduate digri kosi lau karaia bona egu tahua gauna be doketa ladana lau abia. Egu natuna mero maragina ida Kingdom Hall ai lao henia. Ena be edukeisen badana lau ura henia to Baibel lau stadilaia neganai lau moale, badina iseda mauri ena hekwakwanai edia badina bona ita kara henia diba dala namodia lau lalopararalaia. Lau diba Mataio 6:24 ena hereva be momokani, ia gwau, ta ese biaguna rua edia hesiai gaukara ia karaia be hegeregere lasi. Ta be Dirava, ma ta be taga, edena do lau abia hidi? Lau diba unai disisen ese egu mauri ena tahua gauna do ia hahedinaraia.

Lagani gunana ai, Witnes ta ena ruma dekenai Baibel stadi grup lau lao henia. Ai stadilaia buka ena ladana be Is There a Creator Who Cares About You? a Unai stadi amo lau diba ita ia Havaraia Diravana Iehova sibona ese taunimanima edia hekwakwanai ibounai ia hanamoa diba. To hari iunivesiti ese lau idia hadibaia gauna be, mauri ena anina be Dirava abidadama henia karana amo ia mai lasi. Lau badu dikadika. Hua rua murinai disisen lau karaia, iunivesiti do lau rakatania bona Dirava ena ura do lau karaia.

Aonega Herevadia 3:5, 6 ena hereva dainai egu mauri dalana lau haidaua. Ia gwau: “Mai emu kudouna ibounai ida Iehova oi abidadama henia, bona sibona emu diba dekenai oi tabekau lasi. Oi karaia gaudia ibounai lalonai Dirava oi laloa, bona ia ese emu raka dalana do ia hamaoromaoroa.” Lalokau Dirava ita dibaia karana ena namo ese taga bona lada bada ena namo ia hereaia. Iehova ena ura tanobada dekenai bona Iesu ese ena mauri ia henia ena badina lau dibaia neganai lau ura egu mauri, ita ia Havaraia Diravana dekenai lau gwauhamata. April 2003 ai bapatiso lau abia. Gabeai egu noho dalana lau haidaua.

NAMO LAU DAVARIA DALANA:

Iehova lau tura henia be dava bada gauna ta bamona. Unai amo lalomaino bona moale lau abia. Dirava idia tomadiho henia taunimanima ida ai hebou neganai lau moale bada.

Lau tahua hanaihanai gaudia, diba bona laloparara, be Baibel bona Keristani hebou amo lau davaria vadaeni. Egu abidadama be taunimanima dekenai lau herevalaia neganai lau moale. Hari taunimanima lau durua be egu gaukara korikori, mauri namona idia davaria bona tanobada matamata lalonai do idia noho helaro idia abia totona. June 2008 amo lau be painia gaukara lau karaia, hari lau moale bada, guna bamona lasi. Mauri ena anina korikori lau davaria vadaeni. Unai dainai Iehova dekenai lau tanikiu bada herea.

• IA VARA LAGANINA: 1973

• TANO: AUSTRIA

• GUNA: LAKI GADARA IA URA HENIA TAUNA

EGU MAURI GUNANA:

Taoni maragi ta ladana Braunau, Austria dekenai lau vara. Unai gabu taudia edia mauri be namo, kara dika be momo lasi. Egu bese be Katolik bona unai dubu lalonai lau tubu daekau.

Lau be do mero matamata neganai, gau ta dainai lau laloa momo. Lagani 1984 egu mauri lagani be 11 neganai, egu tura namona ta ida soka gadara ai karaia. Adorahi kahana ai motuka aksiden lalonai ia mase. Egu turana ena mase dainai lau lalohisihisi bada herea. Lagani momo unai aksiden murinai mase ena anina lau lalohekwarahilaia.

Sikuli lau rakatania neganai elektrisen gaukara lau karaia. Ena be laki gadara ai moni bada herea lau gadaralaia, to egu moni be hegeregere. Danu, spot gadara bona heavy metal bona punk miusiki lau ura bada. Egu mauri lalonai klab idauidau bona pati momo dekenai lau lao. Egu mauri lalonai moale karadia lau tahua bona kara bodaga lau karaia, to lau mamina egu mauri be anina lasi.

BAIBEL ESE EGU MAURI IA HAIDAUA DALANA:

Lagani 1995 ai, Witnes tau buruka ta be egu iduara dekenai ia pidipidi. Buka ta be lau dekenai ia henia, bona unai buka ese mase ai dahaka ia vara ia herevalaia. Baibel amo unai henanadai ia haerelaia. Egu turana ena mase lau laloa noho dainai ena buka lau abia. Mase ia herevalaia karoa sibona lasi, to buka ibounai lau duahia!

Lau duahia herevana ese mase anina sibona lasi, to egu henanadai momo ia haerelaia. Katolik lalonai lau tubu daekau dainai, egu abidadama ena badina badana tamona be Iesu. To Baibel lau stadilaia namonamo neganai, heduru lau abia Iesu ena Tamana, Iehova Dirava lau tura henia totona. Lau hoa badina lau davaria Iehova be sibona ia hunia lasi, to ia idia tahua tahudia dekenai ia be kahirakahira. Iena ura be ia idia dibaia namonamo. (Mataio 7:7-11) Lau davaria Iehova be mai ena lalomamina. Danu, hanaihanai ena hereva ia hamomokania. Unai lau diba neganai, lau ura bada Baibel ena peroveta herevadia bona edia anina be idia vara dalana lau tahua. Lau davaria gaudia ibounai ese egu abidadama Dirava dekenai idia habadaia.

Nega daudau lasi bena lau diba Iehova ena Witnes taudia sibona be idia ura bada taunimanima idia durua Baibel ena hereva idia lalopararalaia totona. Witnes taudia edia buka lalonai Baibel siri ta lau itaia neganai, egu Katolik Baibel lalonai lau duahia. Unai lau tahua neganai lau laloparara hereva momokani lau davaria vadaeni.

Baibel stadi amo lau diba Iehova ena ura be ia ese ia gwauraia kara maoromaoro sibona ita karaia. Efeso 4:22-24 lau duahia neganai lau diba egu “kara gunana” lau kokia be namo badina unai be egu “mauri gunana ena dala hegeregerena,” bona “kara matamata” lau atoa badina unai kara be “Dirava ena ura hegeregerena ia vara.” Unai dainai kara bodaga lau rakatania. Lau diba laki gadara lau karaia lasi be namo badina unai ese taga momo haboua karana bona mataganigani karana ia havaraia. (1Korinto 6:9, 10) Lau diba egu mauri dalana lau haidaua totona egu tura gunadia lau rakatania bona kara namodia sibona idia karaia taudia lau bamoa be namo.

Egu kara gunadia lau rakatania be auka. To Kingdom Hall dekenai Witnes taudia edia hebou lau lao henia bona kongrigeisen lalonai tura matamata haida lau karaia hamatamaia. Danu, lau sibona Baibel lau stadilaia namonamo. Unai amo lau ura henia miusiki lau haidaua, egu mauri ena tahua gauna matamata lau abia bona egu toana lau hanamoa. Lagani 1995 ai, bapatiso lau abia bona Iehova ena Witnes ta ai lau lao.

NAMO LAU DAVARIA DALANA:

Hari moni bona taga lau biagua diba. Guna lau be badu momo to hari lau be lalomanau tauna. Danu, vaira nega totona lau laloa momo lasi.

Lau moale bada badina tano idauidau taunimanima ida Iehova ena hesiai gaukara ai karaia hebou. Ena be taunimanima haida be mai edia hekwakwanai, to mai abidadama ida Iehova ena hesiai gaukara idia karaia noho. Lau moale danu badina hari egu nega bona egu goada ibounai lau gaukaralaia, lau sibona ena ura karaia totona lasi, to Iehova lau tomadiho henia bona taunimanima lau durua totona.

• IA VARA LAGANINA: 1963

• TANO: ENGLAND

• GUNA: MAURI IA LALOHISIHISILAIA

EGU MAURI GUNANA:

Lau be England dekenai lau vara, to egu mauri lagani be 7 neganai egu famili be Australia dekenai idia lao. Gold Coast, Queensland dekenai ai noho. Egu famili be moni momo taudia lasi to ai dabu lasi.

Lau tubu daekau neganai, egu noho be namo to lau moale momokani lasi. Lau be mauri dekenai lalohisihisi. Egu tamana be ia inuinu momo. Ena inuinu karana bona egu sinana ia kara dika henia dainai, ia lau lalokau henia lasi. To gabeai, lau kamonai guna ia be Malaya dekenai ami gaukara ia karaia, unai amo lau laloparara dahaka dainai ena kara be unai bamona.

Haisikuli lau karaia neganai inuinu momo karana lau hamatamaia. Egu lagani be 16 neganai navy lau vareai. Drag lau abia toho bona kuku lau ania hanaihanai. Danu, egu inuinu karana be ia dika ia lao. Matamana ai wiken sibona to gabeai dina iboudiai lau inuinu.

Egu lagani be 20 neganai, lau gwau, Dirava be lasi. Lau laloa ‘bema Dirava ia noho, dahaka dainai taunimanima idia hisihisi bona idia mase?’ Poem haida lau torea bona Dirava lau gwauraia dika badina tanobada be kara dika amo ia honu.

Egu mauri lagani be 23 neganai navy lau rakatania. Gabeai, gaukara idauidau lau karaia bona lagani ta tano idauidau lau vadivadi henia, to lau lalohisihisi noho. Lau be mai egu tahua gauna ta lasi. Gau ibounai lau moalelaia lasi. Ruma ta hoia, gaukara namona ta abia, lada badana ta abia, gau ibounai dekenai lau moale lasi. Lau idia “hamoalea” gaudia be inuinu bona miusiki sibona.

Mauri ena badina lau ura diba negana lau laloatao. Lau be Poland ai, dibura kamepa ladana Auschwitz lau itaia loaloa. Unai gabu dekenai idia karaia kara dikadia sivaraina be guna lau duahia. To lau gini bona unai kamepa ena bada lau itaia neganai lau laloa dobu. Taunimanima ese unai bamona kara dikadia taunimanima ma haida dekenai idia karaia be lau hoalaia. Lau loaloa mai taitai ida, bona egu henanadai badana be, ‘Dahaka dainai?’

BAIBEL ESE EGU MAURI IA HAIDAUA DALANA:

Lagani 1993 ai, Australia dekenai lau giroa neganai, egu henanadai edia haere lau davaria totona Baibel lau duahia matamaia. Nega daudau lasi Iehova ena Witnes taudia rua be egu iduara dekenai idia pidipidi. Lau idia invait edia hebouhebou badana ta dekenai lau lao totona. Lau abia dae.

Guna lau lao unai gabu dekenai gadara lau itaia totona. To unai be idau, Witnes edia hebouhebou be idau herea. Witnes taudia edia hereva bona edia dabua be namo, bona edia natudia idia kamonai namonamo. Aniani ania neganai lau hoa. Witnes taudia handred bamona be gadara gabuna dekenai idia aniani, to edia helai gabuna dekenai idia giroa lao neganai momoru lau itaia lasi! Unai taunimanima be mai manau bona maino ai idia noho, unai kara lau ura bada. Platfom amo idia herevalaia gaudia lau laloaboio vadaeni to Witnes taudia edia kara lau hoalaia bona lau laloatao noho.

Unai adorahi ai, egu kakana ena hereva lau laloa. Ia ese Baibel ia duahia bona tomadiho idauidau ia stadilaia bona ia gwau, tomadiho momokani be ena huahua amo do oi dibaia. (Mataio 7:​15-​20) Lau laloa, namona be Witnes taudia edia kara ia idau ena badina lau tahua. Unai be nega ginigunana hemami namona bona helaro lau abia.

Wiki gabena unai Witnes taudia rua idia giroa mai bona Baibel stadi ai karaia totona idia hereva. Lau abia dae, bona idia ida Keristani hebou ai lao henia.

Baibel lau stadi neganai, egu lalohadai Dirava dekenai lau haidaua momokani. Lau davaria, ia ese kara dika bona hisihisi ia havaraia lasi to taunimanima ese kara dika idia karaia neganai ia lalohisihisi. (Genese 6:6; Salamo 78:40, 41) Lau ura lasi Iehova do ia lalohisihisi egu kara dainai. Lau ura ena kudouna lau hamoalea be namo. (Aonega Herevadia 27:11) Inuinu bona kuku ania karana lau hadokoa bona kara bodaga lau karaia lou lasi. March 1994 ai, bapatiso lau abia bona Iehova ena Witnes tauna ai lau lao.

NAMO LAU DAVARIA DALANA:

Hari lau moale bada. Hekwakwanai lau davaria neganai inuinu lau laloa lasi, to egu metau be Iehova dekenai lau negea lao.​—Salamo 55:22.

Witnes hahine namona ta ladana Karen lau adavaia bona lagani 10 ai, Karen ena natuna Nela ida ai noho. Ai toiosi be nega momo Keristani hesiai gaukara ai karaia hebou, taunimanima ai durua Dirava do idia diba totona. Vadaeni, hari egu mauri be mai ena badina.